ಸೇಡಂ ಕ್ಷೇತ್ರದ ಪಿಂಕ್ ಮತಗಟ್ಟೆ–109ರ ಅಲಂಕಾರ ಸೊಗಸಾಗಿತ್ತು. ಅಗಲವಾದ ಬಣ್ಣದ ಶಾಮಿಯಾನ, ಮುಂಬಾಗಿಲಲ್ಲಿ ಆಚೀಚೆ ಇಟ್ಟಿದ್ದ ಚೆಲುವೆಯರ ಕಲಾಕೃತಿಗಳು, ಒಳಾವರಣದಲ್ಲಿ ತೂಗುಹಾಕಿದ್ದ ಅಲಂಕಾರಿಕ ಸಾಮಗ್ರಿಗಳು, ಹೂಕುಂಡಗಳು ಗಮನ ಸೆಳೆದವು. ಶಂಖದಿಂದ ನೀರನ್ನು ಸುರಿಯುವ ಮಾದರಿಯ ಈ ಸುಂದರಿಯರು ಮತದಾರರನ್ನು ಬರಸೆಳೆದರು. ಕುಡಿಯಲು ತಣ್ಣನೆಯ ನೀರಿನ ವ್ಯವಸ್ಥೆ, ಕುಳಿತುಕೊಳ್ಳಲು ಕುರ್ಚಿ, ತಾಯಂದಿರ ಜತೆಗೆ ಬರುವ ಮಕ್ಕಳಿಗೆ ಆಟಿಕೆ ಸಾಮಾನುಗಳನ್ನೂ ಇಲ್ಲಿ ವ್ಯವಸ್ಥೆ ಮಾಡಲಾಗಿತ್ತು.