ಜನಾರ್ದನ ರೆಡ್ಡಿ ಕಾರು ಚಾಲಕನ ಮನೆಯಲ್ಲಿ ರೂ. 4 ಲಕ್ಷ ಪತ್ತೆ

ಹೈದರಾಬಾದ್ (ಐಎಎನ್ಎಸ್): ಆಂಧ್ರ ಪ್ರದೇಶ ಪೊಲೀಸರು ಶನಿವಾರ ಬಂಧಿತ ಮಾಜಿ ಸಚಿವ ಗಾಲಿ ಜನಾರ್ದನ ರೆಡ್ಡಿ ಅವರ ಕಾರು ಚಾಲಕನ ಮನೆಯಿಂದ 4 ಲಕ್ಷ ರೂಪಾಯಿಗಳನ್ನು ವಶಪಡಿಸಿಕೊಂಡಿದ್ದಾರೆ.

ಪೊಲೀಸರು ಅಕ್ರಮ ಗಣಿಗಾರಿಕೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಾಜಿ ಸರ್ಕಾರಿ ಅಧಿಕಾರಿಯೊಬ್ಬರ ಬಂಧುಗಳ ಮನೆ ಶೋಧನೆಯನ್ನೂ ನಡೆಸಿದ್ದಾರೆ.



ಅನಂತಪುರ ಪಟ್ಟಣದಲ್ಲಿ ಪೊಲೀಸರು ಕರ್ನಾಟಕದ ಮಾಜಿ ಸಚಿವರ ಮನೆಯ ಕಾರು ಚಾಲಕ ಬಾಷಾ ಮನೆಯಲ್ಲಿ ಶೋಧ ನಡೆಸಿ 4 ಲಕ್ಷ ರೂಪಾಯಿ ನಗದು ಹಣ, 2 ಕಿಲೋ ಗ್ರಾಂ ಬೆಳ್ಳಿ ವಸ್ತುಗಳು ಮತ್ತು ಕೆಲವು ದಾಖಲೆಗಳನ್ನು ವಶಪಡಿಸಿಕೊಂಡರು.



ಚಾಲಕನ ವಿಚಾರಣೆಯನ್ನು ಪೊಲೀಸರು ಮುಂದುವರೆಸಿದ್ದಾರೆ ಎಂದು ಮೂಲಗಳು ಹೇಳಿವೆ.



ಗಣಿಗಾರಿಕಾ ಇಲಾಖೆಯ ಮಾಜಿ ನಿರ್ದೇಶಕ ವಿ.ಡಿ. ರಾಜಗೋಪಾಲ್ ಅವರ ಮನೆಗಳಲ್ಲೂ ಪೊಲೀಸರು ಶೋಧ ಮುಂದುವರೆಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.



ಈ ನಡುವೆ ಅನಂತಪುರ ಜಿಲ್ಲಾ ನ್ಯಾಯಾಲಯವು ಇನ್ನೊಬ್ಬ ಕಾರು ಚಾಲಕ ವೆಂಕಟರಾಮಿ ರೆಡ್ಡಿ ಮತ್ತು ಸಹಾಯಕ ಈಶ್ವರ ರೆಡ್ಡಿಯನ್ನು ಶನಿವಾರ ಪೊಲೀಸ್ ವಶಕ್ಕೆ ಒಪ್ಪಿಸಿತು. ಇವರಿಬ್ಬರ ಬಳಿ ಇದ್ದ ವಾಹನದಿಂದ 5.9 ಕೋಟಿ ರೂಪಾಯಿಗಳ ನೋಟುಗಳ ಕಂತೆಯನ್ನು ವಶ ಪಡಿಸಿಕೊಳ್ಳಲಾಗಿತ್ತು.