ನವದೆಹಲಿ: ದೇಶದ ಅತಿದೊಡ್ಡ ತೈಲ ಸಂಸ್ಥೆ ಇಂಡಿಯನ್‌ ಆಯಿಲ್‌ ಕಾರ್ಪೊರೇಷನ್‌ (ಐಒಸಿ) ತನ್ನ ತೈಲಾಗಾರ ಸಾಮರ್ಥ್ಯ ವೃದ್ಧಿಸಲು ₹ 1.43 ಲಕ್ಷ ಕೋಟಿ ಹೂಡಿಕೆ ಮಾಡಲು ನಿರ್ಧರಿಸಿದೆ.
2030ರ ಒಳಗೆ ತೈಲಾಗಾರ ಸಾಮರ್ಥ್ಯವನ್ನು 15 ಕೋಟಿ ಟನ್‌ಗಳಿಗೆ ಹೆಚ್ಚಿಸಲು ಹಾಗೂ ಪೆಟ್ರೋಕೆಮಿಕಲ್ ಉತ್ಪಾದನೆಗೆ ಆದ್ಯತೆ ನೀಡಲು ಈ ಹೂಡಿಕೆ ಮಾಡುವುದಾಗಿ ತಿಳಿಸಿದೆ.
‘ಯುರೊ 6 ಮಾಲಿನ್ಯ ತಡೆ ಮಾನದಂಡ ಇರುವ ಪೆಟ್ರೋಲ್‌ ಮತ್ತು ಡಿಸೆಲ್‌ ಉತ್ಪಾದನೆ ಮಾಡಲು ತೈಲಾಗಾರಗಳನ್ನು ಮೇಲ್ದರ್ಜೆಗೆ ಏರಿಸಬೇಕಿದೆ. ಇದಕ್ಕಾಗಿ ₹ 16,628 ಕೋಟಿ ಹೂಡಿಕೆ ಮಾಡಲಿದ್ದು, 2020ರ ವೇಳೆಗೆ ಹೂಡಿಕೆ ಪ್ರಕ್ರಿಯೆ ಪೂರ್ಣಗೊಳ್ಳಲಿದೆ’ ಎಂದು ಕಂಪನಿಯ ನಿರ್ದೇಶಕ ಬಿ.ವಿ. ರಾಮ ಗೋಪಾಲ್ ತಿಳಿಸಿದ್ದಾರೆ.
‘ಪೆಟ್ರೋಕೆಮಿಕಲ್ ಯೋಜನೆಗೆ ₹ 15,600 ಕೋಟಿ ಹಾಗೂ ಹಾಲಿ ಇರುವ ತೈಲಾಗಾರಗಳ ಸಾಮರ್ಥ್ಯ ವೃದ್ಧಿಗೆ ₹ 74,600 ಕೋಟಿ ಹೂಡಿಕೆ ಮಾಡಲಾಗುವುದು. ₹ 36,500 ಕೋಟಿ ವೆಚ್ಚದ ಯೋಜನೆಗೆ ಕಂಪನಿ ಆಡಳಿತ ಮಂಡಳಿ ಒಪ್ಪಿಗೆ ದೊರೆಯಬೇಕಿದೆ’ ಎಂದು ಮಾಹಿತಿ ನೀಡಿದ್ದಾರೆ.
