ಶಂಕಿತ ಆರೋಪಿಯ ರೇಖಾಚಿತ್ರ ಬಿಡುಗಡೆ

ಮೂಡುಬಿದಿರೆ: ಇಲ್ಲಿನ ಜೈನಮಠ ಅಧೀನದ ಸಿದ್ಧಾಂತ ಮಂದಿರದಲ್ಲಿ ಶುಕ್ರವಾರ ರಾತ್ರಿ ನಡೆದ ಕೋಟ್ಯಂತರ ರೂಪಾಯಿ ಮೌಲ್ಯದ ಪುರಾತನ ವಿಗ್ರಹಗಳ ಕಳ್ಳತನ ಪ್ರಕರಣಕ್ಕೆ ಸಂಬಂಧಿಸಿದಂತೆ ಶಂಕಿತ ಆರೋಪಿಯ ರೇಖಾಚಿತ್ರವನ್ನು  ಪೊಲೀಸರು ಭಾನುವಾರ  ಬಿಡುಗಡೆ ಮಾಡಿದ್ದಾರೆ.

ಶಂಕಿತನು ಸುಮಾರು 30 ವರ್ಷ ಪ್ರಾಯದವನಾಗಿದ್ದು ಬಿಳಿಬಣ್ಣ, ದೃಢಕಾಯ ಹೊಂದಿದ್ದಾನೆ. ಕುರುಚಲು ಗಡ್ಡ, ಮೀಸೆ ಹಾಗೂ ತಲೆಯಲ್ಲಿ ಗಿಡ್ಡ ಕೂದಲುಗಳಿವೆ. ಮೇಲ್ನೋಟಕ್ಕೆ ಉತ್ತರ ಪ್ರದೇಶದ ನಾಗರಿಕನಂತಿದ್ದಾನೆ. ಕಳ್ಳತನ ನಡೆದ ದಿನ ಮತ್ತು ಅದರ ಹಿಂದಿನ ದಿನ ಶಂಕಿತ ವ್ಯಕ್ತಿಯೊಬ್ಬ ಜೈನ್‌ಪೇಟೆ ಪರಿಸರದಲ್ಲಿ ಸುತ್ತಾಡುತ್ತಿದ್ದುದನ್ನು ಕಂಡವರಿದ್ದಾರೆ.

`ಧರ್ಮಸ್ಥಳ ಜಾನಾ ಹೈ ಕಿದರ್ ರಾಸ್ತಾ' ಎಂದು ವ್ಯಕ್ತಿಯೊಬ್ಬರಲ್ಲಿ ಹಿಂದಿಯಲ್ಲಿ ಕೇಳಿದ್ದಾನೆ ಎನ್ನಲಾಗಿದೆ. ಆತ ಶನಿವಾರದಿಂದ ಕಾಣಿಸಿಲ್ಲ. ಶನಿವಾರ ಮುಂಜಾನೆ ಹಿಂದಿ ಮಾತನಾಡುತ್ತಿದ್ದ ವ್ಯಕ್ತಿಯೊಬ್ಬ ಮೂಡುಬಿದಿರೆಯಿಂದ ಬಾಡಿಗೆ ರಿಕ್ಷಾದಲ್ಲಿ ಬೆಳ್ತಂಗಡಿಗೆ ಹೋಗಿದ್ದು, ಆತ ಜೈನ್ ಪೇಟೆಯಲ್ಲಿ ಸುತ್ತಾಡುತ್ತಿದ್ದವನೇ ಎಂಬುದು ದೃಢಪಟ್ಟಿಲ್ಲ. ಸಾರ್ವಜನಿಕರು ಕೊಟ್ಟ ಮಾಹಿತಿಯಂತೆ ಶಂಕಿತ ಆರೋಪಿಯ ರೇಖಾಚಿತ್ರ ಬಿಡುಗಡೆಗೊಳಿಸಲಾಗಿದೆ.

ಉಳಿಕೆ ವಿಗ್ರಹಗಳು ಬ್ಯಾಂಕ್ ಲಾಕರ್‌ಗೆ: ಜೈನ ಮಠದ ಶ್ರಿಗಳು ಅಮೆರಿಕ ಪ್ರವಾಸದಲ್ಲಿದ್ದಾರೆ. ಸಿದ್ಧಾಂತ ಮಂದಿರದಲ್ಲಿ ಎಷ್ಟು ವಿಗ್ರಹಗಳಿದ್ದವು ಎನ್ನುವುದು ಗೊತ್ತಾಗಿಲ್ಲ. ಮೂಲವೊಂದರ ಪ್ರಕಾರ ಅಲ್ಲಿ 50 ವಿಗ್ರಹಗಳಿದ್ದು ಈ ಪೈಕಿ 15 ಕಳವಾಗಿವೆ. ಉಳಿದ ವಿಗ್ರಹಗಳನ್ನು ಬ್ಯಾಂಕ್ ಲಾಕರ್‌ನಲ್ಲಿಡಲು ನಿರ್ಧರಿಸಲಾಗಿದೆ.