ಮಂಗಳೂರು:ನಗರದ ಜೆಪ್ಪುವಿನ ಸೇಂಟ್ ರೀಟಾ ಆಂಗ್ಲ ಮಾಧ್ಯಮ ಶಾಲೆಯಲ್ಲಿ ಕೆಲವು ವಿದ್ಯಾರ್ಥಿಗಳ ‘ಪ್ರಯೋಗ’ದ ಉತ್ಸಾಹದಿಂದಾಗಿ 12 ವರ್ಷದ ವಿದ್ಯಾರ್ಥಿಯೊಬ್ಬ ದೃಷ್ಟಿಯನ್ನೇ ಕಳೆದುಕೊಳ್ಳುವ ಆತಂಕ ಎದುರಿಸುತ್ತಿರುವುದು ಶುಕ್ರವಾರ ಬೆಳಕಿಗೆ ಬಂದಿದೆ.
ಶಾಲೆಯ ಏಳನೇ ತರಗತಿ ವಿದ್ಯಾರ್ಥಿ ಅಮೋಘ್ ಕಣ್ಣುಗಳಿಗೆ ಗಂಭೀರ ಗಾಯಗಳಾಗಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಶಾಲೆಯ ಕೆಲವು ವಿದ್ಯಾರ್ಥಿಗಳು ಸೇರಿ ಪ್ರಯೋಗಾಲಯದಿಂದ ರಾಸಾಯನಿಕದ ಬಾಟಲಿಯೊಂದನ್ನು ಕದ್ದು ಶಾಲೆಯ ಆವರಣದಲ್ಲಿರುವ ಶೌಚಾಲಯದ ಬಳಿ ಸೋಮವಾರ ‘ಪ್ರಯೋಗ’ ನಡೆಸಿದ್ದರು. ಆ ವೇಳೆ ಸಣ್ಣ ಮಟ್ಟಿನ ಸ್ಫೋಟ ಸಂಭವಿಸಿದ ಪರಿಣಾಮ ವಿದ್ಯಾರ್ಥಿ ಅಮೋಘ್ ಕಣ್ಣು ಉರಿಯಿಂದ ಬಳಲಿದ್ದ. ಆತನನ್ನು ತಕ್ಷಣ ಖಾಸಗಿ ಆಸ್ಪತ್ರೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗಿದೆ.
‘ವಿದ್ಯಾರ್ಥಿಯ ಕಣ್ಣು ಯಾವ ಸ್ಥಿತಿಯಲ್ಲಿದೆ ಎಂದು ಈ ಹಂತದಲ್ಲೇ ಹೇಳಲು ಸಾಧ್ಯವಿಲ್ಲ. ಚಕಿತ್ಸೆಯ ಬಳಿಕ ಕಣ್ಣು ಸರಿಹೊಂದುವ ಸಾಧ್ಯತೆಯೂ ಇದೆ’ ಎಂದು ವೈದ್ಯರು ತಿಳಿಸಿದ್ದಾರೆ. ವಿದ್ಯಾರ್ಥಿ ಅಮೋಘ್ ಸ್ಥಳೀಯ ಟೈಲರ್ ಅಶೋಕ್ – ಆಶಾ ದಂಪತಿಯ ಪುತ್ರ.
