ಮಂಗಳವಾರ, ಜನವರಿ 28, 2020
24 °C

ಹಡಗು ಕ್ಯಾಪ್ಟನ್‌ಗೆ ಗೃಹ ಬಂಧನ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ರೋಮ್ (ಐಎಎನ್‌ಎಸ್): ಇಲ್ಲಿನ ಗಿಗ್ಲಿಯೊ ದ್ವೀಪದ ಬಳಿ `ಕೋಸ್ಟಾ ಕಾನ್‌ಕಾರ್ಡಿಯಾ~ ಹಡಗು ದುರಂತಕ್ಕೀಡಾದ ಸಂದರ್ಭದಲ್ಲಿ ಪ್ರಯಾಣಿಕರ ಜೀವ ಉಳಿಸಬೇಕಾಗಿದ್ದ ಕ್ಯಾಪ್ಟನ್, ಎಲ್ಲರಿಗಿಂತ ಮೊದಲು ಜೀವರಕ್ಷಕ ದೋಣಿಯಲ್ಲಿ ತೆರಳಿದ್ದರು ಎಂಬ ವಿಷಯ ಇದೀಗ ದೃಢಪಟ್ಟಿದೆ.



ಬಂದರು ಅಧಿಕಾರಿಗಳು ಮತ್ತು ಕ್ಯಾಪ್ಟನ್ ನಡುವೆ ನಡೆದ ಸಂಭಾಷಣೆಯಲ್ಲಿ ಈ ವಿಷಯ ಸ್ಪಷ್ಟವಾಗಿದ್ದು, ದುರಂತ ಸಂಭವಿಸಿದ ಬಳಿಕ ನಡೆದ ಈ ಸಂಭಾಷಣೆಯ ವಿವರವನ್ನು ಮಾಧ್ಯಮಗಳಿಗೆ ಬಹಿರಂಗಪಡಿಸಲಾಗಿದೆ.

ಕ್ಯಾಪ್ಟನ್ ಅವರನ್ನು ಗೃಹಬಂಧನದಲ್ಲಿ ಇರಿಸಲಾಗಿದೆ.



`ರಕ್ಷಣಾ ಕಾರ್ಯಾಚರಣೆಯಲ್ಲಿ ಸಹಕರಿಸುವಂತೆ ಸ್ಥಳೀಯ ಅಧಿಕಾರಿಗಳು ಮಾಡಿದ ಕೋರಿಕೆಯನ್ನು ಕ್ಯಾಪ್ಟನ್ ಫ್ರಾನ್ಸೆಸ್ಕೊ ಶೆಟ್ಟಿನೊ ನಿರ್ಲಕ್ಷಿಸಿದ್ದರು.  ನೀವು ಹಡಗಿಗೆ ಹಿಂತಿರುಗಿ ಎಷ್ಟು ಮಂದಿ ಪ್ರಯಾಣಿಕರು ಇದ್ದಾರೆ ಎಂಬ ಮಾಹಿತಿಯನ್ನು ಕೂಡಲೇ ನೀಡಲೇಬೇಕು. ಇದು ನಮ್ಮ ಆದೇಶ ಎಂದು ಹೇಳಿದ್ದರೂ ಅದಕ್ಕೆ ಅವರು ಕಿವಿಗೊಡಲಿಲ್ಲ~ ಎಂದು ಬಂದರು ಅಧಿಕಾರಿ ಡಿ ಫಾಲ್ಕೊ ದೂರಿದ್ದಾರೆ.

 

`ಪ್ರಯಾಣಿಕರನ್ನು ರಕ್ಷಿಸಲು ರಕ್ಷಣಾ ಕಾರ್ಯಕರ್ತರಿದ್ದಾರೆ, ನನಗೆ ಜೀವರಕ್ಷಕ ದೋಣಿಯಲ್ಲಿ ಸಾಗದೇ ಬೇರೆ ಮಾರ್ಗವಿಲ್ಲ. ಜತೆಗೆ ಈಗಾಗಲೇ ಕತ್ತಲೆ ಆವರಿಸಿದೆ~ ಎಂದು ಕ್ಯಾಪ್ಟನ್ ಉತ್ತರಿಸಿದರು ಎಂದು ಫಾಲ್ಕೊ ತಿಳಿಸಿದ್ದಾರೆ.



ಗೃಹ ಬಂಧನ: ಶೆಟ್ಟಿನೊ ಅವರನ್ನು ಗೃಹ ಬಂಧನದಲ್ಲಿ ಇರಿಸಲಾಗಿದೆ. ಹತ್ಯೆ ಮತ್ತು ಜವಾಬ್ದಾರಿಯಿಂದ ನುಣುಚಿಕೊಂಡ ಆರೋಪದ ಮೇರೆಗೆ ಅವರು ಹಲವು ವರ್ಷಗಳ ಜೈಲು ಶಿಕ್ಷೆ ಅನುಭವಿಸಬೇಕಾಗಿ ಬರಬಹುದು ಎಂದು ಹೇಳಲಾಗಿದೆ.



ಈ ಮಧ್ಯೆ, ರಕ್ಷಣಾ ಕಾರ್ಯಕರ್ತರು ಮಂಗಳವಾರ ಇನ್ನೂ ಐದು ಶವಗಳನ್ನು ಪತ್ತೆಹಚ್ಚುವುದರೊಂದಿಗೆ ದುರಂತದಲ್ಲಿ ಸಾವಿಗೀಡಾದವರ ಸಂಖ್ಯೆ 11ಕ್ಕೆ ಏರಿದೆ.

 

ಪ್ರತಿಕ್ರಿಯಿಸಿ (+)