ಕವಿತೆ ಹೀಗೊಬ್ಬ ಸಂತ

ಸವಾರನೂ ಅಲ್ಲ ಕುದುರೆಯೂ ಅಲ್ಲ

ಓಡುವ ಕುದುರೆಯ ಗೊರಸಿನ ಲಾಳ!

ಗೋಪುರವಲ್ಲ ಗೋಡೆಯೂ ಅಲ್ಲ

ಮೂಲೆಯ ಕಲ್ಲು - ಅಸ್ತಿವಾರ

ಮೋಕ್ಷವಿರದಿದ್ದೀತೆ ಲಾಳಕ್ಕೂ ಕಲ್ಲಿಗೂ

ಹೀಗೂ ಇರಬಹುದೆ ಸಂತ ಕಠಿಣತೆಯ ಸೋಗಿನಲಿ

ಪೂಜಿಸದೆ ಧ್ಯಾನಿಸದೆ

ಎಲ್ಲರಿದಿರಿನಲ್ಲಿ

ಕರೆದರು ಗುರು: ಬಾ ಕೇಳು

ವಚನಾಮೃತ

ನಡೆದರು ಇವರು ಪೇಟೆಗೆ

ತರಬೇಕಿದೆ ದಿನಸಿ ತರಕಾರಿ

ಹಸಿದ ಮಕ್ಕಳಿಗೆ ಉದರಾಮೃತ

ಮತ್ತೆ ಗದರಲು ಗುರು: ಧ್ಯಾನ ಕೂರು ಇಲ್ಲಿ

ಓಡಿದರು ಇವರು ತೋಟಕ್ಕೆ

ಕಚ್ಚಿತೇ ಕಾಯಿ

ತೂಗಿತೇ ಹಣ್ಣು

ಕರೆದವೇ ಹಸುಗಳು ಸರಿಯಾಗಿ

ಕಾದಿದ್ದಾವೆ ಮಕ್ಕಳು ತಟ್ಟೆಯಿದಿರಿನಲ್ಲಿ

ನಗುತ ಅಂದರು ಗುರು ಲಿಂಗದಿದಿರು:

ಶಿವನೇ! ಈತನಿಗೆ ಎಲ್ಲವನು ಹಾಗೇ ನೀಡು