ನವದೆಹಲಿ(ಪಿಟಿಐ): ಪ್ಲಾಸ್ಟಿಕ್ ನೋಟುಗಳ ಚಲಾವಣೆ ಜನಪ್ರಿಯವಾದಂತೆ ನೋಟು ಮುದ್ರಣಕ್ಕೆ ಬೇಕಿರುವ ಕಾಗದದ ಆಮದು ಮೇಲಿನ ಒತ್ತಡ ಕಡಿಮೆಯಾಗಲಿದೆ ಎಂದು ಕೇಂದ್ರ ಹಣಕಾಸು ಸಚಿವ ಅರುಣ್ ಜೇಟ್ಲಿ ಹೇಳಿದ್ದಾರೆ.
‘ಭಾರತದಲ್ಲಿ ತಯಾರಿಸಿ’ ಅಭಿಯಾನದ ಅಂಗವಾಗಿ ಮಂಗಳವಾರ ನಡೆದ ಸಮಾವೇಶದಲ್ಲಿ ಅವರು ದೇಶದಲ್ಲಿಯೇ ನೋಟು ಮುದ್ರಣಕ್ಕೆ ಬೇಕಿರುವ ಕಾಗದ ತಯಾರಿಕೆ ಕುರಿತು ಮಾತನಾಡಿದರು.
ಹೋಶಂಗಾಬಾದ್ ಮತ್ತು ಮೈಸೂರಿನಲ್ಲಿ ನೋಟುಗಳ ಮುದ್ರಣಕ್ಕೆ ಬಳಸುವ ಕಾಗದ ತಯಾರಿಕಾ ಘಟಕ ಪ್ರಾರಂಭವಾಗುತ್ತಿದೆ. ಇದರ ಜತೆಗೆ, ಪ್ಲಾಸ್ಟಿಕ್ ನೋಟು ಮತ್ತು ಕ್ರೆಡಿಟ್, ಡೆಬಿಟ್ ಕಾರ್ಡ್ ಗಳ ಬಳಕೆಯಿಂದಲೂ ಕಾಗದ ಬಳಕೆ ಮೇಲಿನ ಅವಲಂಬನೆ ಕಡಿಮೆಯಾಗಲಿದೆ ಎಂದರು.
ಕನಿಷ್ಠಪಕ್ಷ ಸ್ವದೇಶಿ ಕಾಗದ ಮತ್ತು ಶಾಯಿ ಬಳಸಿ ನೋಟುಗಳನ್ನು ಮುದ್ರಿಸಬೇಕಿದೆ. ಇದು ಕೇವಲ ಸಾಂಕೇತಿಕವಲ್ಲ. ಬದಲಿಗೆ, ಭಾರತದಲ್ಲಿ ತಯಾರಿಸಿ ಎಂಬುದರ ನಿರ್ದಿಷ್ಟ ಆಲೋಚನಾ ಪ್ರಕ್ರಿಯೆಯ ಪ್ರತಿಬಿಂಬ ಎಂದರು.
ಸಾಂಪ್ರದಾಯಿಕ ವಿಧಾನದ ಬದಲಿಗೆ, ಅಭಿವೃದ್ಧಿಗೆ ಪೂರಕವಾದ ತಂತ್ರಜ್ಞಾನ ಅಳವಡಿಸಿಕೊಂಡು ಭವಿಷ್ಯದಲ್ಲಿ ಉದ್ಯೋಗ ಸೃಷ್ಟಿಗೆ ಮುಂದಾಗುವ ಅಗತ್ಯವಿದೆ ಎಂದರು.
