ರಾಜ್ಯದ ಉದ್ಯಾನ ಮತ್ತು ಶಿಬಿರಗಳಲ್ಲಿರುವ ಆನೆಗಳಲ್ಲಿಯೇ ಅತ್ಯಂತ ಹಿರಿಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಗಾಯತ್ರಿ ಹೆಸರಿ ಹೆಣ್ಣಾನೆ ಬನ್ನೇರುಘಟ್ಟ ಜೈವಿಕ ಉದ್ಯಾನದಲ್ಲಿ ಜೀವನದ ಮುಸ್ಸಂಜೆ ಕಳೆಯುತ್ತಿದೆ. ವಯೋಸಹಜ ಕಾಯಿಲೆಗಳು ಗಾಯತ್ರಿಯನ್ನು ಕಾಡುತ್ತಿವೆ. 87 ವರ್ಷದ ಈಕೆಗೆ ನಾಲ್ಕು ವರ್ಷದಿಂದ ಕಣ್ಣು ಕಾಣಿಸುತ್ತಿಲ್ಲ, ಕಿವಿ ಕೇಳಿಸುತ್ತಿಲ್ಲ ಹಲ್ಲುಗಳೂ ಇಲ್ಲ. ಜೊತೆಗಿರುವ ಆನೆಗಳೇ ಈ ಹಿರಿಯ ಜೀವದ ಅನುಗಾಲದ ಮಿತ್ರರು ಸದಾ ಕಾಲ ಗಾಯತ್ರಿಯ ಕಣ್ಣು ಮತ್ತು ಕಿವಿಯಾಗಿರುತ್ತವೆ.
