ಮೈಸೂರು: ಕಾಂಗ್ರೆಸ್ ಮತ್ತು ಜೆಡಿಎಸ್ ಮೈತ್ರಿ ಮಾಡಿಕೊಂಡು ಮೈಸೂರು ಮಹಾನಗರ ಪಾಲಿಕೆಯಲ್ಲಿ ಅಧಿಕಾರಕ್ಕೇರಿದೆ. ಕಾಂಗ್ರೆಸ್ನ ಪುಷ್ಪಲತಾ ಜಗನ್ನಾಥ್ ಅವರು ಮೇಯರ್ ಆಗಿಯೂ, ಜೆಡಿಎಸ್ನ ಶಫೀ ಅಹಮದ್ ಉಪಮೇಯರ್ ಆಗಿಯೂ ಆಯ್ಕೆಯಾದರು.
ಮೇಯರ್ ಸ್ಥಾನಕ್ಕೆ ನಾಮಪತ್ರ ಸಲ್ಲಿಸಿದ್ದ 11ನೇ ವಾರ್ಡ್ನ ಪುಷ್ಪಲತಾ ಅವರು 48 ಸದಸ್ಯರ ಬೆಂಬಲ ಪಡೆದರು. 59ನೇ ವಾರ್ಡ್ನ ಸದಸ್ಯೆ ಬಿಜೆಪಿಯ ಸುನಂದಾ ಪಾಲನೇತ್ರ 24 ಮತಗಳನ್ನು ಪಡೆದರು.
ಕಾಂಗ್ರೆಸ್ನ 19, ಜೆಡಿಎಸ್ನ 18, ಬಿಎಸ್ಪಿಯ 1, ಪಕ್ಷೇತರ 4 ಸದಸ್ಯರಲ್ಲದೆ, ಇಬ್ಬರು ಶಾಸಕರು ಮತ್ತು 4 ವಿಧಾನ ಪರಿಷತ್ ಸದಸ್ಯರ ಬೆಂಬಲವನ್ನು ಪುಷ್ಪಲತಾ ಪಡೆದರು.
31 ನೇ ವಾರ್ಡ್ನ ಸದಸ್ಯ ಶಫೀ ಅವರು 48ಸದಸ್ಯರ ಬೆಂಬಲ ಪಡೆದು ಆಯ್ಕೆಯಾದರೆ, ಬಿಜೆಪಿಯ ಎಂ.ಸತೀಶ್ 24 ಮತಗಳನ್ನು ಪಡೆದರು.
ಒಪ್ಪಂದ ಸೂತ್ರ: ಒಪ್ಪಂದದ ಪ್ರಕಾರ ಪಾಲಿಕೆಯಲ್ಲಿಮೊದಲ ಹಾಗೂ ಮೂರನೇ ಅವಧಿಗೆ ಕಾಂಗ್ರೆಸ್, ಎರಡನೇ, ನಾಲ್ಕನೇ ಹಾಗೂ ಐದನೇ ಅವಧಿಗೆ ಜೆಡಿಎಸ್ ಪಕ್ಷದವರು ಮೇಯರ್ ಆಗಲಿದ್ದಾರೆ.
ಐದು ವರ್ಷಗಳ ಬಳಿಕ ಪಾಲಿಕೆಯಲ್ಲಿ ಕಾಂಗ್ರೆಸ್ಗೆ ಮೇಯರ್ ಸ್ಥಾನ ದೊರೆತಿದೆ. ಕಳೆದ ಅವಧಿಯಲ್ಲಿ ಜೆಡಿಎಸ್- ಬಿಜೆಪಿ ಜತೆಯಾಗಿ ಅಧಿಕಾರ ನಡೆಸಿದ್ದವು. ಐದೂ ವರ್ಷ ಮೇಯರ್ಪಟ್ಟವನ್ನು ಜೆಡಿಎಸ್ ತನ್ನದಾಗಿಸಿಕೊಂಡಿತ್ತು.