ಈಗ ನವೆಂಬರ್ ತಿಂಗಳು. ತನುಮನದಲ್ಲೂ ಉಸಿರಲ್ಲೂ ಕನ್ನಡದ ನುಡಿ ತುಂಬಿರಬೇಕಾದ ತಿಂಗಳು! ಆದರೆ, ಮಕ್ಕಳ ನಾಲಿಗೆಯಲ್ಲಿ ಕನ್ನಡ ಮಾಯವಾಗಿದೆ! ಅಪ್ಪ, ಅಮ್ಮ, ಅಕ್ಕ, ಚಿಕ್ಕಪ್ಪ, ಚಿಕ್ಕಮ್ಮ, ದೊಡ್ಡಪ್ಪ, ಮಾವ, ಅತ್ತೆ, ಅಜ್ಜಿ, ಅಜ್ಜ ಪದಗಳೆಲ್ಲ ಈಗಿನ ಮಕ್ಕಳಿಗೆ ಮರೀಚಿಕೆ ಆಗಿವೆ. ಅಪ್ಪ–ಅಮ್ಮ ಮಾಯವಾಗಿ ಆ ಜಾಗವನ್ನು ‘ಮಮ್ಮಿ– ಡ್ಯಾಡಿ’ ಆಕ್ರಮಿಸಿಕೊಂಡಿವೆ. ವಯಸ್ಸಿನ ಭೇದ, ಅಂತರವಿಲ್ಲದೆ ‘ಆಂಟಿ–ಅಂಕಲ್’ ಪದಗಳ ಸಂಬಂಧ ಎಲ್ಲೆಲ್ಲೂ ಬೆಸೆದುಕೊಂಡಿದೆ. ದೊಡ್ಡವರೇ ಬರಲಿ, ಚಿಕ್ಕವರೇ ಬರಲಿ... ‘ಆಂಟಿ ಬಂದರು, ಅಂಕಲ್ ಬಂದರು’ ಎಂದು ಚಿಕ್ಕಮಕ್ಕಳು ಕುಣಿದಾಡುವಂತಾಗಿದೆ. ಕಡೆಗೆ ಮನೆ ಮುಂದೆ ಭಿಕ್ಷುಕ ಕಂಡರೂ ‘ಅಂಕಲ್ ಬಂದರು’ ಎನ್ನುವಂತಾಗಿದೆ. ಹೀಗಾದರೆ ‘ಕನ್ನಡಮ್ಮ’ನ ಗತಿ?
