ಸೋಮವಾರ, ಆಗಸ್ಟ್ 3, 2020
27 °C

ಮಂಗಳನ ಅಂಗಳಕ್ಕೆ ಗಗನ ನೌಕೆ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಮಂಗಳನ ಅಂಗಳಕ್ಕೆ ಗಗನ ನೌಕೆ

ಬೆಂಗಳೂರು:  `ಮಂಗಳ ಗ್ರಹದ ಸಮಗ್ರ ಅಧ್ಯಯನಕ್ಕೆ ಅಕ್ಟೋಬರ್ ಕೊನೆಯ ವಾರದಲ್ಲಿ ಗಗನ ನೌಕೆ  ಕಳುಹಿಸಲಾಗುವುದು' ಎಂದು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ (ಇಸ್ರೊ) ಅಧ್ಯಕ್ಷ ಡಾ.ಕೆ.ರಾಧಾಕೃಷ್ಣನ್ ಪ್ರಕಟಿಸಿದರು.



ನಗರದ ಜವಾಹರಲಾಲ್ ನೆಹರೂ ತಾರಾಲಯದಲ್ಲಿ ಸೋಮವಾರ ನಡೆದ ಸಮಾರಂಭದಲ್ಲಿ `ನಮ್ಮ ಸೌರವ್ಯೆಹ' ಪ್ರದರ್ಶನ ಉದ್ಘಾಟಿಸಿ ಅವರು ಮಾತನಾಡಿದರು.



`ಗಗನನೌಕೆಯನ್ನು ಶ್ರೀಹರಿಕೋಟಾದಿಂದ ಉಡಾವಣೆ ಮಾಡಲು ಎಲ್ಲ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗುತ್ತಿದೆ. ಮಂಗಳನ ಅಂಗಳದಲ್ಲಿ ಮಿಥೆನ್ ರೂಪುಗೊಂಡ ಬಗೆಗೆ ನೌಕೆ ವಿಶೇಷ ಅಧ್ಯಯನ ನಡೆಸಲಿದೆ' ಎಂದು ತಿಳಿಸಿದರು.



ಅಧ್ಯಕ್ಷತೆ ವಹಿಸಿದ್ದ ಹಿರಿಯ ವಿಜ್ಞಾನಿ ಪ್ರೊ. ಯು.ಆರ್. ರಾವ್, `ನೂರಾರು ವರ್ಷಗಳಿಂದ ಸಂಶೋಧನೆಗಳು ನಡೆದಿದ್ದರೂ ಭೂಮಿಯ ಕುರಿತು ನಾವು ತಿಳಿದುಕೊಂಡಿದ್ದು ಅತ್ಯಲ್ಪವಾದುದು' ಎಂದು ಹೇಳಿದರು.



`ಭೂಮಿಯಲ್ಲಿ ನೀರಿನ ಲಭ್ಯತೆ ಇದೆ. ಆಮ್ಲಜನಕ ಹೇರಳವಾಗಿದೆ. ಆದರೆ, ಪಕ್ಕದ ಗ್ರಹಗಳಾದ ಮಂಗಳ, ಶುಕ್ರನಲ್ಲಿ ಏಕಿಲ್ಲ,  ಸೌರ ಮಂಡಲ ಅಷ್ಟೊಂದು ಬಿಸಿಯಾಗಿರುವುದು ಏಕೆ ಎಂಬಂತಹ ಸಾವಿರಾರು ಪ್ರಶ್ನೆಗಳಿಗೆ ನಮಗೆ ಉತ್ತರ ಕಂಡುಕೊಳ್ಳಲು ಆಗಿಲ್ಲ' ಎಂದರು.



`ನಮ್ಮದು ಮುಂದುವರಿದ ನಾಗರಿಕತೆ ಎಂದು ಹೇಳಲಾಗುತ್ತಿದೆ. ವಿಜ್ಞಾನದ ವಿಷಯ ಬಂದಾಗ ನಾವಿನ್ನೂ ನಾಗರಿಕತೆ ಮೊದಲ ಮೆಟ್ಟಿಲಲ್ಲಿದ್ದೇವೆ ಎನಿಸುತ್ತದೆ. ತಿಳಿದಿರುವುದು ಅಲ್ಪವಾಗಿದ್ದು, ತಿಳಿಯಲಾರದ್ದು ಬ್ರಹ್ಮಾಂಡದಷ್ಟಿದೆ' ಎಂದು ಹೇಳಿದರು.

`ಮಕ್ಕಳಲ್ಲಿ ಕುತೂಹಲ ಕೆರಳಿಸುವಂತಹ ಇಂತಹ ಪ್ರದರ್ಶನಗಳು ಪ್ರತಿ ಜಿಲ್ಲೆಯಲ್ಲೂ ನಡೆಯಬೇಕು. ಧಾರವಾಡ ಮತ್ತು ಉಡುಪಿಗಳಲ್ಲಿ ಈ ನಿಟ್ಟಿನಲ್ಲಿ ಸಣ್ಣ ಪ್ರಯತ್ನ ನಡೆದಿದೆ' ಎಂದು ತಿಳಿಸಿದರು. ತಾರಾಲಯದ ನಿರ್ದೇಶಕಿ ಡಾ. ಬಿ.ಎಸ್. ಶೈಲಜಾ ಹಾಜರಿದ್ದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.