ನವದೆಹಲಿ: ಲಂಡನ್ನಲ್ಲಿ ಪ್ರಧಾನ ಕಚೇರಿಯನ್ನು ಹೊಂದಿರುವ ಕ್ಯಾಪ್ಕೊ ಕಂಪನಿಯನ್ನು ವಿಪ್ರೊ ₹ 10,500 ಕೋಟಿಗೂ ಹೆಚ್ಚಿನ ಮೊತ್ತಕ್ಕೆ ಖರೀದಿಸಲಿದೆ. ಈ ಖರೀದಿಯು ವಿಪ್ರೊ ಪಾಲಿನ ಅತಿದೊಡ್ಡ ಸ್ವಾಧೀನ ಪ್ರಕ್ರಿಯೆ ಎಂದು ಕರೆಸಿಕೊಳ್ಳಲಿದೆ.
ಈ ಕಂಪನಿಯ ಖರೀದಿಯ ನಂತರ ವಿಪ್ರೊಗೆ, ಬ್ಯಾಂಕಿಂಗ್ ಮತ್ತು ಹಣಕಾಸು ವಲಯಗಳ 30 ದೊಡ್ಡ ಗ್ರಾಹಕರು ಲಭ್ಯವಾಗಲಿದ್ದಾರೆ. ‘ಕ್ಯಾಪ್ಕೊ ಕಂಪನಿಯ ಸ್ವಾಧೀನದಿಂದಾಗಿ ನಾವು ನಮ್ಮ ಹಣಕಾಸು ಸೇವಾ ವಹಿವಾಟನ್ನು ವಿಸ್ತರಿಸಲು ಸಾಧ್ಯವಾಗುತ್ತದೆ’ ಎಂದು ವಿಪ್ರೊ ಕಂಪನಿಯ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ (ಸಿಇಒ) ಥಿಯರಿ ಡೆಲಾಪೋರ್ಟ್ ಹೇಳಿದ್ದಾರೆ.
ಸ್ವಾಧೀನದ ನಂತರವೂ ಕ್ಯಾಪ್ಕೊ ಕಂಪನಿಯು, ಅದರ ಈಗಿನ ಸಿಇಒ ಲ್ಯಾನ್ಸ್ ಲೆವಿ ಅವರ ನೇತೃತ್ವದಲ್ಲಿ ಪ್ರತ್ಯೇಕ ಸಂಸ್ಥೆಯಾಗಿಯೇ ಕೆಲಸ ನಿರ್ವಹಿಸಲಿದೆ. ಆದರೆ, ಲೆವಿ ಅವರು ತಮ್ಮ ಕೆಲಸಗಳ ಬಗ್ಗೆ ಡೆಲಾಪೋರ್ಟ್ ಅವರಿಗೆ ಕಾಲಕಾಲಕ್ಕೆ ವಿವರ ನೀಡಲಿದ್ದಾರೆ.