ಬ್ಯಾಂಕ್ ಸಾಲವನ್ನು ಮಂಜೂರು ಮಾಡದಿರುವುದಕ್ಕೆ ಗ್ರಾಹಕನೊಬ್ಬ ಬ್ಯಾಂಕಿಗೆ ಬೆಂಕಿ ಹಚ್ಚಿರುವ ಸುದ್ದಿ ವರದಿಯಾಗಿದೆ. ಈ ವರದಿಯ ಸತ್ಯಾಸತ್ಯತೆ ಅಸ್ಪಷ್ಟವಾಗಿದೆ. ಆದರೆ, ಬ್ಯಾಂಕ್ ಸಾಲವು ಗ್ರಾಹಕನ ಹಕ್ಕಾಗಿ ಪರಿಣಮಿಸಿರುವ ಇತ್ತೀಚಿನ ದಿನಗಳಲ್ಲಿ ಈ ವರದಿಯನ್ನು ತಳ್ಳಿಹಾಕಲಾಗದು. ಜನರು ಮೇಜು ಕುಟ್ಟಿ, ಧಮಕಿ ಹಾಕಿ ಬ್ಯಾಂಕ್ ಸಾಲವನ್ನು ಕೇಳುವ ಮತ್ತು ಹೆಚ್ಚು ಸಾಲವನ್ನು ನೀಡುವಂತೆ ಬ್ಯಾಂಕುಗಳ ಮೇಲೆ ಸರ್ಕಾರ ಒತ್ತಡ ಹಾಕುವ ಪರಿಸ್ಥಿತಿಯಲ್ಲಿ ಬ್ಯಾಂಕುಗಳಲ್ಲಿ ಇಂತಹ ಘಟನೆಗಳು ಸಾಮಾನ್ಯ. ಬ್ಯಾಂಕುಗಳು ಸಾಲ ನೀಡುವಾಗ ಸರ್ಕಾರ ನಿಗದಿಪಡಿಸಿದ ಹಲವು ನಿಯಮಾವಳಿಗಳ ಅನ್ವಯ ಸಾಲ ನೀಡುತ್ತವೆ ಎನ್ನುವುದನ್ನು ಮರೆತು ಕೆಲವು ಗ್ರಾಹಕರು ಸಾಲಕ್ಕಾಗಿ ಬ್ಯಾಂಕುಗಳನ್ನು ಒತ್ತಾಯಿಸುವ ಪ್ರಮೇಯಗಳೂ ಇರುತ್ತವೆ. ಜನಾರ್ದನ ಪೂಜಾರಿಯವರ ಸಾಲಮೇಳದ ದಿನಗಳಲ್ಲಿ ಗ್ರಾಹಕರು ಮ್ಯಾನೇಜರ್ ಟೇಬಲ್ ಮೇಲೆ ರೇಷನ್ ಕಾರ್ಡ್ ಇರಿಸಿ ಸಾಲ ಕೇಳಿದ ಉದಾಹರಣೆಗಳು ಇವೆ.