ಸೋಮವಾರ, ಸೆಪ್ಟೆಂಬರ್ 28, 2020
21 °C

ವಾಚಕರ ವಾಣಿ: ಸಾಲು ಮರಗಳ ಸಂರಕ್ಷಿಸಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಪರಿಸರ ಸಂರಕ್ಷಣೆಗಾಗಿ ಅರಣ್ಯ ಇಲಾಖೆಯು ವಿವಿಧ ನಿಯಮಗಳನ್ನು ರೂಪಿಸುತ್ತದೆ. ಆದರೂ ಅಲ್ಲಲ್ಲಿ ಉಂಟಾಗುವ ತಾಂತ್ರಿಕ ತೊಂದರೆಗಳ ಕಡೆ ಹೆಚ್ಚು ಗಮನ ಹರಿಸದಿರುವುದು ವಿಪರ್ಯಾಸ. ಹಿಂದೆ ಹೆದ್ದಾರಿಗಳಲ್ಲಿ ಸಂಚರಿಸುತ್ತಿದ್ದವರಿಗೆ ರಸ್ತೆ ಬದಿಯಲ್ಲಿ ಇರುತ್ತಿದ್ದ ಸಾಲು ಸಾಲು ಗಿಡ, ಮರಗಳು ಖುಷಿ ಕೊಡುತ್ತಿದ್ದವು. ಇದರ ಹಿಂದೆ ಅರಣ್ಯಾಧಿಕಾರಿಗಳು ಹಾಗೂ ಅರಣ್ಯ ರಕ್ಷಕರ ಕಾಳಜಿ ಕೆಲಸ ಮಾಡಿರುತ್ತಿತ್ತು.

ಈ ಮರಗಳಿಂದ ಸಾಕು ಪ್ರಾಣಿಗಳಿಗೆಂದು ಸೊ‍ಪ್ಪನ್ನು ಕಿತ್ತರೆ ಅಥವಾ ಸಣ್ಣಸಣ್ಣ ಒಣಗಿದ ಕೊಂಬೆಗಳನ್ನು ಉರುವಲಿಗಾಗಿ ಮುಟ್ಟಿದರೂ ಶಿಕ್ಷಿಸುವಂತಹ ನಿಗಾ ವ್ಯವಸ್ಥೆ ಇರುತ್ತಿತ್ತು. ಆದರೆ ಇತ್ತೀಚೆಗೆ ರಸ್ತೆಬದಿಯ ಮರಗಳ ಸಂರಕ್ಷಣೆಗೆ ಕಾಳಜಿ ವಹಿಸುವರ
ಸಂಖ್ಯೆ ಕ್ಷೀಣಿಸಿದೆ. ವಿದ್ಯುತ್ ಪೂರೈಕೆಗಾಗಿ ರಸ್ತೆಯ ಇಕ್ಕೆಲಗಳಲ್ಲಿ ಅತಿ ಹೆಚ್ಚು ವಿದ್ಯುತ್‍ ಕಂಬಗಳನ್ನು ನೆಟ್ಟು, ಮರಗಳ ಸಮೀಪ ಹಳೆಯ ಮಾದರಿಯ ವಿದ್ಯುತ್ ಲೈನ್‍ಗಳು ಹಾದುಹೋಗುವಂತೆ ಮಾಡಲಾಗುತ್ತಿದೆ. ಇದರಿಂದ ಆ ಮರಗಳ ಬೆಳವಣಿಗೆಗೆ ಸಂಚಕಾರ ಉಂಟಾಗುತ್ತಿದೆ.

ನಗರ ಪ್ರದೇಶಗಳಲ್ಲಿ ಹಳೆಯ ವಿದ್ಯುತ್‍ ಲೈನ್‍ಗಳಿಗೆ ಇತಿಶ್ರೀ ಹೇಳಿ, ಆಧುನಿಕ ಮಾದರಿಯ ಸುರಕ್ಷಿತ
ವಿದ್ಯುತ್‍ ಲೈನ್‍ಗಳನ್ನು ಅಳವಡಿಸಲಾಗುತ್ತಿದೆ. ಈ ಸೌಲಭ್ಯವನ್ನು ಗ್ರಾಮೀಣ ಭಾಗಗಳಿಗೂ ಜರೂರಾಗಿ ವಿಸ್ತರಿಸಿ ಸಾಲು ಮರಗಳ ಸಂರಕ್ಷಣೆಗೆ ಗಮನ ಹರಿಸಬೇಕು.

ಮಹದೇವಪ್ಪ.ಪಿ., ಮೈಸೂರು

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು