ನಿವೇಶನ, ಮನೆ, ಜಮೀನು ಖರೀದಿಸುವ ಮುನ್ನ ಸಾಮಾನ್ಯವಾಗಿ ನೋಂದಣಿ ಪತ್ರ, ಇತರ ದಾಖಲೆ ಜತೆಗೆ ಪ್ರಮುಖವಾಗಿ ಋಣಭಾರ ಪ್ರಮಾಣಪತ್ರ (ಇ.ಸಿ)ವನ್ನು ಜನರು ಪರಿಶೀಲಿಸುತ್ತಾರೆ. ಈ ಪತ್ರದಲ್ಲಿ ಏನಾದರೂ ಸಮಸ್ಯೆಗಳು ಇವೆಯೆ? ಎಂಬುದನ್ನು ಖಚಿತಪಡಿಸಿಕೊಂಡ ನಂತರ ಖರೀದಿಗೆ ಮುಂದಾಗುತ್ತಾರೆ. ಹಾಗಾಗಿ ಇ.ಸಿ.ಯಲ್ಲಿ ಬಾಕಿ ಇರುವ ಶುಲ್ಕ, ತಪ್ಪು ಮಾಹಿತಿಯ ವಿವರಗಳನ್ನು ನಮೂದಿಸಿ ಮುಂದಿನ ದಿನಗಳಲ್ಲಿ ವಸೂಲಿಗೆ ಅಧಿಕಾರಿಗಳು ಮುಂದಾಗಿದ್ದಾರೆ. ಆಸ್ತಿ ನೋಂದಣಿಯ ನಂತರ ಪ್ರತಿಯೊಂದನ್ನೂ ಅಧಿಕಾರಿಗಳು ಪರಿಶೀಲಿಸಲಿದ್ದು, ಶುಲ್ಕ ವಂಚನೆ ಪತ್ತೆ ಮಾಡುತ್ತಾರೆ. ವಂಚಿಸಿರುವುದು ಪತ್ತೆಯಾದರೆ ಬಾಕಿ ಇರುವ ಶುಲ್ಕದ ವಿವರಗಳನ್ನು ಇ.ಸಿಯಲ್ಲಿ ನಮೂದಿಸಲಿದ್ದು, ಈ ಬಾಕಿ ಪಾವತಿಸಿದ ನಂತರವೇ ದಾಖಲೆಯಿಂದ ತೆಗೆದುಹಾಕಲಾಗುತ್ತದೆ.