ಗುಲಾಬಿ ‘ಸಖಿ’ಯತ್ತ ಅಚ್ಚರಿಯ ನೋಟ

7
ಮಹಿಳೆಯರ ಮತದಾನ ಪ್ರಮಾಣ ಹೆಚ್ಚಳಕ್ಕೆ ವಿಶಿಷ್ಟ ಪ್ರಯೋಗ; ಮತ ಹಾಕಿ ಸಂಭ್ರಮಿಸಿದ ಯುವ ಮತದಾರರು

ಗುಲಾಬಿ ‘ಸಖಿ’ಯತ್ತ ಅಚ್ಚರಿಯ ನೋಟ

Published:
Updated:

ಚಿಕ್ಕಬಳ್ಳಾಪುರ: ಜಿಲ್ಲೆಯ ವಿವಿಧೆಡೆ ಶನಿವಾರ ಮತ ಚಲಾಯಿಸಲು ಬರುತ್ತಿದ್ದ ಮಹಿಳೆಯರ ಪೈಕಿ ಅನೇಕರು ತಮ್ಮ ವ್ಯಾಪ್ತಿಯ ಮತಗಟ್ಟೆಯ ಎದುರು ನಿಂತು ಕೊಂಡೆ ದಾರಿಹೋಕರ ಬಳಿ ಮತಗಟ್ಟೆ ಎಲ್ಲಿದೆ ಎಂದು ವಿಚಾರಿಸುತ್ತಿದ್ದರು.

ಬೆನ್ನ ಹಿಂದೆಯೇ ಇದ್ದ ಮತಗಟ್ಟೆಯತ್ತ ಯಾರಾದರೂ ಕೈ ತೋರಿಸುತ್ತಿದ್ದಂತೆ ಸೋಜಿಗದಿಂದ ಅತ್ತ ಒಳಗೆ ಹೋದವರೆಲ್ಲ ಮತಯಂತ್ರಕ್ಕಿಂತ ಹೆಚ್ಚಾಗಿ ಅಲ್ಲಿ ಎಲ್ಲೆಡೆ ಕಣ್ಣು ಕೋರೈಸುತ್ತಿದ್ದ ಗುಲಾಬಿ ಬಣ್ಣವನ್ನು ಕಣ್ತುಂಬಿಕೊಳ್ಳುತ್ತಿದ್ದರು.

ಇದೇ ಮೊದಲ ಬಾರಿಗೆ ಚುನಾವಣಾ ಆಯೋಗ ಚುನಾವಣೆ ಕರ್ತವ್ಯದಲ್ಲಿ ಮಹಿಳಾ ಸಬಲೀಕರಣಕ್ಕೆ ಒತ್ತು ನೀಡುವ ನಿಟ್ಟಿನಲ್ಲಿ ಪರಿಚಯಿಸಿದ ‘ಸಖಿ’ ಮತಗಟ್ಟೆಗಳ ಬಳಿ ಶನಿವಾರ ಕಂಡ ದೃಶ್ಯಗಳಿವು. ರಾಜ್ಯದಲ್ಲಿಯೇ ಬೆಳಗಾವಿ ಹೊರತುಪಡಿಸಿದರೆ ಚಿಕ್ಕಬಳ್ಳಾಪುರ ಜಿಲ್ಲೆಯಲ್ಲೇ ಅತಿ ಹೆಚ್ಚು ಸಖಿ ಮತಗಟ್ಟೆಗಳನ್ನು ತೆರೆಯಲಾಗಿದೆ ಎನ್ನುತ್ತಾರೆ ಜಿಲ್ಲಾ ಸ್ವಿಪ್ ಸಮಿತಿ ಅಧ್ಯಕ್ಷ ಗುರುದತ್ ಹೆಗಡೆ.

ಸ್ವಾಗತ ಕಮಾನು, ನೆಲ ಹಾಸು, ಬಲೂನ್‌ಗಳಿಂದ ಅಲಂಕೃತ ಕೊಠಡಿ, ಮದುವೆ ಮನೆಯಂತೆ ವರ್ಣ ರಂಜಿತವಾಗಿ ಅಲಂಕೃತಗೊಂಡ ಕೊಣೆ, ಒಂದೇ ಬಗೆಯ ಉಡುಗೆಯಲ್ಲಿ ಮಿಂಚುವ ಮಹಿಳೆಯರು.. ಹೀಗೆ ಸಖಿ ಮತಗಟ್ಟೆಗಳಲ್ಲಿ ಕಣ್ಣು ಹಾಯಿಸಿದೆಡೆ ಗುಲಾಬಿ ರಂಗು ಮನೆ ಮಾಡಿತ್ತು. ಅನೇ ಕರು ಈ ಕೇಂದ್ರಗಳನ್ನು ಯಾವುದೋ ಕಾರ್ಯಕ್ರಮಗಳಿಗೆ ಸಿದ್ಧಪಡಿಸಲಾಗಿದೆ ಎಂದು ಭಾವಿಸಿಕೊಂಡದುಂಟು.

ಜಿಲ್ಲೆಯ ಐದು ವಿಧಾನಸಭೆ ಮತ ಕ್ಷೇತ್ರಗಳಲ್ಲಿ ತಲಾ 6 ರಂತೆ ಜಿಲ್ಲೆಯಲ್ಲಿ 30 ‘ಗುಲಾಬಿ’ ಮತಗಟ್ಟೆಗಳನ್ನು ತೆರೆಯಾಗಿತ್ತು. ಅಲ್ಲಿ ಕರ್ತವ್ಯ ನಿರ್ವಹಿಸಿದ ಮಹಿಳಾ ಸಿಬ್ಬಂದಿ ಎಲ್ಲ ಗುಲಾಬಿ ಬಣ್ಣದ ಸೀರೆ ಉಟ್ಟು, ಅದೇ ಬಣ್ಣದ ಕೈ ಬಳೆ, ಹಣೆಯ ಬಿಂದಿ, ಬರೆಯುತ್ತಿದ್ದ ಪೆನ್ನು, ಕುಡಿಯುವ ನೀರಿನ ಬಾಟಲು ಬಳಸಿದ್ದು ಅನೇಕರಲ್ಲಿ ಸೋಜಿಗ ಮೂಡಿಸಿತು.

ಕೆಲವೆಡೆ ಮತದಾರರು ಮತಗಟ್ಟೆ ಸಿಬ್ಬಂದಿಗೆ ಏನಿದು ವಿಶೇಷ? ಎಂದು ಪ್ರಶ್ನಿಸಿದ್ದು ಸಹ ಉಂಟು. ಸಿಬ್ಬಂದಿಯ ಉತ್ತರ ಕೇಳಿ ಕೆಲವರು ಸಂತಸ ವ್ಯಕ್ತಪಡಿಸಿದರೆ, ಇನ್ನು ಕೆಲವರು ಒಂದು ದಿನದ ಕೆಲಸಕ್ಕಾಗಿ ಇಷ್ಟೊಂದು ಸಡಗರಕ್ಕೆ ವೆಚ್ಚ ಮಾಡುವುದು ಬೇಕಿತ್ತೆ ಎಂದು ಪ್ರಶ್ನಿಸಿದ ಉದಾಹರಣೆಗಳಿವೆ.

ಸಖಿ ಮತಗಟ್ಟೆಗಳಿಗೆ ಬರುತ್ತಿದ್ದ ಯುವ ಮತದಾರರು ಅಲಂಕೃತ ಸ್ವಾಗತ ಕಮಾನು ಎದುರು ನಿಂತು ಮೊಬೈಲ್ ಸೆಲ್ಫಿಗಳನ್ನು ತೆಗೆದುಕೊಂಡು ತಮ್ಮ ಮೊದಲ ಮತದ ನೆನಪನನ್ನು ಅಚ್ಚಳಿಯದೆ ಸ್ಮರಣೀಯವಾಗಿಸಿ ಕೊಂಡರು. ಕೆಲವರು ಗುಂಪಾಗಿ ಸೆಲ್ಫಿಗೆ ಮುಖವೊಡ್ಡುತ್ತಿದ್ದದ್ದು ಗೋಚರಿಸಿತು.

‘ನನಗೆ ಮೊದಲೇ ಗುಲಾಬಿ ಹೂವೆಂದರೆ ತುಂಬಾನೇ ಇಷ್ಟ. ಅದರಲ್ಲೂ ಗುಲಾಬಿ ಬಣ್ಣ ಮತಗಟ್ಟೆ ನೋಡಿದರೆ ಕೇಳಬೇಕೆ? ನಾನಂತೂ ಸಖಿ ಮತಗಟ್ಟೆ ನೋಡಿ ತುಂಬಾ ಸಂತಸಪಟ್ಟೆ. ಒಂದು ರೀತಿಯಲ್ಲಿ ನನಗೆ ಚುನಾವಣೆ ಹಬ್ಬದಂತೆ ಭಾಸವಾಯಿತು. ಮಹಿಳೆಯರನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ಈ ಕ್ರಮಕೈಗೊಳ್ಳಲಾಗಿದೆ ಎನ್ನುವುದು ಕೇಳಿ ಮತ್ತಷ್ಟು ಹೆಮ್ಮೆಯಾಯಿತು’ ಎಂದು ಚಿಕ್ಕಬಳ್ಳಾಪುರದ ಗರ್ಲ್ಸ್ ಸ್ಕೂಲ್ ರಸ್ತೆ ನಿವಾಸಿ ವಾಣಿ ತಿಳಿಸಿದರು.

‘ಸಖಿ ಮತಗಟ್ಟೆಯಲ್ಲಿ ಎಲ್ಲರೂ ಮಹಿಳೆಯರೇ ಇದ್ದ ಕಾರಣ ಅಷ್ಟೊಂದು ಸಂಕೋಚ, ಭಯ ವಾಗಲಿಲ್ಲ. ಎರಡೆರಡು ಬಾರಿ ಹೊಸಯಂತ್ರದಲ್ಲಿ ಮತ ಹೇಗೆ ಚಲಾಯಿಸಬೇಕು ಎಂದು ಅವರಿಂದ ಕೇಳಿ ತಿಳಿದುಕೊಂಡೆ. ನನಗಂತೂ ಆ ಸಿಬ್ಬಂದಿ ಆಶಾ ಕಾರ್ಯಕರ್ತೆರನ್ನು ನೋಡಿದಂತಾಯಿತು. ತುಂಬಾ ಚೆನ್ನಾಗಿ ಈ ಹೊಸ ವ್ಯವಸ್ಥೆ’ ಎಂದು ಶಿಡ್ಲಘಟ್ಟದ ಚಿಂತಾಮಣಿ ರಸ್ತೆಯ ಸರ್ಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ತೆರೆದ ಸಖಿ ಮತಗಟ್ಟೆಗೆ ಬಂದಿ ವನಜಾಕ್ಷಮ್ಮ ಹೇಳಿದರು.

‘ನನಗಂತೂ ಮೊದಲ ಬಾರಿ ಮತ ಚಲಾಯಿಸಿದ ಖುಷಿ ಒಂದೆಡೆಯಾದರೆ, ಇದೇ ಬಾರಿ ಸಖಿ ಮತಗಟ್ಟೆ ತೆರೆದದ್ದು ತುಂಬಾನೇ ಖುಷಿ ಕೊಟ್ಟಿದೆ. ಆ ಮತಗಟ್ಟೆಯಲ್ಲಿ ಬೇರೆಡೆಯಂತೆ ಗದ್ದಲ ಗಲಾಟೆ ಗೋಜಿರಲಿಲ್ಲ. ಮೊದಲ ಬಾರಿ ಮತ ಚಲಾಯಿಸಲು ಹೇಗಪ್ಪಾ ಅಲ್ಲಿರುವವರನ್ನು ಕೇಳುವುದು ಎಂಬ ಭಯ ಬರಲಿಲ್ಲ. ವಾಪಸ್ ಬರುವಾಗ ನಾನು ಸೆಲ್ಫಿ ಮಿಸ್ ಮಾಡಲಿಲ್ಲ’ ಎಂದು ಬಾಗೇಪಲ್ಲಿಯ ಸರ್ಕಾರಿ ಉರ್ದು ಪ್ರೌಢಶಾಲೆಯಲ್ಲಿ ತೆರೆದ ಸಖಿ ಮತಗಟ್ಟೆ ಎದುರು ಮಾತಿಗೆ ಸಿಕ್ಕ ವಿದ್ಯಾರ್ಥಿನಿ ರಕ್ಷಿತಾ ಸಂತಸ ವ್ಯಕ್ತಪಡಿಸಿದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry