ಅವ್ಯವಹಾರ: ದಾಖಲೆ ಕೇಳಿದ ಸಿಬಿಐ

ನವದೆಹಲಿ (ಪಿಟಿಐ): ಗಡಿ ಭದ್ರತೆಗೆ ಎರಡು ಯುದ್ಧ ವಿಮಾನಗಳ ಖರೀದಿ ಪ್ರಕ್ರಿಯೆಯಲ್ಲಿ ನಡೆದಿದೆ ಎನ್ನಲಾದ ಸುಮಾರು 1,500 ಕೋಟಿ ರೂಪಾಯಿ ಅವ್ಯವಹಾರಕ್ಕೆ ಸಂಬಂಧಿಸಿದಂತೆ ಗಡಿ ಭದ್ರತಾ ಪಡೆ (ಬಿಎಸ್‌ಎಫ್) ಹಾಗೂ ರಕ್ಷಣಾ ಸಚಿವಾಲಯದಿಂದ ಸಿಬಿಐ ದಾಖಲೆಗಳನ್ನು ಕೇಳಿದೆ.



ಇದಕ್ಕಾಗಿ 2009ರಲ್ಲಿ ಅಂತಿಮಗೊಂಡ ಟೆಂಡರ್ ಪ್ರಕ್ರಿಯೆಗೆ ಸಂಬಂಧಿಸಿದ ದಾಖಲೆಗಳನ್ನು ಕೇಳಿರುವುದಾಗಿ ಸಿಬಿಐ ಮೂಲಗಳು ತಿಳಿಸಿವೆ.



ರಕ್ಷಣಾ ಸಚಿವಾಲಯದ `ಅಜ್ಞಾತ~ ಅಧಿಕಾರಿಗಳ ವಿರುದ್ಧ ಆರಂಭಗೊಂಡಿರುವ ತನಿಖೆ ಇನ್ನು ಮೂರು ತಿಂಗಳೊಳಗೆ ಪೂರ್ಣಗೊಳ್ಳುವ ನಿರೀಕ್ಷೆ ಇದೆ ಎಂದೂ ಅವು ಹೇಳಿವೆ.



ಯುದ್ಧ ವಿಮಾನ ಖರೀದಿಗೆ ಸಂಬಂಧಿಸಿದ ತಾಂತ್ರಿಕ ಮೌಲ್ಯಮಾಪನ ಸಮಿತಿಯ (ಟಿಇಸಿ) ವರದಿಯನ್ನು ಅಂತಿಮಗೊಳಿಸುವಾಗ ಬಿಎಸ್‌ಎಫ್‌ನ ಹಿರಿಯ ಅಧಿಕಾರಿಗಳಿಬ್ಬರ ಸಹಿಯನ್ನು ನಕಲು ಮಾಡಿದ ಆರೋಪಕ್ಕೆ ಸಂಬಂಧಿಸಿದ ಪ್ರಕರಣ ಇದಾಗಿದೆ.



ಸಹಿಯನ್ನು ನಕಲು ಮಾಡಿದ ವ್ಯಕ್ತಿಗಳನ್ನು ಪತ್ತೆ ಹಚ್ಚುವ ಸಲುವಾಗಿ ಕೈಬರಹ ಹಾಗೂ ಇತರ ವಿವರ ತಿಳಿದುಕೊಳ್ಳಲು ದಾಖಲೆಗಳನ್ನು ವಿಧಿ ವಿಜ್ಞಾನ ಪರೀಕ್ಷೆಗೆ ಒಳಡಿಸುವಂತೆ ತನಿಖಾ ತಂಡವು ಆಗ್ರಹಿಸಿದೆ.