ನವದೆಹಲಿ: ಭಾರತವು ಮುಂದಿನ ವರ್ಷದ ಮಾರ್ಚ್‌ನಲ್ಲಿ ಡೆನ್ಮಾರ್ಕ್ ಎದುರಿನ ಡೇವಿಸ್‌ ಕಪ್ ವಿಶ್ವಗುಂಪು ಒಂದರ ಪಂದ್ಯಕ್ಕೆ ಆತಿಥ್ಯ ವಹಿಸಲಿದೆ. 2019ರ ಫೆಬ್ರುವರಿ ಬಳಿಕ ದೇಶವು ಮೊದಲ ಬಾರಿ ಡೇವಿಸ್‌ ಕಪ್ ಪಂದ್ಯ ಆಯೋಜಿಸಲಿದೆ.
ಡೆನ್ಮಾರ್ಕ್ ಎದುರಿನ ಪಂದ್ಯವು 2022ರ ಮಾರ್ಚ್‌ 4 ಹಾಗೂ 5ರಂದು ನಡೆಯಲಿದೆ.
ಭಾರತವು ಕಳೆದ ಮೂರು ಪಂದ್ಯಗಳನ್ನು ಆಡಲು ಫಿನ್ಲೆಂಡ್‌ (2021), ಕ್ರೊವೇಷ್ಯಾ (2020) ಮತ್ತು ಕಜಕಸ್ತಾನಕ್ಕೆ (2019, ಪಾಕಿಸ್ತಾನ ಎದುರಿನ ಪಂದ್ಯ) ತೆರಳಿತ್ತು.
2019ರ ಫೆಬ್ರುವರಿಯಲ್ಲಿ ಇಟಲಿ ತಂಡಕ್ಕೆ ಆತಿಥ್ಯ ವಹಿಸಿದ್ದ ಭಾರತ 1–3ರಿಂದ ಸೋತಿತ್ತು. ಕೋಲ್ಕತ್ತದಲ್ಲಿ ಈ ಹಣಾಹಣಿ ನಡೆದಿತ್ತು.
ಭಾರತದ ಎಲ್ಲ ಆಟಗಾರರಿಗಿಂತ ಹೆಚ್ಚಿನ ರ‍್ಯಾಂಕಿಂಗ್‌ ಹೊಂದಿರುವ ಸಿಂಗಲ್ಸ್ ವಿಭಾಗದ ಆಟಗಾರ ಹೋಲ್ಗರ್ ರೂನ್ (103) ಡೆನ್ಮಾರ್ಕ್ ತಂಡದಲ್ಲಿದ್ದಾರೆ. ಭಾರತದ ಪ್ರಜ್ಞೇಶ್ ಗುಣೇಶ್ವರನ್‌ 215ನೇ ರ‍್ಯಾಂಕಿಂಗ್‌ನಲ್ಲಿದ್ದು, ಸುಮಿತ್ ನಗಾಲ್‌ 218ನೇ ಸ್ಥಾನದಲ್ಲಿದ್ದಾರೆ.
1984ರ ಸೆಪ್ಟೆಂಬರ್ ನಂತರ ಭಾರತವು ಆರ್ಹಸ್‌ನಲ್ಲಿ 3-2ರಿಂದ ಗೆದ್ದ ನಂತರ ಉಭಯ ರಾಷ್ಟ್ರಗಳ ನಡುವೆ ನಡೆಯಲಿರುವ ಮೊದಲ ಪಂದ್ಯ ಇದಾಗಲಿದೆ.
