ನ್ಯೂಯಾರ್ಕ್, ಲಂಡನ್ (ಎಎಫ್‌ಪಿ, ಪಿಟಿಐ): ನೈರೋಬಿ ಮಾಲ್‌ ಮೇಲೆ ದಾಳಿ ನಡೆಸಿದ ಉಗ್ರರಲ್ಲಿ ಇಬ್ಬರು ಅಮೆರಿಕ ಪ್ರಜೆಗಳು ಮತ್ತು ಬ್ರಿಟನ್ ಮಹಿಳೆಯೊಬ್ಬಳು ಸೇರಿದ್ದಾರೆ ಎಂದು ಕೀನ್ಯಾ ವಿದೇಶಾಂಗ ಸಚಿವೆ ಅಮೀನಾ ಮೊಹಮ್ಮದ್‌ ಹೇಳಿದ್ದಾರೆ.
ಮಾಲ್‌ ಮೇಲಿನ ದಾಳಿಯಲ್ಲಿ ಭಾಗಿಯಾಗಿರುವ ಬ್ರಿಟನ್ ಮಹಿಳೆ ಶಂಕಿತ ಭಯೋತ್ಪಾದಕಿ ಸಮಂತಾ ಲೆಥ್‌ವೇಟ್‌ ಆಗಿರುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ.
ಲಂಡನ್ ಮೇಲಿನ 7/7 ದಾಳಿಯಲ್ಲಿ ಭಾಗಿಯಾಗಿದ್ದ ಆತ್ಮಹತ್ಯಾ ಬಾಂಬರ್‌ ಜರ್ಮೈನ್‌ ಲಿಂಡ್ಸೆಯನ್ನು ಲೆಥ್‌ವೇಟ್‌ ಮದುವೆಯಾಗಿದ್ದಳು.
‘ಶ್ವೇತ ವರ್ಣದ ವಿಧವೆ’ ಎಂದು ಕರೆಯಲಾಗುವ ಲೆಥ್‌ವೇಟ್‌ ಪೂರ್ವ ಆಫ್ರಿಕಾ ಮೂಲದವಳಾಗಿದ್ದು, ಕೀನ್ಯಾದ ಕರಾವಳಿ ಮೇಲೆ ದಾಳಿ ನಡೆಸಲು ಉದ್ದೇಶಿಸಿದ್ದ ಭಯೋತ್ಪಾದನಾ ಸಂಘಟನೆಯೊಂದಿಗೆ ಸಂಪರ್ಕ ಹೊಂದಿದ್ದ ಆರೋಪದಲ್ಲಿ ಆಕೆ ಪೊಲೀಸರಿಗೆ ಬೇಕಾಗಿದ್ದಾಳೆ.
ಲೆಥ್‌ವೇಟ್‌ ಸೋಮಾಲಿಯಾಕ್ಕೆ ಪರಾರಿಯಾಗಿದ್ದಾಳೆ. ಆಕೆ ಬಳಿ ಹಲವು ಗುರುತಿನ ಪತ್ರಗಳಿವೆ ಎಂದು ಕಳೆದ ಮಾರ್ಚ್‌ನಲ್ಲಿ ಬ್ರಿಟನ್ ಅಧಿಕಾರಿಗಳು ಹೇಳಿದ್ದರು.
