ಅಂಕಾರ (ಐಎಎನ್‌ಎಸ್): ಟರ್ಕಿಯಲ್ಲಿ ಭಾನುವಾರ ಸಂಭವಿಸಿದ ಭೂಕಂಪದಲ್ಲಿ ಸಾವನ್ನಪ್ಪಿದವರ ಸಂಖ್ಯೆ 459ಕ್ಕೆ ತಲುಪಿದ್ದು, ಕನಿಷ್ಠ 1,352 ಮಂದಿ ಗಾಯಗೊಂಡಿದ್ದಾರೆ ಎಂದು ವಿಪತ್ತು ಮತ್ತು ತುರ್ತು ನಿರ್ವಹಣಾ ಸಂಸ್ಥೆ ತಿಳಿಸಿದೆ.
ಭೂಕಂಪದಲ್ಲಿ 75,000 ಜನಸಂಖ್ಯೆ ಹೊಂದಿರುವ ಎರ್ಕಿಸ್ ಪಟ್ಟಣದಲ್ಲಿ ಸುಮಾರು 80ಕ್ಕೂ ಹೆಚ್ಚು ಬಹುಮಾಳಿಗೆ ಕಟ್ಟಡಗಳು ನೆಲಸಮಗೊಂಡಿವೆ.
ಸುಮಾರು 3,346 ರಕ್ಷಣಾ ಕಾರ್ಯಕರ್ತರನ್ನು ದುರಂತ ಸಂಭವಿಸಿದ ಸ್ಥಳಕ್ಕೆ ಕಳುಹಿಸಲಾಗಿದೆ ಎಂದು ಕ್ಸಿನುವಾ ಸುದ್ದಿಸಂಸ್ಥೆ ವರದಿ ಮಾಡಿದೆ. ಇದೇ ವೇಳೆ ವ್ಯಾನ್ ಪ್ರಾಂತ್ಯದ ಎರ್ಕಿಸ್‌ನಲ್ಲಿ ಅವಶೇಷಗಳಡಿಯಿಂದ ಮಂಗಳವಾರ 2 ವಾರದ ಮಗುವನ್ನು ರಕ್ಷಿಸಲಾಗಿದೆ ಎಂದು ಸುದ್ದಿಸಂಸ್ಥೆ ವರದಿ ಮಾಡಿದೆ.
66 ಗಂಟೆಗಳ ಬಳಿಕ ಮಹಿಳೆಯ ರಕ್ಷಣೆ
ಎರ್ಕಿಸ್ (ಟರ್ಕಿ), (ಎಎಫ್‌ಪಿ): ಪೂರ್ವ ಟರ್ಕಿಯಲ್ಲಿ ಪ್ರಬಲ ಭೂಕಂಪ ಸಂಭವಿಸದ 66 ಗಂಟೆಗಳ ಬಳಿಕ ಅವಶೇಷಗಳಡಿಯಿಂದ 27 ರ ಹರೆಯದ ಗೋಜ್ದೆ ಬಹಾರ್ ಎಂಬ ಮಹಿಳೆಯೊಬ್ಬರನ್ನು ರಕ್ಷಣಾ ಕಾರ್ಯಕರ್ತರು ಹೊರಕ್ಕೆ ತೆಗೆದಿದ್ದಾರೆ.
ಬಹಾರ್ ಅವರು ಭೂಕಂಪ ಪೀಡಿತ ವ್ಯಾನ್ ಪ್ರಾಂತ್ಯದ ಎರ್ಕಿಸ್ ಪಟ್ಟಣದಲ್ಲಿ ಶಿಕ್ಷಕಿಯಾಗಿ ಸೇವೆ ಸಲ್ಲಿಸುತ್ತಿದ್ದರು. ಅವಶೇಷಗಳಡಿಯಿಂದ ಹೊರಗೆಳೆದ ತಕ್ಷಣವೇ ಅವರನ್ನು ಎರ್ಕಿಸ್‌ನ ಆಸ್ಪತ್ರೆಗೆ ದಾಖಲಿಸಲಾಯಿತು.
