ನಾನೇ ಪ್ರಧಾನಿ: ಪ್ರಯೂತ್‌

ಬ್ಯಾಂಕಾಕ್‌ (ಐಎನ್‌ಎಸ್‌): ಥಾಯ್ಲೆಂಡ್‌ ಸೇನಾ ಮುಖ್ಯಸ್ಥ ಪ್ರಯೂತ್‌ ಚನೊಚ ಅವರು ಗುರು­ವಾರ ಕ್ಷಿಪ್ರ ಕ್ರಾಂತಿ ಘೋಷಿಸಿದ ಬೆನ್ನಲ್ಲೇ ಪ್ರಧಾನಿ ಹುದ್ದೆಗೆ ಸೂಕ್ತ ಅಭ್ಯರ್ಥಿಯ ನೇಮಕ ಆಗುವವರೆಗೂ ತಾವೇ ಪ್ರಧಾನಿಯಾಗಿ ಮುಂದುವರಿ­ಯುವು­ದಾಗಿ ಹೇಳಿಕೊಂಡಿದ್ದಾರೆ.



ಈಗಿರುವ ಕಾನೂನಿನ ಪ್ರಕಾರ ಪ್ರಧಾನಿಯವರಿಗೇ  ಎಲ್ಲ ಹಕ್ಕು­ಗಳು ಇರುತ್ತವೆಯಾದ್ದರಿಂದ ಪ್ರಧಾನಿ ಸ್ಥಾನಕ್ಕೆ ಸೂಕ್ತ ಅಭ್ಯರ್ಥಿಯ ಆಯ್ಕೆ ಆಗುವವರೆಗೂ ಚನೊಚ ಅವರೇ ಪ್ರಧಾನಿಯಾಗಿ­ರು­ತ್ತಾರೆ ಎಂದು ರಾಷ್ಟ್ರೀಯ ಕಾನೂನು ಸುವ್ಯವಸ್ಥೆ ನಿರ್ವಹಣಾ ಮಂಡಳಿ (ಎನ್‌ಪಿಒಎಂಸಿ) ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.



ಈ ನಡುವೆ ಸೇನಾ ಮುಖ್ಯಸ್ಥ ಚನೊಚಾ ಅವರು ಎನ್‌ಪಿಒಎಂಸಿ ಮುಖಂಡರಾಗಿರುತ್ತಾರೆ ಎಂಬ ಘೋಷ­ಣೆಯೂ ಹೊರ ಬಿದ್ದಿದ್ದು,   ಆಡಳಿತದ ನಿರ್ವಹಣೆ­ಗಾಗಿ ಅವರು ಪ್ರಧಾನಿ­ಯಾಗಿರುತ್ತಾರೆ ಎನ್ನಲಾಗಿದೆ. ದೇಶದ ಸಂವಿಧಾನವನ್ನು ತಾತ್ಕಾಲಿಕ­ವಾಗಿ ಅಮಾ­ನ­ತ್ತಿ­ನಲ್ಲಿ ಇಡಲಾಗಿ­ದ್ದರೂ, ಸಂಸತ್ತು ಮತ್ತು ಸ್ವತಂತ್ರ ಏಜೆನ್ಸಿ­ಗಳು ಕರ್ತವ್ಯ ನಿರ್ವಹಿಸಲು ಸಾಧ್ಯವಾಗ­ಲಿದೆ ಎಂದಿರುವ ಎನ್‌ಪಿಒಎಂಸಿ, ಶುಕ್ರವಾರದಿಂದ ಭಾನುವಾರ­ದವರೆಗೆ ಶಿಕ್ಷಣ ಸಂಸ್ಥೆಗಳನ್ನು ಅಮಾನತ್ತಿ­ನಲ್ಲಿ ಇಡುವ ಆದೇಶ  ಹೊರಡಿಸಿದೆ.



ಕ್ಷಿಪ್ರ ಕ್ರಾಂತಿಯ ಘೋಷಣೆ­ಯಿಂ­ದಾಗಿ ಟಿ.ವಿ ಮತ್ತು ರೇಡಿಯೊ ಮಾಧ್ಯಮ­ಗಳಿಗೆ ಸಾಂಪ್ರದಾಯಿಕ ಸಂಗೀತ ಕಾರ್ಯಕ್ರಮವನ್ನು ಮಾತ್ರವೇ ಪ್ರಸಾರ ಮಾಡುವಂತೆ ನಿರ್ಬಂಧ ವಿಧಿಸಿರುವುದು ಬಿಟ್ಟರೆ, ಇತರೆ ಸಂಪರ್ಕ ಮಾಧ್ಯಮಗಳಾದ ಪತ್ರಿಕೆಗಳು, ಅಂತ­ರ್ಜಾಲ, ಮೊಬೈಲ್‌ ಫೋನ್‌ಗಳ ಬಳ­ಕೆ ಮೇಲೆ ಯಾವುದೇ ಪರಿಣಾಮ ಬೀರಿಲ್ಲ.



ಆದರೆ  ಪತ್ರಿಕೆಗಳು ಮತ್ತು ಅಂತ­ರ್ಜಾಲ ಸೇರಿದಂತೆ ಎಲ್ಲ ಮಾಧ್ಯಮ­ಗಳಿಗೆ ಸರ್ಕಾರದ ಮಾಜಿ ಅಧಿಕಾರಿ­ಗಳು, ಶಿಕ್ಷಣ ತಜ್ಞರು, ನ್ಯಾಯಾಧೀ­ಶರು ಮತ್ತು ಸ್ವತಂತ್ರ ಸಂಸ್ಥೆಯ ಸದಸ್ಯರ ಸಂದರ್ಶನ­ಗಳನ್ನು ಪ್ರಕಟಿಸ­ದಂತೆ ಆದೇಶ ಹೊರಡಿಸಲಾಗಿದೆ.

ಸರ್ಕಾರಿ ಸಂಸ್ಥೆಗಳು ಸಹಜವಾಗಿ ಕಾರ್ಯ ನಿರ್ವಹಿ­ಸ­ಲಿದ್ದು, ಶಸ್ತ್ರಾಸ್ತ್ರಗಳ ಬಳಕೆಯನ್ನು ನಿಷೇಧಿಸಲಾಗಿದೆ.



ಅಮೆರಿಕ ಖಂಡನೆ

ವಾಷಿಂಗ್ಟನ್‌ (ಪಿಟಿಐ): ಥಾಯ್ಲೆಂಡ್‌ ಸೇನೆ ದೇಶ­ದಲ್ಲಿ ಕ್ಷಿಪ್ರ ಕ್ರಾಂತಿ ಘೋಷಿಸಿರುವುದಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿರುವ ಅಮೆರಿಕ, ಥಾಯ್ಲೆಂಡ್‌­ನೊಂದಿಗಿನ ಸೇನೆ ಹಾಗೂ ಇತರೆ ವ್ಯವಹಾರ­ಗಳನ್ನು ಮರು­ಪರಿಶೀಲಿಸುವ ಎಚ್ಚರಿಕೆ ನೀಡಿದೆ.

ಅಲ್ಲದೇ ಸೇನೆಯ ಕ್ರಮ ಯಾವುದೇ ಕಾರಣಕ್ಕೂ ಸಮರ್ಥನೀಯ­ವಾದುದಲ್ಲ ಎಂದಿರುವ ಅಮೆರಿಕ, ಆದಷ್ಟು ಬೇಗ ಪ್ರಜಾಪ್ರಭುತ್ವವನ್ನು ಮರು ಸ್ಥಾಪಿ­ಸುವ ಅಗತ್ಯವಿದೆ ಎಂದು ಅಭಿಪ್ರಾಯಪಟ್ಟಿದೆ.



ಶಿನವತ್ರಾ ಕುಟುಂಬಕ್ಕೆ ಸಮನ್ಸ್

ಬ್ಯಾಂಕಾಕ್‌ (ಎಪಿ): ಕ್ಷಿಪ್ರ ಕ್ರಾಂತಿ ಘೋಷಿಸಿದ ಒಂದು ದಿನದ ಬಳಿಕ ಥಾಯ್ಲೆಂಡ್‌ ಸೇನೆಯು, ಸರ್ಕಾರ ಮತ್ತು ರಾಜಕೀಯ ಪ್ರಭಾವ ಹೊಂದಿ­­ರುವ ಸದಸ್ಯರ ಕುಟುಂಬ­ಗಳಿಗೆ ಸಮನ್ಸ್‌ ಜಾರಿ ಮಾಡಿದೆ.

ಪದಚ್ಯುತ ಪ್ರಧಾನಿ ಯಿಂಗ್ಲಕ್‌ ಶಿನವತ್ರಾ ಹಾಗೂ ಅವರ ಪ್ರಭಾವ ಹೊಂದಿರುವ ನೂರಕ್ಕೂ ಹೆಚ್ಚು ಸದಸ್ಯ­ರಿಗೆ ಸಮನ್ಸ್‌ ಜಾರಿ ಮಾಡಿ­ರುವುದು ಏಕೆ ಎಂಬ ವಿಷಯ ಇನ್ನೂ ಸ್ಪಷ್ಟ­ವಾಗಿಲ್ಲ. ಆದರೆ ದೇಶದ ಬಿಕ್ಕ­ಟ್ಟಿನ ಪರಿಹಾರ ಹಾಗೂ ಕಾನೂನು ಸುವ್ಯವಸ್ಥೆ ಕಾಪಾಡುವ ಉದ್ದೇಶ­ದಿಂದ ಈ ಕ್ರಮ  ಕೈಗೊಳ್ಳಲಾಗಿದೆ ಎಂದು ಸೇನೆ ಸಮರ್ಥಿಸಿ­ಕೊಂಡಿದೆ.



ಈ ನಡುವೆ ಶಿನವತ್ರಾ ಅವರು ಶುಕ್ರವಾರ ಮಧ್ಯಾಹ್ನ ಸೇನಾ ಕಚೇ­ರಿಗೆ ಆಗಮಿಸಿದ ವಿಚಾರ­ವನ್ನು ಖಚಿತ­ಪಡಿಸಿರುವ ಅವರ ಸಹಾಯಕ, ‘ಕಚೇರಿಗೆ ಭೇಟಿ ನೀಡಿದ ಅರ್ಧ ಗಂಟೆ­ಯಲ್ಲಿ ಶಿನವತ್ರಾ ಅವರು ತಮಗೆ ನೀಡ­ಲಾಗಿದ್ದ ಸವಲತ್ತು­ಗಳನ್ನು ಬಿಟ್ಟುಕೊಟ್ಟರು.



ನಂತರ ಯೋಧರು ಅವರನ್ನು ಬೇರೆ ಸೇನಾ ಸ್ಥಳಕ್ಕೆ ಕರೆದು­ಕೊಂಡು ಹೋದರು’ ಎಂದು ತಿಳಿಸಿದ್ದಾರೆ. ಕ್ಷಿಪ್ರ ಕ್ರಾಂತಿ ಹಾಗೂ ನಿಷೇಧಾ­ಜ್ಞೆಯ ಹಿನ್ನೆಲೆ­ಯಲ್ಲಿ ಶುಕ್ರವಾರ ಬ್ಯಾಂಕಾಕ್‌ ನಗರದ ರಸ್ತೆಗಳಲ್ಲಿ ಸೇನಾ ತುಕಡಿಗಳ ಉಪಸ್ಥಿತಿ ಕಂಡು ಬರಲಿಲ್ಲ.