ಮಂಗಳವಾರ, ಮೇ 11, 2021
27 °C

ಮಾನಸಿಕ ದೌರ್ಬಲ್ಯದ ಮಕ್ಕಳನ್ನು ಕಡೆಗಣಿಸಬಾರದು

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಬೆಂಗಳೂರು: `ಮಾನಸಿಕ ದೌರ್ಬಲ್ಯ ಹೊಂದಿರುವ ಮಕ್ಕಳನ್ನು ಸಮಾಜದಲ್ಲಿ ಕಡೆಗಣಿಸಬಾರದು. ಅವರನ್ನು ಸಮಾಜದ ಅಂಗವಾಗಿ ಪರಿಗಣಿಸಬೇಕು~ ಎಂದು ರಾಜ್ಯಪಾಲ ಎಚ್.ಆರ್.ಭಾರದ್ವಾಜ್ ಅಭಿಪ್ರಾಯಪಟ್ಟರು.

ಅಸೋಸಿಯೇಷನ್ ಫಾರ್ ದಿ ಮೆಂಟಲಿ ಚಾಲೆಂಜ್ಡ್ (ಎಎಂಸಿ) ಸಂಸ್ಥೆ ಶುಕ್ರವಾರ ನಗರದ ರವೀಂದ್ರ ಕಲಾಕ್ಷೇತ್ರದಲ್ಲಿ ಹಮ್ಮಿಕೊಂಡಿದ್ದ ಸಂಸ್ಥೆಯ ಸುವರ್ಣ ಮಹೋತ್ಸವ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು.



`ಮಾನಸಿಕ ದೌರ್ಬಲ್ಯ ಪ್ರಕೃತಿದತ್ತವಾದುದು. ಅದು ಹುಟ್ಟಿನಿಂದ ಬರುವಂತಹದು. ಸಮಾಜದಲ್ಲಿ ಇತರರಂತೆ ಬದುಕುವ ನೆಲೆ ರೂಪಿಸುವ ಮೂಲಕ ಅವರಲ್ಲಿರುವ ಮಾನಸಿಕ ಕೊರತೆಯನ್ನು ನೀಗಿಸುವಲ್ಲಿ ಇಂತಹ ಸಂಸ್ಥೆಗಳ ಪಾತ್ರ ಅಗತ್ಯ~ ಎಂದು ನುಡಿದರು.



`ಎಲ್ಲರಲ್ಲೂ ಪ್ರತಿಭೆಗಳು ಸುಪ್ತವಾಗಿ ಅಡಕವಾಗಿರುತ್ತವೆ. ಇಂತಹ ಮಕ್ಕಳಲ್ಲಿರುವ ಪ್ರತಿಭೆಗಳನ್ನು ಹೊರತರುವಲ್ಲಿ ತಾಯಂದಿರ ಪಾತ್ರ ಮಹತ್ವದಾಗಿದೆ. ಮಾನಸಿಕ ದೌರ್ಬಲ್ಯತೆಯುಳ್ಳ ಮಕ್ಕಳ ಆರೈಕೆಗೆ ತಾಯಂದಿರು ಹೆಚ್ಚಿನ ಕಾಳಜಿ ವಹಿಸಬೇಕು~ ಎಂದರು.



`ಕಾಲಚಕ್ರ ಬದಲಾದಂತೆ ವ್ಯಕ್ತಿಯ ಜೀವನದ ಘಟ್ಟಗಳು ಬದಲಾಗುತ್ತವೆ. ಇಂದು ಯುವಕರಾದವರು ನಾಳೆ ವೃದ್ಧರಾಗುತ್ತಾರೆ. ಇದೆಲ್ಲಾ ಪ್ರಕೃತಿ ನಿಯಮ. ಈ ಮಕ್ಕಳನ್ನು ಮಾನಸಿಕ ದೌರ್ಬಲ್ಯರೆಂದು ಪರಿಗಣಿಸದೆ ಅವರನ್ನು ಕ್ರಿಯಾತ್ಮಕ ಚಟುವಟಿಕೆಯಲ್ಲಿ ತೊಡಗಿಸಿ ಅವರಲ್ಲಿರುವ ಸೃಜನಶೀಲತೆಯನ್ನು ಬೆಳಕಿಗೆ ತರಬೇಕು~ ಎಂದರು.



`ಕರ್ನಾಟಕ ಸಾಮಾಜಿಕ ಸೇವಾ ಕಾರ್ಯಗಳಿಗೆ ಉತ್ತಮ ತಾಣವಾಗಿದೆ. ನಾನು ರಾಜ್ಯಪಾಲನಾಗಿ ಬಂದ ದಿನದಿಂದ ಹಲವಾರು ಸಾಮಾಜಿಕ ಸೇವೆಯಲ್ಲಿ ತೊಡಗಿರುವ ಸಂಸ್ಥೆಗಳನ್ನು ನೋಡಿದ್ದೇನೆ. ಸಾಮಾಜಿಕ ಸೇವೆಗಳಿಗೆ ಸಂಬಂಧಿಸಿದಂತೆ ಯೋಜನೆಗಳನ್ನು ಜಾರಿಗೆ ತರಲು ಕರ್ನಾಟಕದಲ್ಲಿ ಉತ್ತಮ ವಾತಾವರಣವಿದೆ~ ಎಂದು ಪ್ರಶಂಸಿದರು.



`ಸಾಮಾಜಿಕ ಕಾರ್ಯದಲ್ಲಿ ತೊಡಗುವ ಯಾವುದೇ ಸಂಸ್ಥೆಗಳಿಗೆ ರಾಜಭವನದ ಬಾಗಿಲು ಸದಾ ತೆರೆದಿರುತ್ತದೆ. ಇಂತಹ ಕಾರ್ಯದಲ್ಲಿ ತೊಡಗುವ ಸಂಸ್ಥೆಗಳಿಗೆ ನೆರವು ನೀಡುತ್ತೇನೆ~ ಎಂದು ಹೇಳಿದರು.

ಸುವರ್ಣ ಮಹೋತ್ಸವದ ಅಂಗವಾಗಿ ಬೆಂಗಳೂರು ಲಿಟಲ್ ಥಿಯೇಟರ್ ತಂಡದವರು `ರೊಬಿಸ್ ಗಾರ್ಡನ್~ ನಾಟಕ ಪ್ರದರ್ಶಿಸಿದರು.



ಸಂಸ್ಥೆಯ ಮುಖ್ಯಸ್ಥ ಕೆ.ಜೈರಾಜ್, ಸಂಸ್ಥಾಪಕ ಸದಸ್ಯೆ ಸುಧಾರೆಡ್ಡಿ, ಗೌರವ ಕಾರ್ಯದರ್ಶಿ ಮೀರಾ ರಾಮಚಂದ್ ಉಪಸ್ಥಿತರಿದ್ದರು.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.