2 ಜಿ ಹಗರಣಕ್ಕೆ ಒಂದು ವರ್ಷ

ನವದೆಹಲಿ (ಪಿಟಿಐ): ಇಡೀ ದೇಶವನ್ನೇ ಬೆಚ್ಚಿ ಬೀಳಿಸಿದ್ದ ಹಾಗೂ ರಾಜಕೀಯ, ಕಾರ್ಪೊರೇಟ್ ವಲಯಗಳ ದಿಗ್ಗಜರುಗಳೇ ಭಾಗಿಯಾಗಿದ್ದ 2 ಜಿ ತರಂಗಾಂತರ  ಹಗರಣದ ವಿಚಾರಣೆಗೀಗ ಬರೋಬ್ಬರಿ ಒಂದು ವರ್ಷ.

ಸಿಬಿಐ ವಿಶೇಷ  ನ್ಯಾಯಾಧೀಶ ಒ. ಪಿ. ಸೈನಿ ಅವರ ನೇತೃತ್ವದಲ್ಲಿ ಕಳೆದ ವರ್ಷದ ನವೆಂಬರ್ 11ರಂದು ಆರಂಭಗೊಂಡ ವಿಚಾರಣೆಯಲ್ಲಿ ಇದುವರೆಗೆ ಮಾಜಿ ದೂರಸಂಪರ್ಕ ಸಚಿವ ಎ. ರಾಜಾ ಮತ್ತು ಡಿಎಂಕೆ ಸಂಸದೆ ಕನಿಮೊಳಿ ಸೇರಿದಂತೆ 17 ಮಂದಿ ವಿರುದ್ಧ ಪ್ರಕರಣಗಳು ದಾಖಲಾಗಿವೆ. ಇವುಗಳಲ್ಲಿ ಮೂರು ದೂರಸಂಪರ್ಕ ಸಂಸ್ಥೆಗಳೂ ಸೇರಿವೆ. ಒಂದು ವರ್ಷದ ವಿಚಾರಣೆಯ ಅವಧಿಯಲ್ಲಿ  ಸುಮಾರು 100 ಸಾಕ್ಷ್ಯಗಳ ವಿಚಾರಣೆ ನಡೆಸಿ 3000 ಪುಟಗಳಷ್ಟು ಹೇಳಿಕೆಯನ್ನು ದಾಖಲಿಸಿರುವುದು ನ್ಯಾಯಾಲಯದ ಹೆಗ್ಗಳಿಕೆಯಾಗಿದೆ.