ಲಂಡನ್‌: ಕೆಲವರು ಸುಲಭವಾಗಿ ಕೊರೊನಾ ಸೋಂಕಿಗೆ ಒಳಗಾಗಲುಮನುಷ್ಯನ ವಂಶವಾಹಿಗಳಲ್ಲಿನ (ಜೀನ್‌) ರೂಪಾಂತರವೇ ಕಾರಣಎಂಬುದನ್ನು ನೆದರ್ಲೆಂಡ್ಸ್‌ನ ರ‍್ಯಾಡ್‌ಬೌಡ್‌ ಯೂನಿವರ್ಸಿಟಿ ಮೆಡಿಕಲ್‌ ಸೆಂಟರ್‌ನ ವಿಜ್ಞಾನಿಗಳು ಸಂಶೋಧಿಸಿದ್ದಾರೆ.
ಕೋವಿಡ್‌ ವಿರುದ್ಧ ಹೋರಾಡಲು ಮನುಷ್ಯನ ದೇಹದಲ್ಲಿ ರೋಗ ನಿರೋಧಕ ಶಕ್ತಿ ಹೆಚ್ಚಿಸುವುದು ಹಾಗೂ ಪರಿಣಾಮಕಾರಿ ಔಷಧ ಕಂಡುಹಿಡಿಯಲು ಈ ಸಂಶೋಧನೆ ಮತ್ತಷ್ಟು ನೆರವಾಗಲಿದೆ ಎಂದು ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದಾರೆ.
‘ಜರ್ನಲ್‌ ಆಫ್‌ ದಿ ಅಮೆರಿಕನ್ ಮೆಡಿಕಲ್‌ ಅಸೋಸಿಯೇಶನ್‌’ನಲ್ಲಿ ಈ ಸಂಶೋಧನಾ ವರದಿ ಪ್ರಕಟವಾಗಿದೆ.
ಅಧ್ಯಯನಕ್ಕೆ ಆಯ್ಕೆಯಾಗಿದ್ದ ಕೋವಿಡ್‌ ರೋಗಿಗಳ ಪೈಕಿ ಕೆಲವರಲ್ಲಿ ‘ಟಿಎಲ್‌ಆರ್‌7’ ಎಂಬ ಜೀನ್‌ಗಳು ಭಿನ್ನವಾಗಿರುವುದು ಪತ್ತೆಯಾಯಿತು. ಈ ಕಾರಣದಿಂದಾಗಿಯೇ ಆ ನಿರ್ದಿಷ್ಟ ರೋಗಿಗಳಲ್ಲಿ ರೋಗ ನಿರೋಧಕ ಶಕ್ತಿಗೆ ಕಾರಣವಾದ ಅಣುಗಳ ಸೃಷ್ಟಿಯಲ್ಲಿ ತೊಂದರೆ ಕಂಡುಬಂದಿತ್ತು ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
‘ಟಿಎಲ್‌ಆರ್‌7’ ಜೀನ್‌ಗಳು ಮನುಷ್ಯರ ಜೀವಕೋಶಗಳ ಮೇಲ್ಪದರದಲ್ಲಿ ಇರುತ್ತವೆ. ಜೀವಕೋಶಗಳ ಮೇಲೆ ದಾಳಿ ನಡೆಸುವ ಬ್ಯಾಕ್ಟೀರಿಯಾ ಅಥವಾ ವೈರಸ್‌ನಂತಹ ರೋಗಕಾರಕಗಳನ್ನು ಈ ಜೀನ್‌ಗಳು ಗುರುತಿಸಿ, ಕೂಡಲೇ ದೇಹದ ರೋಗ ನಿರೋಧಕ ಶಕ್ತಿ ಕ್ರಿಯಾಶೀಲವಾಗುವಂತೆ ಮಾಡುತ್ತವೆ.
ಜೀನ್‌ಗಳು ರೂಪಾಂತರಗೊಂಡಾಗ ಅವುಗಳಲ್ಲಿ ಈ ರೋಗಕಾರಕಗಳನ್ನು ಗುರುತಿಸುವ ಶಕ್ತಿಯೂ ಕುಂದಿ, ದೇಹ ಸುಲಭವಾಗಿ ಕೊರೊನಾ ಸೋಂಕಿಗೆ ತುತ್ತಾಗುತ್ತದೆ ಎಂದು ವಿಜ್ಞಾನಿಗಳು ಪ್ರತಿಪಾದಿಸಿದ್ದಾರೆ.
