ಮೋದಿಗೆ ಮತ್ತಷ್ಟು ಬಲ: ಇನ್ನು ಬರಲಿ ಸುದಿನ

ಆಡಳಿತಾರೂಢ ಬಿಜೆಪಿ, ದೇಶದ ಜನರ ಮನದಿಂಗಿತವನ್ನು ಸರಿಯಾಗಿ ಅರ್ಥ ಮಾಡಿಕೊಂಡಿದೆ. ಅದಕ್ಕೆ ತಕ್ಕಂತೆ ಚುನಾವಣೆಯ ತಂತ್ರಗಳನ್ನು ಹೆಣೆಯುತ್ತಿದೆ. ಬಿಜೆಪಿಯ ತಂತ್ರ ಈ ಬಾರಿಯೂ ಫಲ ನೀಡಿದೆ. ಅಚ್ಛೇದಿನ್, ಉದ್ಯೋಗ ಸೃಷ್ಟಿ, ಬಡತನ ನಿವಾರಣೆಯಂತಹ ಭರವಸೆಗಳನ್ನು ಬದಿಗಿಟ್ಟು ಈ ಬಾರಿ ಅದು ಹೊಸ ದಾರಿಯನ್ನೇ ಹಿಡಿಯಿತು. ಯುದ್ಧೋನ್ಮಾದದ ವಾತಾವರಣವನ್ನು ಸೃಷ್ಟಿಸಿತು. ಬಾಲಾಕೋಟ್ ಮತ್ತು ಪುಲ್ವಾಮಾ ಪ್ರಕರಣಗಳನ್ನು ಅತ್ಯಂತ ಚಾಕಚಕ್ಯತೆಯಿಂದ ಬಳಸಿಕೊಂಡಿತು. ಜನರ ಭಾವುಕತೆಯನ್ನು ಮತವನ್ನಾಗಿ ಪರಿವರ್ತಿಸುವ ಯಾವುದೇ ಅವಕಾಶವನ್ನೂ ಬಿಜೆಪಿ ಬಿಟ್ಟುಕೊಡಲಿಲ್ಲ. ಕಾರ್ಯಕರ್ತರ ಜೊತೆಗೂಡಿ ಸಂಘಟಿತ ಹೋರಾಟವನ್ನೂ ಎನ್‌ಡಿಎ ನಡೆಸಿತು. ಇವೆಲ್ಲವೂ ವಿಜಯದ ಮೆಟ್ಟಿಲುಗಳಾದವು. ಆದರೆ ಇಂತಹ ಸಂಘಟಿತ ಯತ್ನವು ವಿರೋಧ ಪಕ್ಷಗಳಿಂದ ನಡೆಯಲಿಲ್ಲ. ಉತ್ತರ ಪ್ರದೇಶದಲ್ಲಿ ಮಹಾಘಟಬಂಧನ್ ರಚನೆಯಾದರೂ ಅದು ನಾಯಕರ ನಡುವಿನ ಮೈತ್ರಿಯಾಯಿತೇ ವಿನಾ ಕಾರ್ಯಕರ್ತರ ಮಟ್ಟಕ್ಕೆ ಇಳಿಯಲಿಲ್ಲ. ಕರ್ನಾಟಕದಲ್ಲಿಯೂ ಹೀಗೆಯೇ ಆಯಿತು. ಅದರ ಸಂಪೂರ್ಣ ಲಾಭ ಬಿಜೆಪಿಗೆ ದೊರೆಯಿತು. ಉತ್ತರ ಪ್ರದೇಶದಲ್ಲಿ ಕೆಲವು ಸ್ಥಾನಗಳು ಕೈತಪ್ಪಬಹುದು ಎಂದು ಮೊದಲೇ ನಿರೀಕ್ಷಿಸಿದ್ದ ಬಿಜೆಪಿ, ಆ ಸ್ಥಾನಗಳನ್ನು ತುಂಬಿಕೊಳ್ಳಲು ಪಶ್ಚಿಮ ಬಂಗಾಳ, ಈಶಾನ್ಯ ರಾಜ್ಯಗಳಲ್ಲಿ ತಂತ್ರಗಾರಿಕೆ ಆರಂಭಿಸಿತು. ಅದು ಫಲ ನೀಡಿದೆ. ಉತ್ತರ ಪ್ರದೇಶದಲ್ಲಿ ಕೂಡ ಹೆಚ್ಚಿನ ನಷ್ಟವಾಗಲಿಲ್ಲ. ಅದರಿಂದಾಗಿಯೇ ಬಿಜೆಪಿ ಕಳೆದ ಬಾರಿಗಿಂತಲೂ ಹೆಚ್ಚಿನ ಸ್ಥಾನ ಗಳಿಸಲು ಸಾಧ್ಯವಾಯಿತು. ಕೇಂದ್ರದಲ್ಲಿ ಈಗ ಯಾರು ಸರ್ಕಾರ ರಚಿಸುತ್ತಾರೆ ಎನ್ನುವ ಗೊಂದಲವಿಲ್ಲ. ಮೋದಿ ಅವರಿಗೆ ಎದುರಾಳಿಗಳೂ ಇಲ್ಲ. ಮುಂದಿನ ಐದು ವರ್ಷ ಬಿಜೆಪಿ ನೇತೃತ್ವದ ಸರ್ಕಾರ ದೇಶದ ಜನರ ಕಲ್ಯಾಣದತ್ತಲೇ ಚಿಂತಿಸುವ ಅಗತ್ಯ ಇದೆ. ಕುಸಿಯುತ್ತಿರುವ ಆರ್ಥಿಕ ಪರಿಸ್ಥಿತಿ, ಬೆಳೆಯುತ್ತಿರುವ ನಿರುದ್ಯೋಗ, ಗ್ರಾಮೀಣ ಪ್ರದೇಶಗಳಿಂದ ನಗರಗಳಿಗೆ ವಲಸೆ, ರೈತರ ಆತ್ಮಹತ್ಯೆ, ಕೈಗಾರಿಕೆಗಳ ಅವನತಿ ಹಾಗೂ ಇತರ ಜ್ವಲಂತ ಸಮಸ್ಯೆಗಳ ನಿವಾರಣೆಗೆ ಶ್ರಮಿಸಬೇಕಾಗಿದೆ. ಕಳೆದ ಬಾರಿ ನೀಡಿದ್ದ ಹಲವಾರು ಭರವಸೆಗಳು ಈಡೇರಿಲ್ಲ. ಅವುಗಳನ್ನೂ ಈಗ ಈಡೇರಿಸಬೇಕಾಗಿದೆ. ಸತತ ಗೆಲುವಿನಿಂದ ಮೈಮರೆತರೆ ಈಗ ಗೆಲ್ಲಿಸಿದ ಜನರೇ ಮುಂದೆ ಸೋಲಿನ ರುಚಿಯನ್ನೂ ತೋರಿಸುತ್ತಾರೆ.