ಬುಧವಾರ, ಮೇ 12, 2021
18 °C
ನ್ಯಾಯಮಂಡಳಿಗೆ ಸ್ಪಷ್ಟನೆ ಕೋರಿದ ಗೋವಾ

ಮಹದಾಯಿ: ನೀರು ಬಳಕೆ ಮತ್ತಷ್ಟು ವಿಳಂಬ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ನವದೆಹಲಿ: ಮಹದಾಯಿ ಜಲವಿವಾದ ನ್ಯಾಯಮಂಡಳಿಯು ಕಳೆದ ಆಗಸ್ಟ್‌ 14ರಂದು ನೀಡಿರುವ ಐತೀರ್ಪಿನಲ್ಲಿನ ಕೆಲವು ಅಂಶಗಳ ಕುರಿತು ಸ್ಪಷ್ಟನೆ ಕೋರಿ ಗೋವಾ ಸರ್ಕಾರ ಅರ್ಜಿ ಸಲ್ಲಿಸಿದೆ.

ಇದರಿಂದಾಗಿ ಕೇಂದ್ರ ಸರ್ಕಾರ ಐತೀರ್ಪಿನ ಕುರಿತ ಅಧಿಸೂಚನೆ ಹೊರಡಿಸುವುದು ವಿಳಂಬವಾಗಲಿದ್ದು, ನದಿ ನೀರಿನ ಬಳಕೆಗಾಗಿ ಯೋಜನೆ ಕೈಗೆತ್ತಿಕೊಳ್ಳಬೇಕಿರುವ ರಾಜ್ಯ ಸರ್ಕಾರದ ಪ್ರಕ್ರಿಯೆಯೂ ತಡವಾಗಲಿದೆ.

ಸಂಬಂಧಿಸಿದ ರಾಜ್ಯಗಳು ಆಯಾ ವರ್ಷವೇ ಹಂಚಿಕೆಯಾದ ನೀರನ್ನು ಬಳಸಿಕೊಳ್ಳದಿದ್ದರೆ ಮುಂದಿನ ವರ್ಷ ಆ ಪ್ರಮಾಣ ಸೇರ್ಪಡೆಯಾಗಲಿದೆಯೇ ಎಂಬುದನ್ನು ಸ್ಪಷ್ಟಪಡಿಸಬೇಕು. ನಿರ್ದಿಷ್ಟ ಯೋಜನೆಗಳಿಗೇ ಹಂಚಿಕೆಯಾದ ನೀರಿನ ಬಳಕೆಯ ಆದ್ಯತೆ ವಿವರಿಸಬೇಕು. ಇಲ್ಲದಿದ್ದಲ್ಲಿ ವ್ಯಾಜ್ಯ ಮುಂದುವರಿಯಲಿದೆ ಎಂದು ಗೋವಾ ಸಬೂಬು ನೀಡಿದೆ.

ಕರ್ನಾಟಕಕ್ಕೆ ಹಂಚಿಕೆಯಾಗಿದ್ದರಲ್ಲಿ ನೀರಾವರಿಗೆ ಎಷ್ಟು, ಕುಡಿಯುವ ಉದ್ದೇಶದಿಂದ ಎಷ್ಟು ನೀರನ್ನು ಬಳಸಬಹುದು ಎಂಬ ಮಾಹಿತಿಯೇ ಇಲ್ಲ ಎಂದು ಗೋವಾ ತಗಾದೆ ತೆಗೆದಿದೆ.

ಕಣಿವೆ ವ್ಯಾಪ್ತಿಯ ಮೇಲ್ಭಾಗದ ರಾಜ್ಯಗಳು ಬಳಕೆಯಾಗದ ನೀರನ್ನು ಸಂಗ್ರಹಿಸಲು (ಜಲಾಶಯ ನಿರ್ಮಿಸಲು) ಅವಕಾಶ ನೀಡಕೂಡದು ಎಂದು ಆಗ್ರಹಿಸಿರುವ ಗೋವಾ, ಕುಡಿಯುವ ನೀರಿಗೆ ಆದ್ಯತೆ ನೀಡಿ, ಪರಿಸರವನ್ನು ನಿರ್ಲಕ್ಷಿಸಬಹುದೇ? ಎಂದು ಪ್ರಶ್ನಿಸಿದೆ.

ಉದ್ದೇಶಿತ ಮಹದಾಯಿ ನದಿ ನೀರು ನಿರ್ವಹಣಾ ಪ್ರಾಧಿಕಾರದ ಕಾರ್ಯವೈಖರಿ ಹೇಗಿರಲಿದೆ, ಮುಖ್ಯ ಕಚೇರಿ ಎಲ್ಲಿರಬೇಕು ಎಂಬ ವಿವರಗಳು ಐತೀರ್ಪಿನಲ್ಲಿಲ್ಲ. ಪ್ರಾಧಿಕಾರವು ಸ್ವಾಯತ್ತ ಸಂಸ್ಥಯೇ ಅಥವಾ ಜಲಸಂಪನ್ಮೂಲ ಸಚಿವಾಲಯದ ವ್ಯಾಪ್ತಿಯಲ್ಲಿರಲಿದೆಯೇ ಎಂಬುದನ್ನೂ ವಿವರಿಸಿ ಎಂಬ ಬೇಡಿಕೆ ಅರ್ಜಿಯಲ್ಲಿದೆ.

ಯೋಜನೆ ಕಾಮಗಾರಿ ಪೂರ್ಣಗೊಳಿಸುವ ಹೊಣೆ ಪ್ರಾಧಿಕಾರದ್ದೋ ಅಥವಾ ಆಯಾ ರಾಜ್ಯಗಳದ್ದೋ, ಒಂದೊಮ್ಮೆ ರಾಜ್ಯಗಳೇ ಕಾಮಗಾರಿ ಪೂರ್ಣಗೊಳಿಸಿದಲ್ಲಿ ಅದನ್ನು ಘೋಷಣೆ ಮಾಡಿ ಪ್ರಾಧಿಕಾರದ ವ್ಯಾಪ್ತಿಗೆ ವಹಿಸುವವರೆಗೆ ನೀರಿನ ಬಳಕೆಗೆ ಅವಕಾಶ ನೀಡಬಾರದು. ಪ್ರಾಧಿಕಾರದ ಅಡಿ ಪುನರ್‌ ಪರಿಶೀಲನಾ ಸಮಿತಿಯೂ ಇರಬೇಕು. ಪ್ರಾಧಿಕಾರದ ನಿರ್ವಹಣೆಯ ವೆಚ್ಚವನ್ನು ಆಯಾ ವರ್ಷ ಕೇಂದ್ರ ಸರ್ಕಾರವೇ ಮೊದಲು ಭರಿಸಿ ನಂತರ ಆಯಾ ರಾಜ್ಯಗಳಿಂದ ಸಂಗ್ರಹಿಸಲಿ ಎಂಬುದೂ ಗೋವಾ ಆಗ್ರಹವಾಗಿದೆ.

ಕೇಂದ್ರದ ಅಧಿಸೂಚನೆ ಮತ್ತಷ್ಟು ವಿಳಂಬ

ನವದೆಹಲಿ: ಮಹದಾಯಿ ಜಲವಿವಾದ ನ್ಯಾಯಮಂಡಳಿಯ ಐತೀರ್ಪಿನ ಕುರಿತು ಸ್ಪಷ್ಟನೆ ಕೋರಿ ಗೋವಾ ಅರ್ಜಿ ಸಲ್ಲಿಸಿರುವುದರಿಂದ ಕೇಂದ್ರ ಸರ್ಕಾರವು ಮಹದಾಯಿಯ ಅಧಿಸೂಚನೆ ಹೊರಡಿಸುವುದು ಮತ್ತಷ್ಟು ವಿಳಂಬವಾಗಲಿದೆ.

ಅಂತರರಾಜ್ಯ ನದಿ ನೀರು ವಿವಾದ ಕಾಯ್ದೆ ಪ್ರಕಾರ, ಸಂಬಂಧಿಸಿದ ರಾಜ್ಯಗಳು ಐತೀರ್ಪು ಕುರಿತು ಮೇಲ್ಮನವಿ ಸಲ್ಲಿಸದಿದ್ದಲ್ಲಿ ಅಧಿಸೂಚನೆ ಹೊರಡಿಸಬಹುದಾಗಿದೆ. ಆದರೆ, ಈಗಾಗಲೇ ಗೋವಾ ಅರ್ಜಿ ಸಲ್ಲಿಸಿದ್ದರಿಂದ ಸದ್ಯಕ್ಕೆ ಅಧಿಸೂಚನೆ ಅಸಾಧ್ಯ ಎಂದು ಕೇಂದ್ರದ ಜಲಸಂಪನ್ಮೂಲ ಸಚಿವಾಲಯದ ಹಿರಿಯ ಅಧಿಕಾರಿಯೊಬ್ಬರು ‘ಪ್ರಜಾವಾಣಿ’ಗೆ ತಿಳಿಸಿದ್ದಾರೆ.

ನ್ಯಾಯಮಂಡಳಿಯು ಗೋವಾದ ಮೇಲ್ಮನವಿ ಸ್ವೀಕರಿಸಿದೆ. ಈ ವಿಷಯವನ್ನು ಜಲಸಂಪನ್ಮೂಲ ಸಚಿವ ನಿತಿನ್‌ ಗಡ್ಕರಿ ಅವರು ಇತ್ತೀಚೆಗೆ ತಮ್ಮನ್ನು ಭೇಟಿಯಾಗಿದ್ದ ಕರ್ನಾಟಕದ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಅವರಿಗೂ ಸ್ಪಷ್ಟಪಡಿಸಿದ್ದಾರೆ ಎಂದು ಅವರು ಹೇಳಿದ್ದಾರೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು