ಪ್ಯಾರಿಸ್: ಆತಿಥೇಯ ಫ್ರಾನ್ಸ್ ತಂಡ 3–0 ನೇರ ಸೆಟ್ಗಳಿಂದ ವಿಶ್ವದ ಅಗ್ರಮಾನ್ಯ ತಂಡ ಪೋಲೆಂಡ್ ಮೇಲೆ ಜಯಗಳಿಸಿ ಒಲಿಂಪಿಕ್ಸ್ ವಾಲಿಬಾಲ್ ಚಿನ್ನವನ್ನು ತನ್ನಲ್ಲೇ ಉಳಿಸಿಕೊಂಡಿತು.
ಫೈನಲ್ನಲ್ಲಿ ಜೀನ್ ಪ್ಯಾಟ್ರಿ ಬಳಗ 25–19, 25–20, 25–23ರಿಂದ ಜಯಗಳಿಸಿತು. ಪ್ಯಾಟ್ರಿ 17 ಪಾಯಿಂಟ್ಸ್ ಕಲೆಹಾಕಿದರೆ, ಟ್ರೆವರ್ ಕ್ಲೀವ್ನಾಟ್ 11 ಅಂಕ ಗಳಿಸಿದರು. ಅಂಟೋನಿ ಬ್ರಿಜಾರ್ಡ್ ಕೆಲವು ಅಮೋಘ ಬ್ಲಾಕ್ನೊಡನೆ ತಂಡದ ಗೆಲುವಿನಲ್ಲಿ ಗಣನೀಯ ಕಾಣಿಕೆ ನೀಡಿದರು.
‘ಇದು ಅಮೋಘ ಜಯ. ಆರಂಭದಿಂದಲೇ ಪ್ರೇಕ್ಷಕರ ಬಲದಿಂದ ನಾವು ಮುನ್ನಡೆ ಸಾಧಿಸಿದ್ದೆವು. ಗೆಲುವಿನಲ್ಲಿ ಅವರ ಪಾತ್ರವೂ ಮುಖ್ಯವಾಯಿತು’ ಎಂದು ಕ್ಲೀವ್ನಾಟ್ ಪ್ರತಿಕ್ರಿಯಿಸಿದರು.
ಸೌತ್ ಪ್ಯಾರಿಸ್ ಅರೇನಾದಲ್ಲಿ ಫ್ರಾನ್ಸ್ ಗೆಲುವಿನೊಡನೆ ಆಟಗಾರರ ಜೊತೆ ಪ್ರೇಕ್ಷಕರೂ ಜೋರಾಗಿಯೇ ಸಂಭ್ರಮಿಸಿದರು.
ಈ ಹಿಂದೆ (ಅಂದಿನ) ಸೋವಿಯತ್ ಯೂನಿಯನ್ ಮತ್ತು ಅಮೆರಿಕ ತಂಡಗಳು ಮಾತ್ರ ಸತತ ಒಲಿಂಪಿಕ್ಸ್ಗಳಲ್ಲಿ ವಾಲಿಬಾಲ್ ಸ್ವರ್ಣ ಜಯಿಸಿದ್ದವು. ಈಗ ಫ್ರಾನ್ಸ್ ಆ ಸಾಲಿಗೆ ಸೇರಿತು.
ಅಮೆರಿಕ ಶುಕ್ರವಾರ ನಡೆದ ಪಂದ್ಯದಲ್ಲಿ ನೇರ ಸೆಟ್ಗಳಿಂದ ವಿಶ್ವ ಚಾಂಪಿಯನ್ ಇಟಲಿ ಮೇಲೆ ಜಯಗಳಿಸಿ ಕಂಚಿನ ಪದಕ ಗೆದ್ದುಕೊಂಡಿತ್ತು.
