ಮಿಶ್ರಾ ಹತ್ಯೆ: ನಾಲ್ವರಿಗೆ ಜೀವಾವಧಿ ಶಿಕ್ಷೆ

ನವದೆಹಲಿ (ಪಿಟಿಐ): ಬಿಹಾರದ ಸಮ­ಷ್ಟಿ­ಪುರ ರೈಲು ನಿಲ್ದಾಣ­ದಲ್ಲಿ 40 ವರ್ಷ­ಗಳ ಹಿಂದೆ ಆಗಿನ ರೈಲ್ವೆ ಸಚಿವ ಲಲಿತ್ ನಾರಾಯಣ ಮಿಶ್ರಾ ಮತ್ತು ಇನ್ನಿಬ್ಬ­ರನ್ನು ಬಾಂಬ್ ಸ್ಫೋಟಿಸಿ ಹತ್ಯೆ ಮಾಡಿದ್ದ ನಾಲ್ವರು ಅಪ­ರಾಧಿ­ಗಳಿಗೆ  ಇಲ್ಲಿನ ನ್ಯಾಯಾಲಯವು ಜೀವಾವಧಿ ಶಿಕ್ಷೆ ವಿಧಿಸಿದೆ.

ರಂಜನ್ ದ್ವಿವೇದಿ (66), ಸಂತೋಷಾನಂದ್ (75)­,­ ಸುದೇವಾನಂದ್‌ (75) ಮತ್ತು ಗೋಪಾಲಜಿ (73) ವಿರುದ್ಧ  ಹತ್ಯೆ, ಮಾರಕ ಅಸ್ತ್ರಗಳಿಂದ ಗಂಭೀರ ಸ್ವರೂ­ಪದ ಗಾಯ, ಕ್ರಿಮಿನಲ್ ಸಂಚು ಆಪಾದನೆಗಾಗಿ ಐಪಿಸಿಯ ವಿವಿಧ ಕಲಂಗಳಡಿಯಲ್ಲಿ ಪ್ರಕರಣ ದಾಖ­ಲಿಸ­ಲಾಗಿತ್ತು. ಜಿಲ್ಲಾ ನ್ಯಾಯಾಧೀಶ ವಿನೋದ್ ಗೋಯಲ್ ಕಿಕ್ಕಿರಿದ ನ್ಯಾಯಾಲಯದಲ್ಲಿ ನಾಲ್ವ­ರಿಗೆ ಜೀವಾವಧಿ ಶಿಕ್ಷೆ ವಿಧಿಸಿರುವ ತೀರ್ಪು ಪ್ರಕಟಿಸಿದರು.

ಜೀವಾವಧಿ ಜೈಲು ಶಿಕ್ಷೆಯಲ್ಲದೆ ಸಂತೋಷಾನಂದ್ ಮತ್ತು ಸುದೇವಾಂದ್‌ಗೆ ತಲಾ ₨25 ಸಾವಿರಗಳ ದಂಡ ಹಾಗೂ ದ್ವಿವೇದಿ ಮತ್ತು ಗೋಪಾಲಜಿಗೆ ತಲಾ ₨20 ಸಾವಿರಗಳ ದಂಡ ವಿಧಿಸಲಾಗಿದೆ.

ಮಿಶ್ರಾ ಮತ್ತು ಇನ್ನಿಬ್ಬರು ಕಾನೂನು ಬದ್ಧ ಉತ್ತರಾಧಿಕಾರಿಗಳಿಗೆ ತಲಾ ₨5 ಲಕ್ಷಗಳ ಪರಿಹಾರ ನೀಡು­ವಂತೆ ನ್ಯಾಯಾಧೀಶರು ಬಿಹಾರ ಸರ್ಕಾರಕ್ಕೆ ಆದೇಶಿಸಿದ್ದಾರೆ.

ಬಾಂಬ್ ಸ್ಫೋಟದ ಸಂದರ್ಭದಲ್ಲಿ ಗಂಭೀರ­ವಾಗಿ ಗಾಯಗೊಂಡಿದ್ದ ಏಳು ಮಂದಿಯ ಕುಟುಂ­ಬಕ್ಕೆ ತಲಾ ₨1.5 ಲಕ್ಷ ಮತ್ತು ಸಾಧಾರಣ ಗಾಯ­­ಗೊಂಡಿದ್ದ 20 ಜನರ ಕುಟುಂಬಕ್ಕೆ ತಲಾ ₨50 ಸಾವಿರ­ಗಳ ಪರಿಹಾರವನ್ನು ಕಾನೂನು ಸೇವೆಗಳ ವಿಭಾ­ಗದ ಮೂಲಕ ವಿತರಿಸಬೇಕೆಂದು ಆದೇಶಿಸ­ಲಾಗಿದೆ.