ಆನೇಕಲ್‌ನಲ್ಲಿ ಉದ್ರಿಕ್ತ ಜನರ ಮೇಲೆ ಗೋಲಿಬಾರ್‌: ಬಾಲಕನೊಬ್ಬನಿಗೆ ಗುಂಡೇಟು
ಆನೇಕಲ್‌, ಅ. 3– ನಿನ್ನೆ ರಾತ್ರಿ ಇಲ್ಲಿ ಕಲ್ಲು ತೂರಾಟದಲ್ಲಿ ತೊಡಗಿದ್ದ ಉದ್ರಿಕ್ತ ಜನರ ಗುಂಪನ್ನು ಚದುರಿಸಲು ಪೊಲೀಸರು ಎರಡು ಸುತ್ತು ಗುಂಡು ಹಾರಿಸಿದರು.
ಬಾಲಕನೊಬ್ಬನಿಗೆ ಗುಂಡು ತಗಲಿ ಗಾಯವಾಗಿದ್ದು, ಆಸ್ಪತ್ರೆಗೆ ಸೇರಿಸಲಾಗಿದೆ.
ನಿನ್ನೆ ಬೆಳಿಗ್ಗೆ ಆನೇಕಲ್‌ ಕಡೆಯಿಂದ ಧಾನ್ಯ ತುಂಬಿದ್ದ ಎರಡು ಲಾರಿಗಳು ಬೆಂಗಳೂರಿಗೆ ಹೋಗುತ್ತಿದ್ದುದನ್ನು ಜನರು ತಡೆದು, ಲಾರಿಗಳನ್ನು ಪೊಲೀಸ್ ಠಾಣೆಗೆ ತಂದು ಧಾನ್ಯವನ್ನು ಇಲ್ಲಿಯೇ ಜನರಿಗೆ ಹಂಚಲು ಒತ್ತಾಯಪಡಿಸಿದರು. ಆದರೆ, ಅದಕ್ಕೆ ಪೊಲೀಸರು ಒಪ್ಪಲಿಲ್ಲ. ಹೆಡ್‌ಕಾನ್ಸ್‌ಟೆಬಲ್‌ ಒಬ್ಬರು ಲಾರಿಯೊಂದನ್ನು ಬಿಟ್ಟುಬಿಟ್ಟರು. ಇದರಿಂದ ಜನರು ಉದ್ರಿಕ್ತಗೊಂಡರು. ನಿನ್ನೆ ಬೆಳಿಗ್ಗೆ 6 ಗಂಟೆಯಿಂದ ಜನರ ಜನರ ಗುಂಪು ಕಚೇರಿ ಆವರಣದಲ್ಲಿ ಸೇರಿ ಪ್ರತಿಭಟನೆ ಸೂಚಿಸುತ್ತಿತ್ತು. ಈ ಮಧ್ಯೆ ಜನಸಂಘದವರು ನಡೆಸಿದ ಶಾಂತಿ ಪ್ರಯತ್ನ ವಿಫಲವಾಯಿತು.
