ಕಾಬೂಲ್‌ (ಐಎಎನ್‌ಎಸ್‌): ತಾಲಿಬಾನ್‌ ಪ್ರಮುಖ ಮುಖಂಡನೊಬ್ಬ ಮಂಗಳವಾರ ಆಫ್ಘಾನಿಸ್ತಾನದ ಉರುಜ್ಗಾನ್‌ ಪ್ರಾಂತ್ಯದಲ್ಲಿ ಶರಣಾಗಿದ್ದಾನೆ ಎಂದು ಬುಧವಾರ ಪೊಲೀಸರು ತಿಳಿಸಿದ್ದಾರೆ.
‘ದಕ್ಷಿಣ ಪ್ರಾಂತ್ಯದ ಪ್ರಸಿದ್ಧ ತಾಲಿಬಾನ್‌ ಮುಖಂಡ ಮುಲ್ಲಾ ಮೊಮಿನ್‌ ಮಂಗಳವಾರ ತಡರಾತ್ರಿ ಡೇಹ್‌ ರಾವಡ್‌ ಜಿಲ್ಲೆಯ ಪೊಲೀಸರಿಗೆ ಶರಣಾಗಿದ್ದಾನೆ. ಶಸ್ತ್ರಾಸ್ತ್ರಗಳನ್ನೂ ಪೊಲೀಸರಿಗೆ ಒಪ್ಪಿಸಿದ್ದಾನೆ’ ಎಂದು ಜಿಲ್ಲಾ ಪೊಲೀಸ್‌ ಮುಖ್ಯಸ್ಥರು ತಿಳಿಸಿದ್ದಾರೆ.
‘ವಿದೇಶಿ ಸೈನ್ಯ ಉರುಜ್ಗಾನ್‌ ಪ್ರಾಂತವನ್ನು ತೊರೆದ ನಂತರ ಅಲ್ಲಿನ ಸರ್ಕಾರದ ವಿರುದ್ಧ ಹೋರಾಡುವುದರಲ್ಲಿ ಯಾವುದೇ ಅರ್ಥವಿಲ್ಲ’ ಎಂದು ಮುಲ್ಲಾ ಮೊಮಿನ್‌ ಹೇಳಿರುವುದಾಗಿ ಅವರು ತಿಳಿಸಿದ್ದಾರೆ.
ಉರುಜ್ಗಾನ್‌ನಲ್ಲಿ ಭದ್ರತಾ ವ್ಯವಸ್ಥೆ ನೋಡಿಕೊಳ್ಳುತ್ತಿದ್ದ ಆಸ್ಟ್ರೇಲಿಯಾ ಸೈನ್ಯ ಒಂದು ತಿಂಗಳ ಹಿಂದೆಯೇ ಮರಳಿ ಹೋಗಿರುವುದರಿಂದ ಈಗ ಅಲ್ಲಿನ ಭದ್ರತಾ ವ್ಯವಸ್ಥೆಯನ್ನು ಆಫ್ಘಾನಿಸ್ತಾನ ರಾಷ್ಟ್ರೀಯ ಭದ್ರತಾ ಪಡೆ ನೋಡಿಕೊಳ್ಳುತ್ತಿದೆ.
