ಸಿನಿಮಾ: ಅಭಿರುಚಿ ಬದಲಾಗಲಿ

ಹಿಂದಿನ ಕಾಲದ ಚಲನಚಿತ್ರಗಳು ಜನರ ಜೀವನವನ್ನೇ ಬದಲಾಯಿಸುವಷ್ಟು ಪರಿಣಾಮಕಾರಿಯಾಗಿ ಇರುತ್ತಿದ್ದವು. ಆದರೆ ಈಗಿನ ಚಿತ್ರಗಳಲ್ಲಿ ಅಪರಾಧ ಕೃತ್ಯಗಳನ್ನು ಅತಿಯಾಗಿ ವಿಜೃಂಭಿಸಿ ತೋರಿಸಲಾಗುತ್ತಿದೆ. ಇದು ಯುವಕರ ಮೇಲೆ ಕೆಟ್ಟ ಪರಿಣಾಮ ಬೀರುತ್ತಿದ್ದು, ಅಪರಾಧ ಕೃತ್ಯಗಳನ್ನು ಮಾಡಲು ಪ್ರೋತ್ಸಾಹಿಸಿದಂತೆ ಆಗುತ್ತಿದೆ. ಇದರ ಅರಿವಿದ್ದೂ ಅಂತಹ ಚಿತ್ರಗಳ ಬಿಡುಗಡೆಗೆ ಪ್ರಮಾಣಪತ್ರ ದೊರೆಯುತ್ತಿದೆ ಎಂದರೆ ಸಮಾಜದ ಸ್ವಾಸ್ಥ್ಯಕ್ಕಿಂತ ‘ವಾಣಿಜ್ಯ’ ದೃಷ್ಟಿಯೇ ಪ್ರಮುಖವೆಂದು ಸಂಬಂಧಪಟ್ಟವರು ನಂಬಿರುವಂತಿದೆ. ಸಿನಿಮಾ ಕೋಟ್ಯಂತರ ಜನರ ಮೇಲೆ ನೇರ ಪರಿಣಾಮ ಬೀರುವುದರಿಂದ ನಿರ್ದೇಶಕರು ಮತ್ತು ನಿರ್ಮಾಪಕರು ಕೇವಲ ವಾಣಿಜ್ಯ ದೃಷ್ಟಿಯಿಂದ ಸಿನಿಮಾ ಮಾಡದೆ, ಸಮಾಜಕ್ಕೆ ಉತ್ತಮ ಸಂದೇಶವನ್ನು ನೀಡುವಂತಹ ಸಿನಿಮಾಗಳನ್ನು ನಿರ್ಮಿಸಲು ಮುಂದಾಗಬೇಕು.

- ರಾಜು ಬಿ. ಲಕ್ಕಂಪುರ,ಜಗಳೂರು