ಬುಧವಾರ, ಜೂನ್ 23, 2021
28 °C

ಎಲ್ಲಿದೆ ಕಡುಬಿನ ಜೋಳ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಜೋಳದ ಕಣ, ರಾಶಿ ಭರದಿಂದ ಸಾಗಿದೆ. ಉತ್ತರ ಕರ್ನಾಟಕದ ಕಪ್ಪು (ಎರಿ) ನೆಲದ ಬಹುತೇಕ ಹೊಲಗಳಲ್ಲಿ ಎಲ್ಲಿ ನೋಡಿದರೂ ಜೋಳ ಕೊಯ್ಯುವ ಸುಗ್ಗಿ. ಕೆಲ ಕಡೆ ರಾಶಿಯೂ ಮುಕ್ತಾಯಗೊಂಡಿದೆ. ಆದರೆ ಜೋಳದ ವಿಶಿಷ್ಟ ತಳಿಗಳಲ್ಲೊಂದಾದ  `ಕಡುಬಿನ ಜೋಳ~ ಮಾಯವಾಗುತ್ತಿರುವುದು ಬಹುತೇಕರನ್ನು ಚಿಂತೆಗೀಡುಮಾಡಿದೆ.



ಕಡುಬಿನ ಜೋಳ ವಿಶಿಷ್ಟ ಸಿರಿಧಾನ್ಯಗಳಲ್ಲೊಂದು. ಬಿಳಿ ಜೋಳದ ಜೊತೆ ಜೊತೆಗೆ ನಾಲ್ಕಾರು ಸಾಲುಗಳಲ್ಲಿ ಇದನ್ನು ಬಿತ್ತನೆ ಮಾಡುವುದು ಹಿಂದಿನಿಂದ ಬಂದ ಪದ್ಧತಿ. ಅದಕ್ಕಾಗಿ ಬಿಳಿ ಜೋಳದ ಜೊತೆಗೆ ಹತ್ತಾರು ಸೇರುಗಳಷ್ಟು ಈ ಜೋಳ ರಾಶಿ ಮಾಡಿ ಸಂಗ್ರಹಿಸುತ್ತಾರೆ.



 ಆದರೆ ಇತ್ತೀಚಿನ ವರ್ಷಗಳಲ್ಲಿ ಜೋಳ ಬೆಳೆಯುವವರೇ ಕಡಿಮೆಯಾಗಿದ್ದಾರೆ. ಅದರಲ್ಲೂ ಈ ಕಡುಬಿನ ಜೋಳ ರೈತರ ಹೊಲಗಳಿಂದ ಮಾಯವಾಗುತ್ತಿದೆಯೇನೊ ಎಂಬಂತೆ ಭಾಸವಾಗುತ್ತಿದೆ.



ಬಿಳಿ ಜೋಳದ ಮಾದರಿಯಲ್ಲಿ ಇದರಲ್ಲೂ ಕಡುಗೆಂಪು ಬಣ್ಣದ ಕಾಳುಗಳು ಒತ್ತೊತ್ತಾಗಿ ಬೆಳೆದಿರುತ್ತವೆ. ಹೀಗಾಗಿ ಇದನ್ನು ಕೆಂಪು ಜೋಳ  ಎಂತಲೂ ಕರೆಯುತ್ತಾರೆ. ತಮ್ಮ ಈ ಬಣ್ಣದಿಂದಾಗಿ ಬಿಳಿಜೋಳದ ಹೊಲಕ್ಕೆ ಕೆಂಪು ಬೊಟ್ಟು ಇಟ್ಟಂತೆ ಕಾಣುತ್ತವೆ.



ಇದು ಆರೋಗ್ಯ ದೃಷ್ಟಿಯಿಂದ ಉತ್ತಮ  ಪೋಷಕಾಂಶಗಳನ್ನು ಒಳಗೊಂಡಿದೆ. ದೇಹಕ್ಕೆ ಗಟ್ಟಿತನ ನೀಡುವ ಈ ಜೋಳವನ್ನು ಹಿಟ್ಟು  ಮಾಡಿ, ಗುಂಡಗೆ ಬಿಲ್ಲೆಗಳನ್ನು ತೀಡಿ, ಕುದಿಸಿ  ಬೆಲ್ಲದ ಬೇಳೆಯೊಂದಿಗೆ ಚಪ್ಪರಿಸಿದರೆ ಅದರ ಸ್ವಾದವೇ ಬೇರೆ.

 

ಈ ಕಾರಣಕ್ಕಾಗಿಯೇ  `ಕಡುಬಿನ ಜೋಳ~  ಎಂದು ಇದು ಹೆಸರಾಗಿದ್ದು, ಗರ್ಭಿಣಿಯರು, ಅಶಕ್ತರು, ಮಕ್ಕಳು, ಬಾಣಂತಿಯರಿಗೆ ಉತ್ತಮ ಆಹಾರವಾಗಿದೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.