ತಾರೆಗಳು

ಭೂಮಿಯ ನೋಡುವ ಬಾನಿನ ಮುಖದಲಿ
ಹೊಳೆಯುವ ವಿಧ ವಿಧ ಕಣ್ಣುಗಳು
ಎಂದಿಗೂ ಆರದೆ ಉರಿಯುತಲಿರುವ
ದೂರದ ಹಣತೆಯ ಸಾಲುಗಳು!

ಒಂದರ ಜತೆಗೆ ಇನ್ನೊಂದಿದ್ದರೂ
ಅಂತರ ಇರುವುದು ಬಲು ದೂರ
ದೂರದಲಿದ್ದರೂ ಬೆಳಕನು ಚೆಲ್ಲುವ
ನಡೆವುದು ಕತ್ತಲ ಸಂಹಾರ!

ಹಗಲಲಿ ಉರಿಯುವ ಸೂರ್ಯನು ಕೂಡಾ
ಚುಕ್ಕಿ - ತಾರೆಗಳ ಪರಿವಾರ
ಸೂರ್ಯನ ಬೆಳಕಲೇ ನಿಂತು ಬೆಳಗುವ
ಚಂದಿರ ಮಾತ್ರ ಬಲು ಚೋರ!

ತನ್ನೊಳು ತಾನು ಉರಿಯುತ ನೀಡಿವೆ
ಜಗಕೆಲ್ಲ ಬೆಳಕು
ತಾರೆಗಳಿಲ್ಲದ ಜಗವೇ ಇಲ್ಲ
ಎಲ್ಲಾದರೂ ಹುಡುಕು !