ಇಸ್ಲಾಮಾಬಾದ್ (ಪಿಟಿಐ/ಐಎಎನ್ಎಸ್): ಪಾಕಿಸ್ತಾನದ ಬಲೂಚಿಸ್ತಾನ ಪ್ರಾಂತ್ಯದಲ್ಲಿ ಮಂಗಳವಾರ ಸಂಭವಿಸಿದ ಭೂಕಂಪದಿಂದ ಮೃತಪಟ್ಟವರ ಸಂಖ್ಯೆ ಬುಧವಾರ 350ಕ್ಕೆ ಏರಿದೆ.
400 ಜನರು ಗಾಯಗೊಂಡಿದ್ದಾರೆ. ಅವಶೇಷಗಳಡಿ ಬದುಕುಳಿದವರನ್ನು ಕಾಪಾಡಲು ಸೇನೆ ಮತ್ತು ರಕ್ಷಣಾ ಕಾರ್ಯಕರ್ತರು ಶ್ರಮಿಸುತ್ತಿದ್ದಾರೆ.
ಬಹುದೂರದವರೆಗೆ ಹರಡಿಕೊಂಡಿರುವ ಮಣ್ಣಿನ ಅವಶೇಷಗಳಡಿ ಅನೇಕರು ಸಿಲುಕಿಕೊಂಡಿರುವ ಸಾಧ್ಯತೆ ಇದೆ.
ರಸ್ತೆ ಸಮಸ್ಯೆಯಿಂದಾಗಿ ಬುಧವಾರವಷ್ಟೇ ಹಾನಿಯ ಸ್ಥಳಗಳಿಗೆ ರಕ್ಷಣಾ ತಂಡಗಳು ತಲುಪಿವೆ. ಪ್ರಾಥಮಿಕ ಅಂದಾಜಿನ ಪ್ರಕಾರ, ಭೂಕಂಪದಿಂದ ಮೂರು ಲಕ್ಷ ಜನರು ತೊಂದರೆಗೊಳಗಾಗಿದ್ದಾರೆ.
ಭೂಕಂಪ ಸಂಭವಿಸಿದ ಆರೂ ಜಿಲ್ಲೆಗಳಲ್ಲಿ ಬಲೂಚಿಸ್ತಾನದ ಮುಖ್ಯಮಂತ್ರಿ ಅಬ್ದುಲ್ ಮಲಿಕ್ ಬಲೋಚ್ ತುರ್ತು ಪರಿಸ್ಥಿತಿ ಘೋಷಿಸಿದ್ದಾರೆ.