ಲೇಹ್/ ನವದೆಹಲಿ (ಪಿಟಿಐ): ಚೀನಾ ಸೇನೆಯ ಇನ್ನಷ್ಟು ಯೋಧರು ಲಡಾಖ್ನ ಚುಮಾರ್ ಗಡಿಯಲ್ಲಿ ಶನಿವಾರ ಭಾರತದ ಭೂಪ್ರದೇಶಕ್ಕೆ ನುಗ್ಗಿದ್ದು ಆತಂಕ ಮತ್ತಷ್ಟು ಹೆಚ್ಚಾಗಿದೆ. ಚೀನಾ ಯೋಧರು ಎರಡು ದಿನಗಳ ಅವಧಿಯಲ್ಲಿ ಭಾರತದ ಗಡಿಯೊಳಕ್ಕೆ ಎರಡನೇ ಸಲ ನುಗ್ಗಿದಂತಾಗಿದೆ.
ಚೀನಾದ ಸೇನೆಯ (ಪಿಎಲ್ಎ) ಸುಮಾರು 50 ಯೋಧರು ಒಂಬತ್ತು ವಾಹನಗಳಲ್ಲಿ ‘ಪಾಯಿಂಟ್ 30 ಆರ್’ ಎಂಬ ಪ್ರದೇಶಕ್ಕೆ ನುಗ್ಗಿದರು. ಇದಕ್ಕೆ ಮುನ್ನ ಚೀನಾದ ಸುಮಾರು 30 ಸೈನಿಕರು ಶುಕ್ರವಾರದಿಂದಲೇ ಚುಮಾರ್ ಪ್ರದೇಶದ ಗುಡ್ಡವೊಂದರ ಮೇಲೆ ಬಿಡಾರ ಹೂಡಿದ್ದರು.
ಚೀನಾದ ಸೈನಿಕರು ಪಾಯಿಂಟ್ 30 ಆರ್ ಪ್ರದೇಶದಲ್ಲಿ ವಾಹನಗಳಿಂದ ಇಳಿಯುತ್ತಿದ್ದಂತೆಯೇ ಭಾರತೀಯ ಸೇನೆಯಿಂದ ಕೇವಲ 100 ಮೀಟರ್ ದೂರದಲ್ಲಿ ಸನ್ನದ್ಧ ಭಂಗಿಯಲ್ಲಿ ನಿಂತರು. ಈ ಮಧ್ಯೆ, ಚೀನಾ ಸೇನೆ ಗುರುವಾರ ರಾತ್ರಿ ಚುಮಾರ್ ಪ್ರದೇಶದಿಂದ ಕಾಲ್ತೆಗೆದರೂ ಭಾರತದ ಸೇನೆ ಅಲ್ಲಿಂದ ಕದಲಿರಲಿಲ್ಲ ಎಂದೂ ಮೂಲಗಳು ತಿಳಿಸಿವೆ.
ಭಾರತದ ಸೇನೆಯು ಚುಮಾರ್ನ ವಾಸ್ತವ ಗಡಿ ರೇಖೆಯ ಬಳಿ ವೀಕ್ಷಣಾ ನೆಲೆಯನ್ನು ಹೊಂದಿದ್ದು ಇದು ಚೀನಾದ ಚಲನವಲನಗಳ ಮೇಲೆ ನಿಗಾ ಇಡಲು ಹೆಚ್ಚು ಅನುಕೂಲಕರವಾಗಿದೆ. ಹೀಗಾಗಿ ಈ ಪ್ರದೇಶಕ್ಕೆ ಚೀನಾದ ಪಿಎಲ್ಎ ಕೂಡ ಆಗಾಗ ಒಳನುಗ್ಗುತ್ತಲೇ ಇರುತ್ತದೆ.
ಈಗ ಚುಮಾರ್ ಪ್ರದೇಶದಲ್ಲಿ ಶುಕ್ರವಾರ ಒಳನುಗ್ಗಿದ 35 ಸೈನಿಕರೂ ಸೇರಿ ಒಟ್ಟು 80ರಿಂದ 90 ಚೀನಾ ಯೋಧರು ಇದ್ದಾರೆ. ಚೀನಾದ ಹೆಲಿಕಾಪ್ಟರ್ಗಳು ಇವರಿಗೆ ಆಹಾರದ ಪೊಟ್ಟಣಗಳನ್ನು ಸುರಿಯುತ್ತಿವೆ. ಆದರೆ ಈ ಹೆಲಿಕಾಪ್ಟರ್ಗಳು ಭಾರತದ ವಾಯುಗಡಿಯನ್ನು ಉಲ್ಲಂಘಿಸಿಲ್ಲ ಎಂದೂ ಮೂಲಗಳು ಹೇಳಿವೆ.
ಚೀನಾವು ವಾಸ್ತವ ಗಡಿ ರೇಖೆಗೆ ಹೊಂದಿಕೊಂಡಿರುವ ತನ್ನ ನೆಲದಲ್ಲಿ ರಸ್ತೆ ಕಾಮಗಾರಿ ನಡೆಸುತ್ತಿತ್ತು. ಈ ರಸ್ತೆ ನಿರ್ಮಾಣದಲ್ಲಿ ತೊಡಗಿರುವ ಕಾರ್ಮಿಕರು ಕಳೆದ ಭಾನುವಾರ ಭಾರತದ ಗಡಿಯೊಳಕ್ಕೆ ನುಗ್ಗಿ ರಸ್ತೆ ನಿರ್ಮಾಣ ಮಾಡಲು ಮುಂದಾದಾಗ ಭಾರತದ ಸೇನೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿತು. ಆಗಿನಿಂದ ಎರಡೂ ರಾಷ್ಟ್ರಗಳ ಸೈನಿಕರ ಮುಖಾಮಖಿ ಮುಂದುವರಿದಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.