ರಾಷ್ಟ್ರಪತಿ ಮತದಾನ ಮಾಡಲ್ಲ!

ನವದೆಹಲಿ (ಪಿಟಿಐ): ಈ ಬಾರಿಯ ಲೋಕಸಭಾ ಚುನಾವಣೆಯಲ್ಲಿ ದೇಶದ ಪ್ರಥಮ ಪ್ರಜೆ, ರಾಷ್ಟ್ರಪತಿ ಪ್ರಣವ್‌ ಮುಖರ್ಜಿ ಮತದಾನ ಮಾಡುವುದಿಲ್ಲ.



ಹೌದು, ರಾಷ್ಟ್ರಪತಿಗಳ ಪತ್ರಿಕಾ ಕಾರ್ಯದರ್ಶಿ ವೇಣು ರಾಜಮೊನಿ ಅವರೇ ಸ್ವತಃ ಈ ವಿಷಯ ಸ್ಪಷ್ಟಪಡಿಸಿದ್ದಾರೆ.

ರಾಜಕೀಯ ಜಿದ್ದಾಜಿದ್ದಿ ಚುನಾವಣೆಯಲ್ಲಿ ಯಾವುದೇ ಒಂದು ಪಕ್ಷದ ಪರ ಮತದಾನ ಮಾಡದೆ ತಟಸ್ಥವಾಗಿರುವ ದಿಸೆಯಲ್ಲಿ ಈ ಹಿಂದಿನ ರಾಷ್ಟ್ರಪತಿಗಳಲ್ಲಿ ಬಹುತೇಕರು ಪಾಲಿಸಿಕೊಂಡುಬಂದ ಸಂಪ್ರದಾಯದಂತೆ ಪ್ರಣವ್‌ ಅವರೂ ಸಾರ್ವತ್ರಿಕ ಚುನಾವಣೆಯಲ್ಲಿ ಮತದಾನ ಮಾಡದೇ ಇರಲು ನಿರ್ಧರಿಸಿದ್ದಾರೆ ಎನ್ನಲಾಗಿದೆ.



ಪ್ರಣವ್‌ ದಕ್ಷಿಣ ಕೋಲ್ಕತ್ತ ಲೋಕಸಭಾ ಕ್ಷೇತ್ರದ ಮತದಾರರಾಗಿದ್ದು ಮೇ 12 ರಂದು ಇಲ್ಲಿ ಚುನಾವಣೆ ನಡೆಯಲಿದೆ. ಕ್ಷೇತ್ರಕ್ಕೆ ತೆರಳಿ ಮತದಾನ ಮಾಡುವು­ದಕ್ಕಿಂತ ಅಂಚೆ ಮೂಲಕವೇ ಮತದಾನ ಮಾಡುವುದಕ್ಕೆ ಈ ಮೊದಲು ಪ್ರಣವ್‌ ನಿರ್ಧರಿಸಿದ್ದರು, ಆದರೆ ನಂತರ ಈ ನಿರ್ಧಾರವನ್ನು ಬದಲಿಸಿ­ದ್ದಾರೆ ಎಂದು ತಿಳಿಸಲಾಗಿದೆ.



ದಕ್ಷಿಣ ಕೋಲ್ಕತ್ತ ಕ್ಷೇತ್ರದಲ್ಲಿ ಬಹುಕೋನ ಸ್ಪರ್ಧೆ ಏರ್ಪಟ್ಟಿದ್ದು ಹಾಲಿ ಸಂಸದ ತೃಣಮೂಲ ಕಾಂಗ್ರೆಸ್‌ನ ಸುಬ್ರತಾ ಬಕ್ಷಿ ಅವರು, ಬಿಜೆಪಿ, ಕಾಂಗ್ರೆಸ್‌ ಹಾಗೂ ಸಿಪಿಎಂ­ಗಳಿಂದ ತೀವ್ರ ಸ್ಪರ್ಧೆ ಎದುರಿಸುತ್ತಿದ್ದಾರೆ.