ಇಯಾನ್‌ ಗ್ರಿಲ್ಲಟ್‌ಗೆ ‌‘ಟೈಮ್‌’ ನಿಯತಕಾಲಿಕದ ಗೌರವ

ಹ್ಯೂಸ್ಟನ್‌: ಈ ವರ್ಷಾಂರಂಭದಲ್ಲಿ ಜನಾಂಗೀಯ ದ್ವೇಷದ ಕಾರಣ ಭಾರತೀಯ ಪ್ರಜೆಯ ಮೇಲೆ ಗುಂಡಿನ ದಾಳಿ ನಡೆದಾಗ ಅದನ್ನು ತಪ್ಪಿಸಲು ಅಡ್ಡ ಬಂದು ಗುಂಡೇಟಿನಿಂದ ಗಾಯಗೊಂಡಿದ್ದ ಅಮೆರಿಕ ಪ್ರಜೆ ಇಯಾನ್ ಗ್ರಿಲ್ಲಟ್ ಗೆ (24) 'ಟೈಮ್‌' ನಿಯತಕಾಲಿಕ ವಿಶೇಷ ಗೌರವ ಸಲ್ಲಿಸಿದೆ.

‘2017ರಲ್ಲಿ ವಿಶ್ವಾಸ ತುಂಬಿದ ಐವರು ನಾಯಕರಲ್ಲಿ’ ಇಯಾನ್‌ ಕೂಡ ಒಬ್ಬರು ಎಂದು ನಿಯತಕಾಲಿಕ ಗುರುತಿಸಿದೆ. ‘ಎಲ್ಲರ ಪ್ರಾರ್ಥನೆ, ಬೆಂಬಲದಿಂದ ಚೇತರಿಸಿಕೊಂಡಿದ್ದೇನೆ. ಇದೊಂದು ಅದ್ಭುತ ವರ್ಷ’ ಎಂದು ಗ್ರಿಲ್ಲಟ್‌ ತಿಳಿಸಿದ್ದಾರೆ.

ಫೆಬ್ರುವರಿ 22ರಂದು ಅಮೆರಿಕದ ಕನ್ಸಾಸ್ ನಗರದ ಆಸ್ಟಿನ್ ಬಾರ್‌ನಲ್ಲಿ ಆಡಮ್ ಪುರಿಟನ್ ನಡೆಸಿದ ಗುಂಡಿನ ದಾಳಿಯಲ್ಲಿ ಹೈದರಾಬಾದ್‌ ಮೂಲದ ಎಂಜಿನಿಯರ್‌ ಶ್ರೀನಿವಾಸ ಕೂಚಿಬೊಟ್ಲಾ ಸಾವನ್ನಪ್ಪಿದ್ದರೆ, ವಾರಂಗಲ್‌ನ ಅಕೋಲ್ ಮೇಡಸಾನಿ ಗಾಯಗೊಂಡಿದ್ದರು. ಇಬ್ಬರ ರಕ್ಷಣೆಗೆ ಮುಂದಾದ ಇಯಾನ್‌ ಗ್ರಿಲ್ಲಟ್‌ ಗಾಯಗೊಂಡಿದ್ದರು.

ಇಯಾನ್‌ ಕಾರ್ಯಕ್ಕೆ ಮೆಚ್ಚುಗೆ ಸೂಚಿಸಿ ಭಾರತ ಮೂಲದ ಅಮೆರಿಕ ಸಮುದಾಯ ‘ಎ ಟ್ರೂ ಅಮೆರಿಕನ್‌ ಹೀರೋ’ ಬಿರುದು ಹಾಗೂ 64.36 ಲಕ್ಷ ರೂ ನೀಡಿ ಗೌರವಿಸಿತ್ತು.