15ರಿಂದ ನಾಲ್ಕನೇ ಹಂತದ ಹುಲಿ ಗಣತಿ

‘ರಾಷ್ಟ್ರೀಯ ಹುಲಿ ಯೋಜನೆ ಅನುಸಾರ ಪ್ರತಿ ವರ್ಷವೂ ಹುಲಿ ಸಂರಕ್ಷಿತಾರಣ್ಯ ಪ್ರದೇಶದಲ್ಲಿ ಗಣತಿ ನಡೆಯಲಿದೆ. ಈ ಸಾಲಿನಲ್ಲಿ ಕ್ಯಾಮೆರಾ ಆಧರಿಸಿ ಗಣತಿ ನಡೆಸಲಾಗುವುದು’ ಎಂದು ವೀರನಹೊಸಹಳ್ಳಿ ವಲಯ ಅರಣ್ಯಾಧಿಕಾರಿ ಮಧುಸೂದನ್‌ ತಿಳಿಸಿದರು.

‘ನಾಗರಹೊಳೆಯ 648 ಚದರ ಕಿಲೋ ಮೀಟರ್ ವ್ಯಾಪ್ತಿಯಲ್ಲಿ 8 ವಲಯಗಳಿದ್ದು, ಒಟ್ಟು 201 ಸ್ಥಳ ಗುರುತಿಸಲಾಗಿದೆ. ಪ್ರತಿ 2 ಕಿ.ಮೀಗೆ ವಿರುದ್ಧ ದಿಕ್ಕಿನಲ್ಲಿ ಎರಡು ಕ್ಯಾಮೆರಾ ಅಳವಡಿಸಲಾಗುವುದು. ಒಟ್ಟು 402 ಕ್ಯಾಮೆರಾ ಬಳಸಿಕೊಳ್ಳಲಾಗುವುದು. ಇಲಾಖೆಯ 60 ಸಿಬ್ಬಂದಿ ಭಾಗವಹಿಸಲಿದ್ದು, ಅನುಸರಿಸಬೇಕಿರುವ ಕ್ರಮ ಹಾಗೂ ಕ್ಯಾಮೆರಾ ಬಳಸುವ ಬಗ್ಗೆ ಮಾಹಿತಿ ನೀಡಲಾಗಿದೆ’ ಎಂದು ಹೇಳಿದರು.

‘ಮಾಹಿತಿ ಕ್ರೋಡೀಕರಿಸುವ ಬಗ್ಗೆ ಕಂಪ್ಯೂಟರ್‌ ಆಪರೇಟರ್‌ಗಳಿಗೆ ತರಬೇತಿ ನೀಡಲಾಗಿದೆ. ಮಾಹಿತಿ ಸಂಗ್ರಹಕ್ಕೆ ಬೇಕಾದ ಎಲ್ಲ ಸಾಫ್ಟ್ ವೇರ್‌ಗಳು ಇಲಾಖೆಯಲ್ಲಿ ಲಭ್ಯವಿವೆ’ ಎಂದರು.

2015–16ನೇ ಸಾಲಿನ ಗಣತಿಯಲ್ಲಿ ನಾಗರಹೊಳೆಯಲ್ಲಿ 92 ಹುಲಿಗಳು ಪತ್ತೆಯಾಗಿದ್ದವು. ಈ ಅರಣ್ಯ ಹುಲಿ ಸಂತತಿ ವೃದ್ಧಿಗೆ ಸೂಕ್ತ ಪ್ರದೇಶವಾಗಿದ್ದು, ಈ ಬಾರಿ ಹೆಚ್ಚು ವ್ಯಾಘ್ರಗಳು ಪತ್ತೆಯಾಗುವ ಸಾಧ್ಯತೆಗಳಿವೆ. ಗಣತಿಗೆ ನವೆಂಬರ್‌ನಿಂದ ಜನವರಿ ಅಂತ್ಯದವರೆಗೆ ಸೂಕ್ತ ಸಮಯವಾಗಿದೆ. ರಾಜ್ಯದ ಎಲ್ಲ ಹುಲಿ ಸಂರಕ್ಷಿತಾರಣ್ಯದಲ್ಲಿ ಏಕಕಾಲಕ್ಕೆ ಗಣತಿ ಆರಂಭವಾಗಲಿದೆ ಎಂದು ವಿವರಿಸಿದರು.