ಸೋಮವಾರ, ಜುಲೈ 13, 2020
29 °C

ತೊರೆದು ಹೋದವರ ಮರೆಯುವುದುಂಟೆ?

ರಾಜಶೇಖರ ಎಂ.ಬಿ. Updated:

ಅಕ್ಷರ ಗಾತ್ರ : | |

ಮತ್ತೆ ಭೇಟಿಯಾಗುವ ಮಾತೇ ಇಲ್ಲ 
ಕವಲೊಡೆದ ಹಾದಿಯಲ್ಲಿ ಮತ್ತೆ ವಾಪಸು ಬರದ ಖಾತ್ರಿಯಲಿ 
ಎಷ್ಟೇ ದೂರ ನಡೆದು ಹೋದರೂ 
ತೊರೆದು ಹೋದವರ ಮರೆಯುವುದುಂಟೆ?

ಒಂದೇ ಜೀವ ಎರಡು ದೇಹವಾಗಿದ್ದು 
ಅನಿವಾರ್ಯತೆಗಳ ನೆಪವೊಡ್ಡಿ ಬದುಕಿನ ಬಂಡಿ ನಡೆಸಲು 
ವಿಮುಖರಾಗಿ ತಮ್ಮ ತಮ್ಮದೇ ಹಾದಿ ತುಳಿದರೂ 
ತೊರೆದು ಹೋದವರ ಮರೆಯುವುದುಂಟೆ?

ಯಾವುದೋ ವಿಷ ಗಳಿಗೆ ಅಂತರಂಗಕ್ಕಿಳಿದು  
ಉಸಿರುಗಟ್ಟಿಸಿ ರೋಷವುಕ್ಕಿಸಿ ಕಣ್ಣಹನಿಗಳೇ ನಿಗಿ ನಿಗಿ ಕೆಂಡವಾಗಿ 
ಹುಚ್ಚು ಹಿಡಿದಂತಾ ಆವೇಶದಲಿ 
ಎತ್ತಲೋ ನಡೆದುಬಿಟ್ಟರೆ 
ತೊರೆದು ಹೋದವರ ಮರೆಯುವುದುಂಟೆ?

ಉಕ್ಕಿ ಬಂದ ದುಃಖವನು ಒಂದು ಬಿಕ್ಕಿಗೂ ಸಿಕ್ಕದಂತೆ ಗುಟ್ಟಾಗಿಟ್ಟು 
ತುಟಿಯರಳಿಸಿ ನಕ್ಕು ಬದುಕಿನ ಸಿಕ್ಕನ್ನು ಬಿಡಿಸಿಕೊಳ್ಳಲು 
ಯಾರ ಹಂಗಿಗೂ ಸಿಕ್ಕದೇ 
ತೊರೆದು ಹೋದವರ ಮರೆಯುವುದುಂಟೆ?

ಮರೆತೆನೆಂದರೂ ನೆನಪುಗಳ ತೊರೆಯಲಾಗದು 
ತೊರೆದನೆಂದರೂ ನೆನಪುಗಳ ಮರೆಯಲಾಗದು 
ಮುಂದೆ ಅಡಿಯಿಟ್ಟಷ್ಟು ಹಿಂದೆ ಓಡುವ ಮನಸು 
ತೊರೆದು ಹೋದವರ ಮರೆಯುವುದುಂಟೆ?

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.