ಪಂಜಾಬಿನ ಗಾಯಕ ಸಿಧು ಮೂಸೆವಾಲಾ ಪೋಷಕರಿಗೆ ಗಂಡು ಮಗು

ಬಠಿಂಡಾ: ಎರಡು ವರ್ಷಗಳ ಹಿಂದೆ ಹಂತಕರ ಗುಂಡಿಗೆ ಬಲಿಯಾದ ಪಂಜಾಬಿನ ಗಾಯಕ ಸಿಧು ಮೂಸೆವಾಲಾ (ಶುಭದೀಪ್‌ ಸಿಂಗ್‌ ಸಿಧು) ಅವರ ಪೋಷಕರಿಗೆ ಗಂಡು ಮಗುವಿನ ಜನನವಾಗಿದೆ.

ಮೂಸೆವಾಲಾ ಅವರ ತಂದೆ ಬಲಕೌರ್ ಸಿಂಗ್‌ ಅವರು ತಮ್ಮ ಫೇಸ್‌ಬುಕ್‌ ಪುಟದಲ್ಲಿ ನವಜಾತ ಶಿಶುವಿನ ಜನನವನ್ನು ಘೋಷಿಸಿದ್ದಾರೆ.

‘ಮೂಸೆವಾಲಾನ ಕಿರಿಯ ಸಹೋದರನ ಆಗಮನದಿಂದ ನಾನು ಮತ್ತು ನನ್ನ ಪತ್ನಿ ಚರಣ್‌ ಕೌರ್‌ಗೆ ಸಂತಸವಾಗಿದೆ’ ಎಂದು ಅವರು ತಿಳಿಸಿದ್ದಾರೆ. 

‘ಶುಭದೀಪ್‌ ಅನ್ನು ಪ್ರೀತಿಸುವ ಲಕ್ಷಾಂತರ ಜನರ ಆಶೀರ್ವಾದದ ಜತೆಗೆ, ದೇವರು ನಮಗೆ ಶುಭ್‌ ಅವರ ಚಿಕ್ಕ ಸಹೋದರನೊಂದಿಗೆ ಆಶೀರ್ವಾದ ಮಾಡಿದ್ದಾರೆ’ ಎಂದು ಅವರು ಪೋಸ್ಟ್‌ ಮಾಡಿದ್ದಾರೆ.

ಮೂಲಗಳ ಪ್ರಕಾರ, 60 ವರ್ಷದ ಬಲಕೌರ್ ಮತ್ತು 58 ವರ್ಷದ ಚರಣ್‌ ಕೌರ್‌ ಅವರು ಮಗುವನ್ನು ಪಡೆಯಲು ಐವಿಎಫ್‌ ಚಿಕಿತ್ಸೆ ಪಡೆದಿದ್ದರು.