ಡೆಂಗಿ, ಚಿಕೂನ್‌ಗುನ್ಯಾ ಹಾವಳಿ ನಿಯಂತ್ರಣಕ್ಕೆ ಬೇಕು ಇಚ್ಛಾಶಕ್ತಿ

ರಾಜಧಾನಿ ಬೆಂಗಳೂರು ಸೇರಿದಂತೆ ರಾಜ್ಯದ ವಿವಿಧ ಭಾಗಗಳಲ್ಲಿ ಡೆಂಗಿ, ಚಿಕೂನ್‌ಗುನ್ಯಾ ಕಾಯಿಲೆಯಿಂದ ಬಳಲುತ್ತಿರುವವರ ಸಂಖ್ಯೆ ಗಣನೀಯವಾಗಿ ವರದಿಯಾಗುತ್ತಿರುವುದು ಗಾಬರಿ ಮೂಡಿಸುವ ವಿದ್ಯಮಾನವಾಗಿದೆ. ಮಳೆಗಾಲ ಆರಂಭಗೊಳ್ಳುತ್ತಿದ್ದಂತೆ ಸೊಳ್ಳೆಗಳ ಸಂತತಿ ಹೆಚ್ಚಾಗಿ ಈ ಎರಡೂ ಕಾಯಿಲೆಗಳ ಹಾವಳಿಯೂ ಎಲ್ಲೆಡೆ ಹೆಚ್ಚುತ್ತಿರುವುದು ಇತ್ತೀಚೆಗೆ ಸಾಮಾನ್ಯವಾಗಿಬಿಟ್ಟಿದೆ. ಇಡೀ ದೇಶವನ್ನೇ ಕಾಡುವ ಗಂಭೀರ ಸ್ವರೂಪದ ಆರೋಗ್ಯ ಸಮಸ್ಯೆಯೂ ಇದಾಗಿದೆ. ಹಳ್ಳಿಯಿಂದ ದೆಹಲಿವರೆಗೂ ಇವುಗಳ ಕುಖ್ಯಾತಿ ಹಬ್ಬಿದೆ. ವಿಶ್ವ ಆರೋಗ್ಯ ಸಂಘಟನೆ ಪ್ರಕಾರ, ಇತ್ತೀಚಿನ ದಶಕಗಳಲ್ಲಿ ವಿಶ್ವದಾದ್ಯಂತ ಡೆಂಗಿ ಹಾವಳಿ ಏರುಗತಿಯಲ್ಲಿ ಇದೆ.

ಜಾಗತಿಕ ಜನಸಂಖ್ಯೆಯ ಅರ್ಧದಷ್ಟು ಜನರು ಡೆಂಗಿ ಸಂಪರ್ಕಕ್ಕೆ ಬರುವ ಸಾಧ್ಯತೆ ಹೆಚ್ಚಿದೆ. ಆರೋಗ್ಯ ಇಲಾಖೆಯ ಅಂಕಿ ಅಂಶಗಳ ಪ್ರಕಾರವೇ, ರಾಜ್ಯದಲ್ಲಿ ವರದಿಯಾಗಿರುವ 21,806 ಶಂಕಿತ ಡೆಂಗಿ ರೋಗಿಗಳ ಪೈಕಿ, ಮೂರು ಸಾವಿರಕ್ಕೂ ಹೆಚ್ಚು ಜನರಲ್ಲಿ ಡೆಂಗಿ ಪತ್ತೆಯಾಗಿದೆ. 8,151 ಶಂಕಿತ ಚಿಕೂನ್‌ಗುನ್ಯಾ ಪೀಡಿತರಲ್ಲಿ 706 ಮಂದಿ ಬಾಧಿತರಾಗಿರುವುದು ಖಚಿತಪಟ್ಟಿದೆ. ಇವೆಲ್ಲ ಮೇಲ್ನೋಟಕ್ಕೆ ಕಾಣುವ ಸರ್ಕಾರಿ ಅಂಕಿ ಅಂಶಗಳು. ಖಾಸಗಿ ಆಸ್ಪತ್ರೆಗೆ ದಾಖಲಾಗುವ– ದಾಖಲಾಗದ ಪ್ರಕರಣಗಳನ್ನೂ ಗಣನೆಗೆ ತೆಗೆದುಕೊಂಡರೆ ಪೀಡಿತರ ಸಂಖ್ಯೆ ಇನ್ನೂ ಹೆಚ್ಚಾಗಬಹುದು. ಡೆಂಗಿ ಪೀಡಿತರಲ್ಲಿ ಬಿಳಿ ರಕ್ತ ಕಣಗಳ ಸಂಖ್ಯೆ (ಪ್ಲೇಟ್ಲೆಟ್‌ಗಳು) ಗಣನೀಯವಾಗಿ ಕಡಿಮೆಯಾಗಿ ಕಾಯಿಲೆಯು ಮಾರಣಾಂತಿಕವಾಗಿ ಪರಿಣಮಿಸುವ ಸಾಧ್ಯತೆ ಇರುವುದು ಇನ್ನೂ ಹೆಚ್ಚಿನ ಕಳವಳಕಾರಿ ಸಂಗತಿ. ಕಾಯಿಲೆಯ ತೀವ್ರತೆಯೂ ಹೆಚ್ಚುತ್ತಿರುವುದರಿಂದ ವೈದ್ಯರ ಪಾಲಿಗೆ ಚಿಕಿತ್ಸೆಯೂ ಕಠಿಣಗೊಳ್ಳುತ್ತಿದೆ. ಸೊಳ್ಳೆ ಸಂತಾನ ನಿಯಂತ್ರಿಸದಿದ್ದರೆ, ಚಿಕಿತ್ಸೆಗೆ ಬರುವವರನ್ನು ನಿರ್ವಹಿಸುವುದೂ ಕಠಿಣವಾಗಿ ಪರಿಣಮಿಸಬಹುದು. ಈ ಎರಡೂ ಕಾಯಿಲೆಗಳಿಗೆ ನಿರ್ದಿಷ್ಟ ಔಷಧಿ ಇಲ್ಲದಿರುವುದು, ಇವುಗಳ ನಿಯಂತ್ರಣಕ್ಕೆ ಪ್ರಮುಖ ಅಡ್ಡಿಯಾಗಿದೆ.

ಖಾಸಗಿ ಆಸ್ಪತ್ರೆ, ರಕ್ತ ಪರೀಕ್ಷೆ ಪ್ರಯೋಗಾಲಯಗಳು, ಎಲಿಸಾ ಮತ್ತು ಕಿಟ್‌ ವಿಧಾನ ಪರೀಕ್ಷೆಗೆ ಸರ್ಕಾರ ನಿಗದಿಪಡಿಸಿದ ದರಕ್ಕಿಂತ ಹೆಚ್ಚಿಗೆ ಸುಲಿಗೆ ಮಾಡದಂತೆಯೂ, ಸುಳ್ಳು ವರದಿ ನೀಡಿ ವಂಚಿಸದಂತೆಯೂ ಆರೋಗ್ಯ ಇಲಾಖೆ ಎಚ್ಚರವಹಿಸಬೇಕಾಗಿದೆ. ಬೃಹತ್‌ ಕಟ್ಟಡಗಳ ನಿರ್ಮಾಣ ಕಾಮಗಾರಿ ನಡೆದಿರುವ ನಿವೇಶನಗಳು, ಕೊಳೆಗೇರಿಗಳು ಹಾಗೂ ಕೊಳಚೆ ನೀರು ಹರಿಯದಂತೆ ಹೂಳು ತುಂಬಿಕೊಂಡ ಚರಂಡಿಗಳೆಲ್ಲ ಈಗ ಸೊಳ್ಳೆಗಳ ಆಶ್ರಯ ತಾಣಗಳಾಗಿ ಪರಿಣಮಿಸಿವೆ. ನಿರ್ಮಾಣ ಕಾಮಗಾರಿ ದೊಡ್ಡ ಪ್ರಮಾಣದಲ್ಲಿ ನಡೆಯುತ್ತಿರುವ ಪ್ರದೇಶದಲ್ಲಿ ಇವುಗಳ ಹಾವಳಿ ಹೆಚ್ಚಾಗಿ ಕಂಡು ಬರುತ್ತದೆ. ಇಲ್ಲೆಲ್ಲ ಸೊಳ್ಳೆಗಳಿಗೆ ಕಡಿವಾಣ ಹಾಕುವ ಹೊಣೆಗಾರಿಕೆಯನ್ನು ಕಟ್ಟಡ ನಿರ್ಮಾಣಗಾರರಿಗೆ ಒಪ್ಪಿಸಬೇಕು.