ಗಂಗಾಪುರ(ರಾಜಸ್ಥಾನ): ಗಂಗಾಪುರ ಜಿಲ್ಲೆಯ ಗುಡ್ಲಾ ಗ್ರಾಮದ ಜಮೀನೊಂದರಲ್ಲಿ ತೋಡಿದ್ದ ಸುಮಾರು 100 ಅಡಿ ಆಳದ ಕೊಳವೆ ಬಾವಿಗೆ 25 ವರ್ಷದ ಮಹಿಳೆಯೊಬ್ಬರು ಬಿದ್ದಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
‘ಗುಡ್ಲಾ ಗ್ರಾಮದ ಮೋನಾ ಬಾಯಿ ಎಂಬುವವರು ಕೊಳವೆ ಬಾವಿಗೆ ಬಿದ್ದಿದ್ದಾರೆ. ಮಂಗಳವಾರ ರಾತ್ರಿ 8 ಗಂಟೆಯ ವೇಳೆ ಮೋನಾ ಬಾಯಿ ಅವರು ಮನೆಯಿಂದ ನಾಪತ್ತೆಯಾಗಿದ್ದರು. ಬುಧವಾರ ಮಧ್ಯಾಹ್ನ ಮಹಿಳೆ ಮನೆಯ ಹಿಂಬದಿಯಲ್ಲಿ ತೋಡಿದ್ದ ಕೊಳವೆ ಬಾವಿಗೆ ಬಿದ್ದಿರುವುದು ತಿಳಿದುಬಂದಿದೆ. ಕೊಳವೆ ಬಾವಿ ಬಳಿ ಮಹಿಳೆಯ ಚಪ್ಪಲಿ ಬಿದ್ದಿರುವುದು ಗಮನಿಸಿದ ಕುಟುಂಬದವರು ತಕ್ಷಣ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ’ ಎಂದು ಬಾಮನ್ವಾಸ ಉಪವಿಭಾಗಾಧಿಕಾರಿ ಅಂಶುಲ್ ಕುಮಾರ್ ತಿಳಿಸಿದ್ದಾರೆ.
‘ಎನ್ಡಿಆರ್ಎಫ್ ತಂಡ ಸ್ಥಳಕ್ಕೆ ಆಗಮಿಸಿದ್ದು, ರಕ್ಷಣಾ ಕಾರ್ಯಾಚರಣೆ ನಡೆಯುತ್ತಿದೆ. ಮಹಿಳೆ ಆಕಸ್ಮಿಕವಾಗಿ ಬಾವಿಗೆ ಬಿದ್ದಿದ್ದಾಳೆಯೇ ಅಥವಾ ಬಾವಿಗೆ ತಳ್ಳಲಾಗಿದೆಯೇ ಎಂಬ ಬಗ್ಗೆ ತನಿಖೆ ನಡೆಸಲಾಗುವುದು’ ಎಂದು ಬಾಮನ್ವಾಸದ ಉಪ ಪೊಲೀಸ್ ವರಿಷ್ಠಾಧಿಕಾರಿ ಸಂತ್ರಾಂ ಹೇಳಿದ್ದಾರೆ.