ಅಂಕಾರಾ: ಟರ್ಕಿಯಲ್ಲಿ ಸಂಭವಿಸಿರುವ ಭೀಕರ ಭೂಕಂಪದಿಂದ ಅವಶೇಷಗಳಡಿ ಸಿಲುಕಿದ್ದ ಮೂವರು 8 ದಿನಗಳ ನಂತರ ಬದುಕಿ ಬಂದಿರುವ ಪವಾಡಸದೃಶ ರೀತಿಯ ಘಟನೆ ನಡೆದಿದೆ.
ಮೊಹಮ್ಮದ್ ಏನಿನಾರ್ (17) ಬಕಿ ಏನಿನಾರ್ (16) ಎಂಬ ಇಬ್ಬರು ಸಹೋದರರು ಹಾಗೂ ಮೊಹಮ್ಮದ್ ಕಾಫೀರ್ ಸೆಟೆನ್ (18) ಎಂಬವರು ಭೂಕಂಪದ ಅವಶೇಷಗಳಡಿ ಸಿಲುಕಿದ 198 ಗಂಟೆಗಳ ನಂತರವೂ ಬದುಕಿ ಬಂದಿದ್ದಾರೆ. ಟರ್ಕಿ ಸೇನೆಯ ಪರಿಹಾರ ಕಾರ್ಯಾಚರಣೆ ತಂಡ ಅವರನ್ನು ರಕ್ಷಿಸಿದೆ.
ಭಾರೀ ಭೂಕಂಪ ಸಂಭವಿಸಿರುವ ಕಹ್ರಾಮನ್ಮ್ಮಾರಸ್ ಎಂಬಲ್ಲಿ ಈ ಘಟನೆ ನಡೆದಿದೆ. ಫೆಬ್ರವರಿ 6 ರಂದು ಟರ್ಕಿ, ಸಿರಿಯಾದಲ್ಲಿ ಎರಡು ಪ್ರಬಲ ಭೂಕಂಪನ ಸಂಭವಿಸಿತ್ತು.
ಭೂಕಂಪದ ಸಂತ್ರಸ್ತರ ಆಕ್ರಂದನ ಟರ್ಕಿ ಮತ್ತು ಸಿರಿಯಾದಲ್ಲಿ ಮುಗಿಲು ಮುಟ್ಟಿದೆ. ಸುಮಾರು 80 ಸಾವಿರ ಗಾಯಾಳುಗಳನ್ನು ಅಂಕಾರಾ ಮತ್ತು ಇಸ್ತಾಂಬುಲ್ ಆಸ್ಪತ್ರೆಗಳಿಗೆ ದಾಖಲಿಸಲಾಗಿದೆ.
ಭೂಕಂಪದಿಂದ ಇದುವರೆಗೆ ಟರ್ಕಿ ಮತ್ತು ಸಿರಿಯಾದಲ್ಲಿ 31,643 ಜನ ಮೃತಪಟ್ಟಿದ್ದಾರೆ. 1.3 ಕೋಟಿ ಜನ ನಿರಾಶ್ರಿತರಾಗಿದ್ದಾರೆ.