ಕೊನೆ ಗಳಿಗೆಯಲ್ಲಿ ಪಾರಾದ ಚುಕ್ಕಿ

ಚಾಮರಾಜನಗರ: ಕೊನೆ ಗಳಿಗೆಯಲ್ಲಿ ಪ್ರವಾಸ ರದ್ದುಪ­ಡಿಸಿದ ಪರಿಣಾಮ ರೈತ ಸಂಘದ ರಾಜ್ಯ ಘಟಕದ ಕಾರ್ಯಾಧ್ಯಕ್ಷೆ ಚುಕ್ಕಿ ನಂಜುಂಡಸ್ವಾಮಿ ಮಲೇಷ್ಯಾ ವಿಮಾನ ದುರಂತದಿಂದ ಪಾರಾದ ವಿಷಯ ತಡವಾಗಿ ಬೆಳಕಿಗೆ ಬಂದಿದೆ.



ಮಂಗೋಲಿಯಾದ ಉಬಾನ್‌­ಬತ್ತಾರ್‌ನಲ್ಲಿ ಮಾರ್ಚ್ 10ರಿಂದ 14ರವರೆಗೆ ಏಷ್ಯಾ–ಫೆಸಿಫಿಕ್ ಸಮ್ಮೇಳನ ನಡೆಯುತ್ತಿದೆ. ಈ ಸಮ್ಮೇಳನವನ್ನು ವಿಶ್ವಸಂಸ್ಥೆಯ ಆಹಾರ ಮತ್ತು ಕೃಷಿ ಸಂಘಟನೆ ಸಂಘಟಿಸಿದೆ. ಕೃಷಿ ಸಮಸ್ಯೆ ಕುರಿತು ವಿಚಾರ ಮಂಡಿಸಲು ರೈತ ಸಂಘದ ಪರವಾಗಿ ಚುಕ್ಕಿ ಅವರು ಈ ಸಮ್ಮೇಳನದಲ್ಲಿ ಭಾಗವಹಿಸಬೇಕಿತ್ತು.



ನಾಪತ್ತೆಯಾಗಿರುವ ಮಲೇಷ್ಯಾ ವಿಮಾನದಲ್ಲಿಯೇ ತೆರಳಲು ಅವರು ಸಿದ್ಧತೆ ನಡೆಸಿದ್ದರು. ಆದರೆ, ಅಮೃತಭೂಮಿಯಲ್ಲಿ ಹಮ್ಮಿಕೊಂಡಿದ್ದ ರೈತ ಸಂಘದ ಕಾರ್ಯ ಚಟುವಟಿಕೆಗಳ ಸಭೆಯ ಹಿನ್ನೆಲೆಯಲ್ಲಿ ಮಾರ್ಚ್‌ 6ರಂದೇ ಅವರು ಪ್ರವಾಸ ರದ್ದುಪಡಿ­ಸಿದ್ದರು. ಹೀಗಾಗಿ, ಅವರು ದುರಂತದಿಂದ ಪಾರಾಗಿದ್ದಾರೆ.



‘ಅಮೃತಭೂಮಿಯಲ್ಲಿ ರೈತ ಸಂಘದ ಕಾರ್ಯ ಚಟುವಟಿಕೆ ಬಗ್ಗೆ ಚರ್ಚಿಸಲು ವರಿಷ್ಠರೊಂದಿಗೆ ಸಭೆ ನಿಗದಿಯಾ­ಗಿದ್ದರಿಂದ ಅಂತಿಮ ಕ್ಷಣದಲ್ಲಿ ಪ್ರವಾಸ ರದ್ದುಪಡಿಸಿದೆ. ಹೀಗಾಗಿ, ನಾನು ಬದುಕುಳಿದೆ’ ಎಂದು ಚುಕ್ಕಿ ನಂಜುಂಡ­ಸ್ವಾಮಿ ‘ಪ್ರಜಾವಾಣಿ’ಗೆ ತಿಳಿಸಿದರು.