ಮನೆಗೆ ಸಿಸಿಟಿವಿ ಕಣ್ಗಾವಲು

7

ಮನೆಗೆ ಸಿಸಿಟಿವಿ ಕಣ್ಗಾವಲು

Published:
Updated:
ಮನೆಗೆ ಸಿಸಿಟಿವಿ ಕಣ್ಗಾವಲು

* ಒಳಾಂಗಣಕ್ಕೆ ಡೋಮ್: ಡೋಮ್ ಸಿಸಿಟಿವಿ ಕ್ಯಾಮೆರಾಗಳು, ಗುಮ್ಮಟಾಕಾರದಲ್ಲಿರುತ್ತವೆ. ಇವುಗಳನ್ನು ವಿಶೇಷವಾಗಿ ಮನೆಯ ಒಳಾಂಗಣ ಪ್ರದೇಶಗಳಿಗೆಂದೇ ವಿನ್ಯಾಸ ಮಾಡಲಾಗಿದೆ. ಇದನ್ನು ಕೋಣೆಯ ಛಾವಣಿಗೆ ಅಳವಡಿಸುವುದರಿಂದ ಸಂಪೂರ್ಣ ಕೋಣೆಯ ಚಿತ್ರಣ ಇದರಲ್ಲಿ ದಾಖಲಾಗುತ್ತದೆ. ಈ ಕ್ಯಾಮೆರಾಗಳಿಗೆ ಕಪ್ಪುಬಣ್ಣದ ಹೊದಿಕೆಯಿರುತ್ತದೆ. ಹಾಗಾಗಿ ಯಾವ ದಿಕ್ಕಿನಲ್ಲಿ ದೃಶ್ಯ ಸೆರೆಯಾಗುತ್ತಿದೆ ಎಂಬುದು ತಿಳಿಯುವುದಿಲ್ಲ. ಇದನ್ನು ಹೆಚ್ಚು ಬೆಳಕು ಬರುವ ಪ್ರದೇಶದಲ್ಲಿ ಅಳವಡಿಸಿದರೆ ಉತ್ತಮ ಗುಣಮಟ್ಟದ ದೃಶ್ಯಾವಳಿ ದಾಖಲಿಸಲು ಸಾಧ್ಯವಾಗುತ್ತದೆ.

* ದೀರ್ಘ ಕಾರ್ಯಾಚರಣೆಗೆ ಬುಲೆಟ್ ಕ್ಯಾಮೆರಾಗಳು: ಮನೆಯ ಹೊರಾಂಗಣ ಪ್ರದೇಶ ಹಾಗೂ ಹೆಚ್ಚು ಕಾಲ ಸಿಸಿಟಿವಿ ಕಣ್ಗಾವಲು ಅಗತ್ಯವಿರುವ ಕಡೆ ಬುಲೆಟ್ ಕ್ಯಾಮೆರಾ ಅಳವಡಿಸಲಾಗುತ್ತದೆ. ಈ ಕ್ಯಾಮೆರಾಗಳು ದೀರ್ಘ ಮತ್ತು ಮೊನಚಾದ ಸಿಲಿಂಡರ್ ಆಕೃತಿಯನ್ನು ಹೊಂದಿರುತ್ತವೆ. 80 ಡಿಗ್ರಿ ಕೋನದಲ್ಲಿ 40 ಅಡಿಗಳಷ್ಟು ದೂರದ ದೃಶ್ಯವನ್ನು ದಾಖಲಿಸುವ ಸಾಮರ್ಥ್ಯ ಇದಕ್ಕಿದೆ. ಹವಾಮಾನ ಬದಲಾವಣೆಯಿಂದ ಕ್ಯಾಮೆರಾ ಲೆನ್ಸ್‌ಗಳಿಗೆ ತೊಂದರೆಯಾಗುವುದನ್ನು ತಡೆಯಲು ಹೊರಗೆ ಕವಚವೂ ಇರುತ್ತದೆ. ಕಾರ್ ಶೆಡ್‌, ಮಹಡಿಯ ಮನೆ ಅಂದರೆ ಮನೆಯ ಮುಂಭಾಗ ಕಾಣುವಂತೆ ಅಳವಡಿಸುವುದು ಸೂಕ್ತ.

* ಸಿ-ಮೌಂಟ್– ಇದು ಎಲ್ಲದಕ್ಕೂ ಸೈ: ವಿವಿಧ ಉದ್ದೇಶಗಳಿಗೆ ಹೊಂದಿಕೊಳ್ಳುವಂತೆ ಮತ್ತು ಕ್ಯಾಮೆರಾ ಲೆನ್ಸ್‌ಗಳನ್ನು ಬದಲಾಯಿಸಲು ಅನುಕೂಲವಾಗುವಂತೆ ಇದನ್ನು ವಿನ್ಯಾಸಗೊಳಿಸಲಾಗಿದೆ. ಸಾಮಾನ್ಯವಾಗಿ ಇವುಗಳು 35 ಅಡಿಗಳಷ್ಟು ದೂರದವರೆಗೂ ಸ್ಪಷ್ಟವಾದ ದೃಶ್ಯಗಳನ್ನು ದಾಖಲಿಸುವ ಶಕ್ತಿ ಹೊಂದಿರುತ್ತವೆ. ಹೆಚ್ಚು ಜೂಮ್ ಮಾಡಿ, ಉತ್ತಮ ಗುಣಮಟ್ಟದ ದೃಶ್ಯಗಳನ್ನು ದಾಖಲಿಸುವುದೂ ಇದರಲ್ಲಿ ಸಾಧ್ಯ. ಮನೆಯಲ್ಲಿ ಅತ್ಯಂತ ಬೆಲೆಬಾಳುವ ವಸ್ತುಗಳನ್ನು ಇಟ್ಟಿರುವ ಕೋಣೆಗೆ (ಸ್ಟ್ರಾಂಗ್‌ ರೂಂ) ಈ ಕ್ಯಾಮೆರಾಗಳನ್ನು ಅಳವಡಿಸುತ್ತಾರೆ.

* ಹಗಲು, ರಾತ್ರಿ ಮೇಲ್ವಿಚಾರಣೆ: ದಿನದ 24 ಗಂಟೆಯೂ ಕಣ್ಗಾವಲಿನ ಅವಶ್ಯಕತೆ ಇರುವ ಪ್ರದೇಶಗಳಲ್ಲಿ ‘ಡೇ ಅಂಡ್ ನೈಟ್’ ಸಿಸಿಟಿವಿ ಕ್ಯಾಮೆರಾಗಳು ನೆರವಾಗುತ್ತವೆ. ಹಗಲು ಮತ್ತು ರಾತ್ರಿ ವೇಳೆ ದೃಶ್ಯಗಳನ್ನು ದಾಖಲಿಸುವ ಶಕ್ತಿ ಹೊಂದಿರುವ ಇದನ್ನು, ಕಡಿಮೆ ಬೆಳಕಿನಲ್ಲೂ ಸ್ಪಷ್ಟ ಚಿತ್ರಗಳನ್ನು ಸೆರೆಯಿಡಿಯುವ ರೀತಿ ವಿನ್ಯಾಸ ಮಾಡಲಾಗಿದೆ. ಈ ಕ್ಯಾಮೆರಾಗಳಲ್ಲಿ ವಿಶೇಷವಾಗಿ ಬೆಳಕಿನ ಸಂಯೋಜನೆಗೆ ಚಿಪ್‌ಗಳನ್ನು ಅಳವಡಿಸಿರುವುದರಿಂದ ಹೊರಾಂಗಣ ಪ್ರದೇಶದಲ್ಲಿ ಬಳಸಿದರೆ ಹೆಚ್ಚು ಸೂಕ್ತ. ಹಗಲಿನ ಸಮಯದಲ್ಲಿ ಬಣ್ಣದ ದೃಶ್ಯಗಳನ್ನು ಮತ್ತು ರಾತ್ರಿ ಸಮಯದಲ್ಲಿ ಕಪ್ಪು ಬಿಳುಪಿನ ಚಿತ್ರವನ್ನು ದಾಖಲಿಸುತ್ತದೆ. ಮನೆಯ ಭಾಗದಲ್ಲಿ ಕಡಿಮೆ ಬೆಳಕು ಇರುವ ಜಾಗಗಳಲ್ಲಿ ಇದನ್ನು ಅಳವಡಿಸಬಹುದು.

* ಮಾಲೀಕರ ನಿಯಂತ್ರಣದಲ್ಲಿ ಪಿಟಿಝಾಡ್: ಪಿಟಿಝಾಡ್ (ಪ್ಯಾನ್‌, ಟಿಲ್ಟ್‌, ಜೂಮ್‌) ಕ್ಯಾಮೆರಾ ಅಳವಡಿಸುವುದರಿಂದ ಮನೆಯ ಮಾಲೀಕರು ಆ್ಯಪ್‌ ಮೂಲಕ ಯಾವುದೇ ಪ್ರದೇಶದಿಂದಲೂ ತಮ್ಮ ಮನೆಯ ಸುರಕ್ಷತೆಯ ಕಾಳಜಿ ವಹಿಸಬಹುದು. ದೂರದಲ್ಲಿದ್ದರೂ, ಅಗತ್ಯಕ್ಕೆ ಅನುಗುಣವಾಗಿ ಕ್ಯಾಮೆರಾ ಸ್ಥಾನವನ್ನು ಆ್ಯಪ್‌ ಮೂಲಕವೇ ಬಲದಿಂದ ಎಡಕ್ಕೆ (ಪ್ಯಾನ್‌) ಮತ್ತು ಮೇಲಿಂದ ಕೆಳಕ್ಕೆ (ಟಿಲ್ಟ್‌) ಬದಲಾಯಿಸಿ ಸೂಕ್ತವಾದ ದೃಶ್ಯ ದಾಖಲಿಸಬಹುದು. ತಪಾಸಣೆ ಅಥವಾ ಮೇಲ್ವಿಚಾರಣೆಯ ಕಣ್ಗಾವಲು ಬಯಸುವ ಮನೆ ಮಾಲೀಕರಿಗೆ ಇದು ಅತ್ಯುತ್ತಮ ಆಯ್ಕೆ.  ಬಹುಮಹಡಿ ಬಂಗಲೆಗಳು, ಐಷಾರಾಮಿ ವಿಲ್ಲಾ ಹೊಂದಿರುವವರು ಇದನ್ನು ಅಳವಡಿಸಿಕೊಳ್ಳುತ್ತಾರೆ.

* ಸ್ಫುಟವಾದ ದೃಶ್ಯಕ್ಕೂ ಇದೆ ಅವಕಾಶ: ಎಚ್.ಡಿ. ಗುಣಮಟ್ಟದ ದೃಶ್ಯಗಳನ್ನು ದಾಖಲಿಸಲು ಇಚ್ಚಿಸುವವರು ‘ಹೈ ಡೆಫನಿಷನ್ ಕ್ಯಾಮೆರಾ’ಗಳನ್ನು ಅಳವಡಿಸಬಹುದು. ಈ ಕ್ಯಾಮೆರಾಗಳಲ್ಲಿ ಜೂಮ್ ಮಾಡುವ ಆಯ್ಕೆಯೂ ಲಭ್ಯವಿದ್ದು, ಗುಣಮಟ್ಟದಲ್ಲಿ ಯಾವುದೇ ರಾಜಿಯಾಗದಂತೆ ದೃಶ್ಯಗಳು ದಾಖಲೆಯಾಗುತ್ತವೆ. ಅತ್ಯಂತ ಸೂಕ್ಷ್ಮವಾದ ಸಂಗತಿಗಳನ್ನು ಕ್ಯಾಮೆರಾ ಸೆರೆ ಹಿಡಿಯುತ್ತದೆ. ಒಂದೇ ಕಟ್ಟಡದಲ್ಲಿ ಮನೆ ಮತ್ತು ಕಚೇರಿಯನ್ನು ಹೊಂದಿರುವ ಮಾಲೀಕರು ಇದನ್ನು ಹಾಕಿಸಬಹುದು.

* ಹೆಚ್ಚುವರಿ ಆಯ್ಕೆಗಳು: ವೈಯರ್‌ಲೆಸ್‌ ಸಿಸಿಟಿವ್‌ ಕ್ಯಾಮೆರಾಗಳು ತಂತ್ರಜ್ಞಾನದ ಹೊಸ ಆವಿಷ್ಕಾರ. ವೈಫೈ ಸಂಪರ್ಕದಿಂದ  ಈ ಕ್ಯಾಮೆರಾಗಳು ಕಾರ್ಯನಿರ್ವಹಿಸುತ್ತವೆ. ಮೊಬೈಲ್‌ ಆ್ಯಪ್‌ನ ಮೂಲಕ ಈ ಕ್ಯಾಮೆರಾಗಳನ್ನು ನಿಯಂತ್ರಿಸಬಹುದು.

* ಸ್ವಯಂ ಗುರುತು ಪತ್ತೆಹಚ್ಚುವ ಸಂವೇದಕಗಳು: ಮನೆಯಲ್ಲಿ ಯಾರು ಇಲ್ಲದ ವೇಳೆಯಲ್ಲಿ ಮನೆಗೆ ಹೊರಗಿನವರು ಪ್ರವೇಶಿಸಿದರೆ, ಕ್ಯಾಮೆರಾದಲ್ಲಿರುವ ಸಂವೇದಕಗಳು ಮಾಲೀಕನ ಮೊಬೈಲ್‌ಗೆ ಸಂದೇಶ ರವಾನೆ ಮಾಡುತ್ತದೆ. ಇದು ಸ್ವಲ್ಪ ದುಬಾರಿಯಾಗಿದ್ದರೂ, ನಗರದ ಮಂದಿ ಈ ತಂತ್ರಜ್ಞಾನದ ಅಳವಡಿಕೆಗೆ ಆಸ್ಥೆ ವಹಿಸುತ್ತಿದ್ದಾರೆ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry