ವಿಪ್ರೊ ಲಾಭ ರೂ 1,623 ಕೋಟಿ

ನವದೆಹಲಿ (ಪಿಟಿಐ): ಜೂನ್ 30ಕ್ಕೆ ಕೊನೆಗೊಂಡ ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ದೇಶದ ಪ್ರಮುಖ ಐ.ಟಿ ಕಂಪೆನಿ ವಿಪ್ರೊ ರೂ1,623 ಕೋಟಿ ನಿವ್ವಳ ಲಾಭ ಗಳಿಸಿದೆ.



2012-13ನೇ ಸಾಲಿನ ಏಪ್ರಿಲ್-ಜೂನ್ ತ್ರೈಮಾಸಿಕದಲ್ಲಿ ರೂ1,580 ಕೋಟಿ ನಿವ್ವಳ ಲಾಭವಾಗಿತ್ತು. ಅದಕ್ಕೆ ಹೋಲಿಸಿದರೆ ಈ ಬಾರಿ ಲಾಭ ಗಳಿಕೆ ಯಲ್ಲಿ ಶೇ 2.7ರಷ್ಟು ಏರಿಕೆಯಾಗಿದೆ.ಪ್ರಸಕ್ತ ಅವಧಿಯಲ್ಲಿ ಕಂಪೆನಿ ಒಟ್ಟಾರೆ ಮಾರಾಟ ಶೇ 5ರಷ್ಟು ಹೆಚ್ಚಿದ್ದು ರೂ9,733 ಕೋಟಿಗಳಷ್ಟಾಗಿದೆ.ಪ್ರಸಕ್ತ ಹಣಕಾಸು ವರ್ಷದ ಎರಡನೆಯ ತ್ರೈಮಾಸಿಕದಲ್ಲಿ (ಜುಲೈ-ಸೆಪ್ಟೆಂಬರ್) ಕಂಪೆನಿ 162 ಕೋಟಿಯಿಂದ 165 ಕೋಟಿ ಡಾಲರ್‌ನಷ್ಟು ವರಮಾನ ಅಂದಾಜು ಮಾಡಿದೆ.



ವರಮಾನದಲ್ಲಿ ಹಿಂದೆ

ಪ್ರತಿಸ್ಪರ್ಧಿ ಕಂಪೆನಿಗಳಾದ ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್(ಟಿಸಿಎಸ್) ಮತ್ತು ಇನ್ಫೊಸಿಸ್‌ಗೆ ಹೋಲಿಸಿದರೆ ವಿಪ್ರೊ ವರಮಾನ ಪ್ರಗತಿಯಲ್ಲಿ ಹಿಂದಿದೆ. ಈ ಎರಡೂ ಕಂಪೆನಿಗಳು ಮೊದಲ ತ್ರೈಮಾಸಿಕದಲ್ಲಿ ಕ್ರಮವಾಗಿ ಶೇ 21 ಮತ್ತು ಶೇ 17ರಷ್ಟು ಪ್ರಗತಿ ದಾಖಲಿಸಿವೆ. `ಟಿಸಿಎಸ್' ನಿವ್ವಳ ಲಾಭ ಶೇ 16ರಷ್ಟು ಏರಿಕೆ ಕಂಡಿದ್ದರೆ, ಇನ್ಫೊಸಿಸ್ ಲಾಭ ಶೇ 3.7ರಷ್ಟು ಹೆಚ್ಚಿದೆ. ಆದರೆ, ವಿಪ್ರೊ ನಿವ್ವಳ ಲಾಭ ಕೇವಲ ಶೇ 2.7ರಷ್ಟು ಏರಿಕೆ ಕಂಡಿದೆ. ಏಪ್ರಿಲ್-ಜೂನ್ ತ್ರೈಮಾಸಿಕದಲ್ಲಿ ಕಂಪೆನಿಯ ಒಟ್ಟಾರೆ ವರಮಾನ ಶೇ 11ರಷ್ಟು ಹೆಚ್ಚಿದ್ದು 2730 ಕೋಟಿ ಡಾಲರ್‌ಗಳಷ್ಟಾಗಿದೆ. ಐ.ಟಿ ಸೇವೆ ವರಮಾನ ಶೇ 4.9ರಷ್ಟು ಏರಿಕೆಯಾಗಿ, ರೂ8,936 ಕೋಟಿಯಷ್ಟಾಗಿದೆ. ಮುಂದಿನ ವಾರ್ಷಿಕ ಮಹಾ ಸಭೆಗಿಂತ ಮುನ್ನ ಕಂಪೆನಿ ಆಡಳಿತ ಮಂಡಳಿಗೆ ಹೊಸದಾಗಿ `ನಿರ್ದೇಶಕಿ'ಯೊಬ್ಬರು ಸೇರ್ಪಡೆಯಾಗಲಿದ್ದಾರೆ ಎಂದು ಪ್ರೇಮ್‌ಜಿ ಇದೇ ವೇಳೆ ಪ್ರಕಟಿಸಿದರು.

ಪ್ರೇಮ್‌ಜಿ ವಿಶ್ವಾಸ

`ಅಮೆರಿಕ ಸೇರಿದಂತೆ ಒಟ್ಟಾರೆ ಜಾಗತಿಕ ಅರ್ಥವ್ಯವಸ್ಥೆ ಚೇತರಿಸಿಕೊಳ್ಳುತ್ತಿದೆ. ಈ ಹಿನ್ನೆಲೆಯಲ್ಲಿ ಮುಂದಿನ ತ್ರೈಮಾಸಿಕಗಳಲ್ಲಿ ಇನ್ನಷ್ಟು ಗ್ರಾಹಕ ಸಂಸ್ಥೆಗಳು ಸೇರ್ಪಡೆಯಾಗುವ ನಿರೀಕ್ಷೆ ಇದ್ದು, ಮುಂದಿನ ಅವಧಿಗೆ ಎರಡಂಕಿ ಪ್ರಗತಿ ದಾಖಲಿಸಲಿದ್ದೇವೆ' ಎಂದು ವಿಪ್ರೊ ಅಧ್ಯಕ್ಷ ಅಜೀಂ ಪ್ರೇಮ್‌ಜಿ ವಿಶ್ವಾಸ ವ್ಯಕ್ತಪಡಿಸಿದರು.



ಶುಕ್ರವಾರ ಇಲ್ಲಿ ವಾರ್ಷಿಕ ಮಹಾ ಸಭೆಯಲ್ಲಿ(ಎಜಿಎಂ) ಮಾತನಾಡಿದ ಅವರು, 3-4 ತಿಂಗಳ ಹಿಂದಿನ ಸ್ಥಿತಿಗೆ ಹೋಲಿಸಿದರೆ, ಈಗ ಅಮೆರಿಕ ಮಾರುಕಟ್ಟೆ ಸಾಕಷ್ಟು ಚೇತರಿಸಿದೆ. ಗ್ರಾಹಕರ ವಿಶ್ವಾಸ ಹೆಚ್ಚಿದೆ. ಷೇರುಪೇಟೆಗಳಲ್ಲಿ ಸಹ ಇದರ ಫಲಿತಾಂಶ ಕಂಡುಬರತೊಡಗಿದೆ ಎಂದರು.



`ದೇಶದ ಕೈಗಾರಿಕಾ ಪ್ರಗತಿ ಇನ್ನೂ ನಿರಾಶಾದಾಯಕವಾಗಿದೆ. ಬೃಹತ್ ಯೋಜನೆಗಳು ಜಾರಿಯಾಗದೆ ವಿಳಂಬವಾಗುತ್ತಿವೆ' ಎಂದು ಅವರು ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು.ಶುಕ್ರವಾರ ಮುಂಬೈ ಷೇರುಪೇಟೆಯಲ್ಲಿ ವಿಪ್ರೊ ಷೇರು ಮೌಲ್ಯ ಶೇ 1.74ರಷ್ಟು ಏರಿಕೆ ಕಂಡು ರೂ 382.80ರಲ್ಲಿ ವಹಿವಾಟು ನಡೆಸಿತು.