ಜೂರಿಚ್‌: ಅಖಿಲ ಭಾರತ ಫುಟ್‌ಬಾಲ್ ಫೆಡರೇಷನ್ (ಎಐಎಫ್ಎಫ್) ಮೇಲೆ ಹೇರಿದ್ದ ಅಮಾನತನ್ನು ವಿಶ್ವ ಫುಟ್‌ಬಾಲ್ ಆಡಳಿತ ಮಂಡಳಿ (ಫಿಫಾ) ಶುಕ್ರವಾರ ಹಿಂಪಡೆದಿದೆ.
ಎಐಎಫ್ಎಫ್ ಆಡಳಿತಗಾರರ ಸಮಿತಿಯನ್ನು (ಸಿಒಎ) ರದ್ದುಗೊಳಿಸುವ ತೀರ್ಮಾನವನ್ನು ಸುಪ್ರೀಂಕೋರ್ಟ್‌ ಕೈಗೊಂಡ ಬಳಿಕ ಫಿಫಾ ಈ ನಿರ್ಧಾರ ತೆಗೆದುಕೊಂಡಿದೆ. ಇದರಿಂದಾಗಿ ನಿಗದಿಯಂತೆ ಫಿಫಾ 17 ವರ್ಷದೊಳಗಿನ ಮಹಿಳಾ ವಿಶ್ವಕಪ್ಭಾರತದಲ್ಲಿ ನಡೆಯಲಿದೆ.
‘ಮೂರನೇ ವ್ಯಕ್ತಿಗಳ ಅನಗತ್ಯ ಹಸ್ತಕ್ಷೇಪ‘ದ ಕಾರಣ ನೀಡಿ ಫಿಫಾ ಆ. 15 ರಂದು ಎಐಎಫ್‌ಎಫ್‌ಅನ್ನು ಅಮಾನತು ಮಾಡಿತ್ತು. ‘ವಿಶ್ವಕಪ್‌ ಟೂರ್ನಿಯನ್ನು ನಿಗದಿಯಂತೆ ಭಾರತದಲ್ಲಿ ನಡೆಸಲು ಸಾಧ್ಯವಿಲ್ಲ’ ಎಂದೂ ಹೇಳಿತ್ತು. ಆದರೆ ಎಐಎಫ್ಎಫ್ ಮೇಲಿನ ಅಮಾನತು 11 ದಿನಗಳಲ್ಲೇ ತೆರವಾಗಿದೆ.
‘ಎಐಎಫ್ಎಫ್ ಮೇಲೆ ವಿಧಿಸಿದ್ದ ಅಮಾನತನ್ನು ವಾಪಸ್‌ ಪಡೆಯಲು ಬ್ಯೂರೊ ಆಫ್‌ ಫಿಫಾ ಕೌನ್ಸಿಲ್‌ ನಿರ್ಧರಿಸಿದೆ. 17 ವರ್ಷದೊಳಗಿನ ಮಹಿಳೆಯರ ವಿಶ್ವಕಪ್‌ ನಿಗದಿಯಂತೆ ಅಕ್ಟೋಬರ್‌ 11ರಿಂದ 30ರವರೆಗೆ ಭಾರತದಲ್ಲೇ ನಡೆಯಲಿದೆ‘ ಎಂದು ಫಿಫಾ ಹೇಳಿಕೆಯಲ್ಲಿ ತಿಳಿಸಿದೆ.
‘ಎಐಎಫ್‌ಎಫ್‌ನ ಆಗುಹೋಗುಗಳ ಮೇಲೆ ಫಿಫಾ ಮತ್ತು ಎಎಫ್‌ಸಿ ನಿಗಾ ಇರಿಸಲಿದೆ. ಚುನಾವಣೆ ನಿಗದಿಯಂತೆ ನಡೆಯಲು ಎಲ್ಲ ನೆರವು ನೀಡ ಲಾಗುವುದು’ ಎಂದು ಪ್ರಕಟಣೆ ಹೇಳಿದೆ.
ಎಐಎಫ್ಎಫ್ ಹಂಗಾಮಿ ಕಾರ್ಯದರ್ಶಿ ಸುನಂದೊ ಧಾರ್‌ ಅವರು ಫಿಫಾ ತೀರ್ಮಾನವನ್ನು ಸ್ವಾಗತಿಸಿದ್ದಾರೆ.
