ಬೆಂಗಳೂರು: ಆಸಿಫ್ ಖಾನ್ ಹ್ಯಾಟ್ರಿಕ್ ಹಾಗೂ ನಿತಿನ್ ಗಳಿಸಿದ ಎರಡು ಗೋಲುಗಳು ಎಂಇಜಿ ಸೆಂಟರ್ ಎಫ್‌ಸಿ ತಂಡದ ಗೆಲುವಿಗೆ ಕಾರಣವಾದವು. ಬಿಡಿಎಫ್‌ಎ ಸೂಪರ್ ಡಿವಿಷನ್ ಲೀಗ್ ಫುಟ್‌ಬಾಲ್ ಟೂರ್ನಿಯ ಪಂದ್ಯದಲ್ಲಿ ಎಂಇಜಿ ಸೆಂಟರ್ ತಂಡವು 7–2 ಗೋಲುಗಳಿಂದ ಇನ್‌ಕಮ್ ಟ್ಯಾಕ್ಸ್ ಎಫ್‌ಸಿ ತಂಡವನ್ನು ಮಣಿಸಿತು.
ವಿಜೇತ ತಂಡದ ಆಸಿಫ್ 61, 68 ಹಾಗೂ 86ನೇ ನಿಮಿಷದಲ್ಲಿ ಕಾಲ್ಚಳಕ ತೋರಿದರು. ನಿತಿನ್ (9 ಹಾಗೂ 65ನೇ ನಿಮಿಷ), ಅಕ್ಬರ್ ಸಿದ್ದೀಕ್‌ (71ನೇ ನಿ.) ಹಾಗೂ ರಾಹುಲ್ ರಾಮಕೃಷ್ಣ (85ನೇ ನಿ.) ಗೋಲು ದಾಖಲಿಸಿದರು. ಇನ್‌ಕಮ್ ಟ್ಯಾಕ್ಸ್ ತಂಡದ ಅಸ್ಟಿನ್ ಚುಕ್ವುಕಾ ಉಲೋಚ (21ನೇ ನಿ.) ಹಾಗೂ ಮೊಹಮ್ಮದ್ ರಯಾನ್‌ (24ನೇ ನಿ.) ತಲಾ ಒಂದು ಗೋಲು ಹೊಡೆದರು.
ಮತ್ತೊಂದು ಹಣಾಹಣಿಯಲ್ಲಿ ಬೆಂಗಳೂರು ಈಗಲ್ಸ್ ಎಫ್‌ಸಿಯು 2–0ಯಿಂದ ಎಡಿಇ ಎಫ್‌ಸಿ ಎದುರು ಜಯಿಸಿತು. ಈಗಲ್ಸ್ ತಂಡದ ಎರಡೂ ಗೋಲುಗಳು ಮನೋಜ್ ಸ್ವಾಮಿ ಮೂಲಕ ಬಂದವು.
ಮಂಗಳವಾರ ನಡೆಯುವ ಪಂದ್ಯಗಳಲ್ಲಿ ಯಂಗ್ ಚಾಲೆಂಜರ್ಸ್ ಎಫ್‌ಸಿ–ಎಎಸ್‌ಸಿ ಸೆಂಟರ್ ಎಫ್‌ಸಿ ಮತ್ತು ಬಿಎಫ್‌ಸಿ–ಕಿಕ್‌ಸ್ಟಾರ್ಟ್‌ ಎಫ್‌ಸಿ ಆಡಲಿವೆ.
