ಮಸೀದಿ, ಬಸದಿಗಳಿಗೆ ದುಬಾರಿ ಬೆಲೆಯ ವಾಟರ್‌ ಫಿಲ್ಟರ್‌ !

‘ಮುಖ್ಯಮಂತ್ರಿಯವರ ಅಲ್ಪಸಂಖ್ಯಾತರ ಅಭಿವೃದ್ಧಿ ಯೋಜನೆ’ಯಡಿ2019 ರಲ್ಲಿ ಒಟ್ಟು 5,200 ಫಿಲ್ಟರ್‌ಗಳನ್ನು ಖರೀದಿಸಲು ಇಲಾಖೆ ನಿರ್ಧರಿಸಿತ್ತು. ಪ್ರತಿ ಜಿಲ್ಲೆಗೆ ₹1ಕೋಟಿ ಮೀರದಂತೆ ಆಯಾ ಜಿಲ್ಲೆಗಳ ಬೇಡಿಕೆಗೆ ಅನುಗುಣವಾಗಿ ಖರೀದಿಸುವಂತೆ ಆದೇಶ ಹೊರಡಿಸಲಾಗಿತ್ತು.

ಕಿಯೋನಿಕ್ಸ್ ಸಂಸ್ಥೆಯ ಮೂಲಕ ಈ ಯೋಜನೆ ಅನುಷ್ಠಾನಗೊಳಿಸಲು ಅಲ್ಪಸಂಖ್ಯಾತರ ಕಲ್ಯಾಣ ನಿರ್ದೇಶನಾಲಯ 2019 ರ ಏಪ್ರಿಲ್‌ 31( ಅಧಿಸೂಚನೆ ಸಂಖ್ಯೆ ಎಂಡಬ್ಲ್ಯೂಡಿ 160 ಎಂಡಿಎಸ್‌ 2019 ) ಆದೇಶ ಹೊರಡಿಸಿತ್ತು. ಫಿಲ್ಟರ್‌ಗಳ ಖರೀದಿಗಾಗಿ ₹25 ಕೋಟಿ ಅನುದಾನ ನಿಗದಿಪಡಿಸಲಾಗಿತ್ತು. ಕಿಯೋನಿಕ್ಸ್‌ ಸಂಸ್ಥೆಯು ಪ್ರತಿ ಒಂದು ಫಿಲ್ಟರ್‌ಗೆ ₹1,49,919 (ಜಿ.ಎಸ್‌.ಟಿ ಮತ್ತು ಸಾಗಾಣಿಕೆ ವೆಚ್ಚ ಸೇರಿ) ದರ ನಿಗದಿ ಮಾಡಿರುವುದು ಆರ್‌ಟಿಐ ಮಾಹಿತಿಯಿಂದ ಗೊತ್ತಾಗಿದೆ. ಆರ್‌ಟಿಐ ಕಾರ್ಯಕರ್ತರೊಬ್ಬರು ಈ ಮಾಹಿತಿ ಪಡೆದಿದ್ದು, ಅದರ ಪ್ರತಿ ‘ಪ್ರಜಾವಾಣಿ’ಗೆ ಲಭ್ಯವಾಗಿದೆ.

ಆದರೆ, ಮಾರುಕಟ್ಟೆಯಲ್ಲಿ ಲಭ್ಯವಿರುವ ಪ್ರತಿಷ್ಠಿತ ಕಂಪನಿಗಳ ಸ್ಟೈನ್‌ಲೆಸ್‌ ಸ್ಟೀಲ್‌ ವಾಟರ್‌ ಫಿಲ್ಟರ್‌ ಮತ್ತು ಕೂಲರ್‌ಗಳ ಬೆಲೆ ಗರಿಷ್ಠ ಬೆಲೆ ₹30 ಸಾವಿರದಿಂದ ₹ 50 ಸಾವಿರವರೆಗೆ ಇದೆ. ಇಲ್ಲಿ ₹1.49 ಲಕ್ಷ ಬಿಲ್‌ ಮಾಡಲಾಗಿದೆ. ಇಷ್ಟೊಂದು ದುಬಾರಿ ಬೆಲೆಯಲ್ಲಿ ಖರೀದಿ ಮಾಡುವ ಅಗತ್ಯವೇನಿತ್ತು ಎಂದು ಆರ್‌ಟಿಐ ಕಾರ್ಯಕರ್ತ ಪ್ರಶ್ನಿಸಿದ್ದಾರೆ.

ಈ ಕುರಿತು ಪ್ರತಿಕ್ರಿಯಿಸಿರುವಬಿಜೆಪಿ ನಾಯಕ ಹಾಗೂ ರಾಜ್ಯ ಅಲ್ಪಸಂಖ್ಯಾತರ ಆಯೋಗದ ಮಾಜಿ ಅಧ್ಯಕ್ಷ ಅನ್ವರ್ ಮಾಣಿಪ್ಪಾಡಿ, ‘ಅಲ್ಪಸಂಖ್ಯಾತರ ಕಲ್ಯಾಣ ನಿರ್ದೇಶನಾಲಯ ಕಿಯೋನಿಕ್ಸ್‌ಗೆ ಪ್ರೆಸ್ಟೀಜ್ ಎಂಟರ್‌ಪ್ರೈಸಸ್‌ ಮೂಲಕ ವಾಟರ್‌ ಫಿಲ್ಟರ್‌ಗಳನ್ನು ಖರೀದಿಸಿದೆ. ಆ ಕಂಪನಿಯ ಮ್ಯಾನೇಜರ್ ಅವರು ಪ್ರತಿಯೊಂದು ಯುನಿಟ್‌ಗೆ ₹39 ಸಾವಿರದಂತೆ ಮಾರಾಟ ಮಾಡಿರುವುದಾಗಿ ಹೇಳಿಕೆ ನೀಡಿರುವ ಆಡಿಯೋ ದಾಖಲೆ ಇದೆ. ಈವರೆಗೆ ಒಟ್ಟು 1,603 ವಾಟರ್‌ ಫಿಲ್ಟರ್‌ಗಳಿಗೆ ₹24.03 ಕೋಟಿ ಪಾವತಿ ಮಾಡಲಾಗಿದೆ. ಒಂದು ಫಿಲ್ಟರ್‌ಗೆ ₹39 ಸಾವಿರ ಪಾವತಿ ಮಾಡಿದ್ದರೆ ₹6.25 ಕೋಟಿ ಆಗುತ್ತಿತ್ತು. ₹17.78 ಕೋಟಿ ವ್ಯತ್ಯಾಸ ಕಂಡು ಬಂದಿದೆ. ಈ ಹಣ ಯಾವ ಅಧಿಕಾರಿಯ ಜೇಬಿಗೆ ಹೋಗಿದೆ’ ಎಂದು ಪ್ರಶ್ನಿಸಿದ್ದಾರೆ.

‘ಖರೀದಿಯಲ್ಲಿ ಕರ್ನಾಟಕ ಪಾರದರ್ಶಕ ಕಾಯ್ದೆಯ ಉಲ್ಲಂಘನೆಯೂ ಆಗಿದೆ. ಪಾರದರ್ಶಕ ಕಾಯ್ದೆಯ 1999 ರ ಕಲಂ 4 (ಜಿ)ರಡಿ ಕಿಯೋನಿಕ್ಸ್‌ಗೆ ₹1ಕೋಟಿವರೆಗೆ ಮಾತ್ರ ಖರ್ಚು ಮಾಡುವ ಅಧಿಕಾರ ಇದೆ. ಆದರೆ, ಈ ಪ್ರಕರಣದಲ್ಲಿ ಪಾರದರ್ಶಕ ಕಾಯ್ದೆಯಿಂದ ವಿನಾಯಿತಿ ನೀಡಲಾಗಿದೆ. ಇದರ ಉದ್ದೇಶವೇನು? ಇದಕ್ಕೆಲ್ಲ ಇಲಾಖೆ ಕಾರ್ಯದರ್ಶಿ ಎ.ಬಿ.ಇಬ್ರಾಹಿಂ ಅವರೇ ನೇರ ಕಾರಣ. ಈ ಖರೀದಿಯ ಬಗ್ಗೆ ತನಿಖೆ ಆಗಬೇಕು’ ಎಂದು ಮಾಣಿಪ್ಪಾಡಿ ಆರೋಪಿಸಿದ್ದಾರೆ.